فوتو: اقوردا ءباسپاسوز قىزمەتى
قاسىم-جومارت توقاەۆقا بىلتىر ۇقك بولىمشەلەرى ەلىمىزدە ەكى تەررورلىق ارەكەتتىڭ جانە شەتەلدىڭ ارناۋلى قىزمەتتەرىمەن بىرگە وزگە مەملەكەتتەردىڭ اۋماعىندا ءۇش لاڭكەستىك اكتسيانىڭ الدىن العانى تۋرالى باياندالدى. لاڭكەستىك جانە ەكسترەميستىك قىلمىستار جاساعانى ءۇشىن 43 ادام سوتتالدى. جىل بويى ۇلتتىق قاۋىپسىزدىك كوميتەتىنىڭ ۇيلەستىرۋىمەن تەرروريزمگە قارسى 208 كوماندالىق-شتابتىق جانە 196 جەدەل-تاكتيكالىق وقۋ-جاتتىعۋ جيىنى وتكەن.
ەرمەك ساعىمباەۆ ەكونوميكالىق قاۋىپسىزدىكتى قامتاماسىز ەتۋ جانە ءجيى كەزدەسەتىن سىبايلاس جەمقورلىققا قارسى كۇرەس جۇمىستارىنىڭ ناتيجەسى جونىندە ايتتى. قابىلدانعان شارالار ناتيجەسىندە جالپى 1,5 تريلليون تەڭگەدەن استام قارجى تۇسكەن, سونىڭ ىشىندە مەملەكەتتىك بيۋدجەتكە قايتارۋ باستاماسى اياسىندا 680 ميلليارد تەڭگەدەن اسا قارجى قايتارىلدى.
سونىمەن قاتار كەزدەسۋدە ىشكى ىستەر مينيسترلىگىمەن بىرلەسىپ, ۇيىمداسقان 15 قىلمىستىق توپ قىزمەتىنىڭ جولى كەسىلگەنى, سونداي-اق 681 قارۋ مەن 85 مىڭنان استام وق-ءدارى تاركىلەنگەنى تۋرالى ايتىلدى.
ەسىرتكى بيزنەسىنە قارسى ءىس-قيمىل بويىنشا 36 زەرتحانا جويىلدى. 34 حالىقارالىق جانە 32 وڭىرلىك ەسىرتكى ارناسىنا توسقاۋىل قويىلىپ, 3,6 توننا ەسىرتكى تاركىلەندى.
ۇقك حالىقارالىق ىنتىماقتاستىق اياسىندا شەتەلدىك ارىپتەستەرىمەن بىرقاتار وپەراتسيانى جۇزەگە اسىردى.
مەملەكەتتىك شەكارانى كۇزەتۋ سالاسىندا قۇقىق بۇزعان 31 مىڭنان استام ادام ۇستالعان. قارۋ-جاراق, وق-ءدارى جانە ەسىرتكى الىپ وتۋگە قاتىستى 739 ارەكەتكە, سونداي-اق جالپى سوماسى 11,7 ميلليارد تەڭگە بولاتىن ۆاليۋتا مەن التىندى, سوماسى 12,6 ميلليارد تەڭگەنى قۇرايتىن تاۋاردى تاسىمالداۋعا جول بەرىلمەدى.
ۇلتتىق قاۋىپسىزدىك كوميتەتىنىڭ تەحنيكالىق بولىمشەلەرى مەملەكەتتىك ورگانداردىڭ رەسۋرستارىنا جانە ەلدىڭ ماڭىزدى ستراتەگيالىق ينفراقۇرىلىم نىساندارىنا جاسالعان 86,3 ميلليون كيبەرشابۋىل مەن 2156 DDoS-شابۋىلدى تويتارعان.
كەزدەسۋ سوڭىندا قاسىم-جومارت توقاەۆ ۇلتتىق قاۋىپسىزدىك ورگاندارى قىزمەتىنىڭ باعىتتارى بويىنشا بىرقاتار ناقتى تاپسىرما بەردى
