فوتو: ngs.ru
جەلىگە جۇگىنسەك, جول-كولىك ەرەجەسىن بۇزۋ فاكتىسىن فوتو-ۆيدەو فيكساتسيا جاساپ قۇزىرلى ورگاندارعا جونەلتەتىندەر قاتارى ارتقان. مۇنداي ارەكەتتەر كەي جۇرگىزۋشىلەر تاراپىنان نارازىلىققا تاپ بولىپ جاتىر.
ەلىمىزدە ءۇشىنشى تۇلعا ءتارتىپتى بۇزۋ دەرەگىن الىپ, كولىكتى سىرتىنان ءتۇسىرىپ پوليتسياعا شاعىمدانۋعا قانشالىقتى قۇقىلى؟ وسى مازمۇنداعى حابارلاما جاساعان ادامعا بەلگىلى مولشەردە سىياقى بەرىلە مە؟ قوعامدا قىزۋ تالقىلانىپ, تۇرعىندار تاراپىنان جولدانعان ساۋالدى استانا قالالىق پوليتسيا دەپارتامەنتى ماماندارىنا قويىپ كوردىك.
«قازاقستان رەسپۋبليكاسىنىڭ جول جۇرۋگە قاتىسى بار ءار ازاماتى جول ەرەجەسىن ساقتاۋ كەرەك. سوندىقتان ءۇشىنشى تۇلعانىڭ بەينەكامەراعا نەمەسە فوتو فيكساتسيا جاساپ بىزگە جىبەرگەنى دۇرىس دەپ ەسەپتەيمىن. زاڭبۇزۋشىلىقتى پوليتسياعا جولداۋ 102 نومەرىمەن قوسا ونلاين كانال ارقىلى جۇزەگە اسىرىلادى. شاعىمعا دالەل رەتىندە فوتو-ۆيدەو فيكساتسيا جاساپ پوليتسياعا جىبەرۋ كەرەك. وسى تيپتەگى ارىز-شاعىمداردى پوليتسيا دەپارتمەنتىنىڭ سايت بولىمشەسى قاراپ, تىركەيدى. ارىز نەگىزىندە ءبىزدىڭ ارىپتەستەر ارەكەتكە كوشەدى. ەگەر پوليتسيا كەلگەن كەزدە كولىك قۇرالى ورنىندا بولماسا جۇرگىزۋشىنىڭ ادرەسىنە ءتارتىپ بۇزۋشىلىق دەرەگىنىڭ سالماعىنا ساي ايىپپۇل سالىنادى. ال ءۇشىنشى تۇلعالاردىڭ بۇل ىسكە بەلسەندى ارالاسۋى پوليتسيانىڭ ءىسىن جەڭىلدەتىپ قانا قويماي, قوعام بولىپ جول ەرەجەسىن بۇزباۋعا ىنتالاندىرادى. ناقتى فوتو-ۆيدەو دالەل بولسا ءبىز مىندەتتى تۇردە شارا قولدانامىز», دەدى استانا قالالىق پاترۋلدىك پوليتسيا پولكىنىڭ قىزمەت ينسپەكتورى نۇرلان ءابجانوۆ.
قازاقستان تاجىريبەسىندە جەمقورلىق جايىن حابارلاعان تۇلعالارعا سىياقى بەرۋ جۇيەسى قالىپتاسقان. وسى تۇرعىدا جول-كولىك ەرەجەسىن, جول ءجۇرۋ ءتارتىبىن بۇزۋ جونىندە دەرەكتى ونلاين كانال ارقىلى مالىمدەگەندەرگە دە سىياقى ۇسىنىلا ما دەگەن زاڭدى ساۋال تۋىندايدى.
«كوز الدىندا بولىپ جاتقان تالاپقا ساي ەمەس ارەكەتتى, جول ەرەجەسىن بۇزۋ جاعدايىن كورسە, جاياۋ جولاۋشىلارعا كەدەرگى كەلتىرەتىندەي كولىك تارتىپپەن قويىلماسا ءتيىستى ورىنعا حابارلاۋ ءار ازاماتتىڭ مىندەتى دەپ ويلايمىن. مۇنداي اقپارات بەرگەن ءۇشىنشى تۇلعالارعا ەشقانداي ماراپات, سىياقى بەرۋ زاڭنامادا كوزدەلمەگەن», دەدى نۇرلان ءابجانوۆ.
