تارقاتىپ ايتساق, ۇيعىر اۋدانى بويىنشا بارلىعى 11 نىسانعا زاقىم كەلگەن. ونىڭ ىشىندە دەنساۋلىق ساقتاۋ سالاسىنىڭ 1 نىسانى, ءبىلىم بەرۋ سالاسىنىڭ 8 نىسانى جانە 2 مادەنيەت ءۇيى بار. ەڭبەكشىقازاق اۋدانى بويىنشا 14 نىسان انىقتالدى: 7 ءبىلىم بەرۋ نىسانى, 1 دەنساۋلىق ساقتاۋ نىسانى, 6 مادەنيەت وشاعى. ال تالعار, جامبىل, قاراساي اۋداندارىنىڭ ءبىلىم بەرۋ نىساندارىندا, كەگەن, ىلە اۋداندارىنىڭ دەنساۋلىق ساقتاۋ عيماراتتارىندا, رايىمبەك اۋدانىنىڭ 2 ءبىلىم بەرۋ نىسانىنىڭ جانە 1 مادەنيەت ءۇيىنىڭ قابىرعالارىندا سىزات پايدا بولعان.
جەر سىلكىنىسىنىڭ سالدارىنان كەگەن اۋداندىق اۋرۋحاناسىنا قاراستى ەمدەۋ مەكەمەلەرىنىڭ عيماراتتارىنا ايتارلىقتاي زاقىم كەلگەن. ايتالىق, كەگەن اۋداندىق اۋرۋحاناسىنىڭ ەمحانا ءبولىمى عيماراتىنىڭ شىعىس جاق بولىگىندەگى جەرتولەگە تۇسەتىن ەسىكتىڭ تۇسى, لفك كابينەتىنىڭ ەسىگىنىڭ جانىنداعى قابىرعا جانە كۇندىزگى ستاتسيونار ءدالىزىنىڭ قابىرعالارىنا قالىڭدىعى 0,5-2 سم شاماسىندا جوعارىدان تومەن قاراي سىزات تۇسكەن. جالپى اۋماعى 22 340 شارشى مەترلىك ەكىقاباتتى عيمارات 2014 جىلى قىزىل كىرپىشتەن سالىنعان. مۇندا 513 بولمە بار. سودان بەرى جوندەۋ جۇمىستارى جۇرگىزىلمەگەن.
سونداي-اق ساتى اۋىلىنداعى 2010 جىلى سالىنعان دارىگەرلىك امبۋلاتوريا عيماراتى دا ءبىرشاما ب ۇلىنگەن. ونداعى ەمدەۋ بولمەلەرىنىڭ قابىرعالارىنا جاپسىرىلعان كافەلدەر ءتۇسىپ, توبە مەن قابىرعا ارالارىنىڭ 0,5 سم شاماسىندا اجىراعانى انىقتالعان. ال وتكەن جىلى عانا پايدالانۋعا بەرىلگەن ا.نۇسىپبەكوۆ اۋىلىنداعى كىشى جالاڭاش دارىگەرلىك امبۋلاتورياسى مەن ىرگەسى 1990 جىلى قالانعان جالاڭاش اۋىلدىق دارىگەرلىك امبۋلاتورياسىنىڭ عيماراتتارىندا دا وسىنداي جايتتار ورىن العان.
– جەر سىلكىنىسىنەن زاقىمدانعان ءتورت نىساننىڭ ەكەۋى – جاڭا, ەكەۋى – ەسكى عيمارات. ونداعى سىزات العان قابىرعالار مەن تۇسكەن كافەلدەر سالعان مەردىگەرلەردىڭ كومەگىمەن جاقىن ارادا قايتا قالپىنا كەلتىرىلەدى, – دەدى كەگەن اۋداندىق اۋرۋحاناسىنىڭ ديرەكتورى الماس تىلەۋليەۆ.
ەلدىڭ ۇرەيىن تۋدىرعان جەر سىلكىنىسىنەن وڭىردەگى 17 ءبىلىم وشاعى ب ۇلىنگەنى بەلگىلى بولدى. اسىرەسە ەڭبەكشىقازاق اۋدانىنا قاراستى قايىپوۆ اۋىلىنداعى ورتا مەكتەپتىڭ قابىرعاسى 10 سم شاماسىندا اجىراپ, ۇلكەن جارىقتار پايدا بولعان. ەسكى دەۋگە كەلمەيتىن نىسان 2015 جىلى قولدانىسقا بەرىلگەن. مەملەكەتتىك باعدارلامامەن سالىنعان مەكەمەگە الماتى وبلىستىق توتەنشە جاعداي باسقارماسى مەن جەرگىلىكتى اكىمدىك تەكسەرىس جۇرگىزىپ, ورىن العان جاعدايدى انىقتادى.
جەر سىلكىنىسى سالدارىنان پايدا بولعان ءبىلىم وشاقتارىنداعى اقاۋلار تۋرالى بىلمەككە وبلىستىق ءبىلىم باسقارماسىنىڭ ءباسپاسوز قىزمەتىنە حابارلاسقان ەدىك. الايدا ماردىمدى جاۋاپ الا المادىق.
ال جەر سىلكىنىسىنەن سوڭ انىقتالعان مادەنيەت نىساندارىنىڭ جاي-كۇيىنە كەلەر بولساق, رايىمبەك اۋدانىنداعى تەكەس, قاينار, سارىباستاۋ, سۇمبە اۋىلدىق مادەنيەت ۇيلەرىنىڭ قابىرعالارى جارىلىپ, ايتارلىقتاي زارداپ شەككەن. سونداي-اق ىرگەتاسى 1965 جىلى قالانىپ, 2013 جىلى كۇردەلى جوندەۋدەن وتكەن جامبىل اۋداندىق مادەنيەت ءۇيى مەن 2007 جىلى پايدالانۋعا بەرىلگەن اققاينار اۋىلدىق مادەنيەت ۇيىنە زاقىم كەلگەن. جەر سىلكىنىسى ۇيعىر اۋدانىنداعى ەكى اۋىلدىڭ جانە ەڭبەكشىقازاق اۋدانىنداعى 4 اۋىلدىڭ مادەنيەت وشاقتارىنا اجەپتاۋىر زالالىن تيگىزگەن.
وسىعان وراي الماتى وبلىسى توتەنشە جاعدايلاردىڭ الدىن الۋ جانە ولاردى جويۋ جونىندەگى كوميسسيانىڭ جوسپاردان تىس وتىرىسى ءوتتى. وعان وبلىستىق كوميسسيا مۇشەلەرى, اۋدان جانە قالا اكىمدەرى, اۋداندىق جانە قالالىق بولىمدەردىڭ, باسقارمالاردىڭ باسشىلارى, وبلىستىق توتەنشە جاعدايلار دەپارتامەنتىنىڭ وكىلدەرى قاتىستى.
– اتالعان كوميسسيا وتىرىسى بويىنشا وبلىستىق توتەنشە جاعدايلار دەپارتامەنتىنە, باسقارمالارعا, اۋداندار مەن قالا اكىمدىكتەرىنە ءوز باعىتتارى بويىنشا ناقتى تاپسىرمالار بەرىلىپ, مەرزىمدەرى بەكىتىلدى. وبلىس بويىنشا توتەنشە جاعدايلاردىڭ الدىن الۋعا جوسپارلانعان ءىس-شارالار باقىلاۋعا الىندى. اسىرەسە جەر سىلكىنىسى بويىنشا سەيسميكالىق وقۋ-جاتتىعۋلار ۇزدىكسىز جۇرگىزىلەدى, – دەدى وبلىس اكىمىنىڭ ورىنباسارى نۇرجان قۇدايبەرگەنوۆ.
اپات ايتىپ كەلمەيدى. وسى جولعى جەر سىلكىنىسى ادامداردىڭ توتەنشە جاعدايلارعا دايىن ءجۇرۋىن, دابىل سومكەسى بولۋىن, ەڭ باستىسى, سابىر ساقتاۋ قاجەتتىگىن ساناعا سىنالاعانداي بولدى.
الماتى وبلىسى
