التىنشى رەت. قازاق كۇرەسىنەن قۇرلىق چەمپيوناتى ءوتتى

الەمنىڭ 5 قۇرلىعىنداعى 40-تان استام مەملەكەتتە ءتول كۇرەسىمىزدەن فەدەراتسيالار اشىلعان. بۇگىنگە دەيىن 10 الەم چەمپيوناتى, 12 ازيا چەمپيوناتى, 6 الەم كۋبوگى جانە 5 ەۋروپا چەمپيوناتى ءوتىپ, ءتول كۇرەسىمىز قارقىندى دامىپ جاتىر. بۇدان بولەك يران مەن برازيليادا كادەتتەر مەن جاستار اراسىندا الەم چەمپيوناتتارى, وڭتۇستىك افريكادا 2 افريكا بىرىنشىلىگى, برازيليادا وڭتۇستىك امەريكا چەمپيوناتى ۇيىمداستىرىلدى. ال Qazaq Kuresi اسسوتسياتسياسىنىڭ ازەربايجاندا ۇيىمداستىرعان بۇل جولعى الامان جارىسقا قاتىسۋعا نيەت بىلدىرگەن ەلدەردىڭ دە سانى از بولمادى.

«Sarhadchi» سپورت كەشەنىندە جالاۋىن كوتەرگەن بايراقتى جارىستى العىسوزبەن اشقان UWW كونگرەسى بيۋروسىنىڭ مۇشەسى, ءداستۇرلى كۇرەس تۇرلەرى كوميتەتىنىڭ پرەزيدەنتى روديكا ماريا ياكشي حانىم ەۋروپا چەمپيوناتىنىڭ قازاق كۇرەسىن دامىتۋداعى ءرولىن اتاپ ءوتىپ, جارىس قاتىسۋشىلارىنا ساتتىلىك تىلەدى.

سالتاناتتى ءىس-شارا بارىسىندا ءسوز العان Qazaq Kuresi اسسوتسياتسياسىنىڭ باس ديرەكتورى دامير بەكبوسىنوۆ اتالمىش چەمپيوناتتىڭ ماڭىزى جوعارى ەكەنىن ايتتى.

«قازاق كۇرەسى ەۋرازيا قۇرلىعىنداعى بارلىق ءداستۇرلى كۇرەس تۇرلەرىنىڭ سينتەزىنىڭ ناتيجەسى بولىپ تابىلادى. ءتول كۇرەسىمىز – قازاق حالقىمەن ءبىرتۇتاس, ۇلت تاريحىنىڭ اجىراماس بولىگى. كۇرەستىڭ بۇل ءتۇرى ارقاشان وسكەلەڭ ۇرپاقتى تاربيەلەۋدىڭ ماڭىزدى قۇرالدارىنىڭ ءبىرى بولدى جانە بولىپ قالا بەرمەك. كەزەكتى ەۋروپا چەمپيوناتىنىڭ ازەربايجان ەلىندە ءوتىپ جاتقانىنا قۋانىشتىمىز. جارىستى جوعارى دەڭگەيدە ۇيىمداستىرۋعا اتسالىسقان جەرگىلىكتى قازاق كۇرەسى فەدەراتسياسىنىڭ باسشىلىعى مەن ۇجىمىنا العىسىمدى بىلدىرەمىن. بۇل چەمپيوناتتىڭ الەمدىك ارەنادا قازاق كۇرەسىنىڭ ودان ءارى قانات جايۋىنا تىڭ سەرپىن بەرەتىنىنە سەنىمدىمىن», دەدى د.اسەنعازى ۇلى.

دامير بەكبوسىنوۆ UWW وكىلدەرى مەن جەرگىلىكتى فەدەراتسيانىڭ باسشىلىعىنا قازاقستاننان جەتكىزىلگەن ارنايى كادەسىيلاردى, ال ازەربايجان ۇلتتىق سپورت اسسوتسياتسياسىنىڭ پرەزيدەنتى كازىم كۋربانوۆقا Qazaq Kuresi اسسوتسياتسياسىنىڭ پرەزيدەنتى ءارى تۋريزم جانە سپورت مينيسترلىگى سپورت جانە دەنە شىنىقتىرۋ كوميتەتىنىڭ توراعاسى ەربول مىرزابوسىنوۆتىڭ العىس حاتىن تابىستادى.

2022 جىلى استانا قالاسىندا ءۇش جاس توبىن (ەرەسەكتەر, جاستار, جاسوسپىرىمدەر) قامتىعان تۇڭعىش الەم چەمپيوناتى وتكەن بولاتىن. سول بىرىنشىلىككە 40-قا جۋىق مەملەكەتتىڭ بالۋاندارى قاتىسىپ, جارىس كورىگىن قىزدىرعان ەدى. سول ءدۇبىرلى دودادا سىنالعان بىرقاتار بالۋانداردىڭ بۇگىنگى ەۋروپا چەمپيوناتىندا ەرەكشە دايىندىقپەن كەلگەنى انىق بايقالدى. وسى باسەكەلەردى باسىنان اياعىنا دەيىن تاماشالاعان لاۋازىمدى تۇلعالار, قۇرمەتتى مەيماندار, باپكەرلەر مەن سپورتشىلار جانە قاتارداعى قاراپايىم كورەرمەندەر قارت كاسپي جاعاسىنداعى چەمپيوناتتىڭ ۇيىمداستىرىلۋ دەڭگەيىنە جوعارى باعاسىن بەرگەنى ءسوزسىز.

ەندىگى كەزەكتە ەۋروپا چەمپيوناتىنىڭ قورىتىندىسىنا كەلەر بولساق, تارتىسقا تولى بەلدەسۋلەردە توپ جارعان بالۋاندار قارجىلاي سىياقىمەن ماراپاتتالدى.

ەۋروپا چەمپيوناتىنىڭ دەمەۋشىسى – Sport Qory cپورتتى قولداۋ قورى.