الەمدەگى ەڭ الىپ كرۋيزدىك كەمە جولعا شىقتى

لاينەردى «Royal Caribbean» كومپانياسى باسقارادى. كەمەنىڭ جوباسى 2016 جىلى قازاندا باستالعان-تۇعىن. ال 2021 جىلى «Meyer Turku» كومپانياسى ونى قۇراستىرۋ جۇمىستارىنا قىزۋ كىرىستى. لاي­نەر­دىڭ الىپتىعى سونشالىق, بيىكتىگى ەيفەل مۇناراسىنان دا ۇلكەن. ۇزىندىعى 365 مەترگە جەتەدى. سالىستىرۋ ءۇشىن ايتساق, بۇل – ەڭ ۇلكەن ءۇش فۋتبول الاڭىنا تەڭ.

«Icon of the Seas» مۇحيتتا جۇزگەن قالا سەكىلدى. ونىڭ 20 پالۋباسى بار. شامامەن, جەتى مىڭعا جۋىق جولاۋشى مەن ەكيپاج مۇشەسى سىيا­دى. سالماعى 250 مىڭ توننادان اسادى. الەمگە ايگىلى «تيتانيك» لاينەرىنەن بەس ەسە ۇلكەن. كەمەدە جولاۋشىلار بوس ۋاقىتىن كوڭىلدى وتكىزۋ ءۇشىن بارلىق جاعداي جاسالعان. ماسەلەن, «كوڭىلدى ارال» دەپ اتالاتىن لاينەرلەردە ورنالاسقان ەڭ الىپ اكۆاپارك بار. سونداي-اق بۇعان 17 مەترلىك سارقىراماسىن قوسىڭىز.

«Royal Caribbean» كومپانياسىنىڭ پرەزيدەنتى دجەيسون ليبەرتيدىڭ ايتۋىنشا, «Icon of the Seas» – الەمدەگى ەڭ الىپ, كەرەمەت كەمە. دەگەنمەن كومپانيا الداعى جىلداردا ودان دا ۇلكەن لاينەرلەر جاساۋدى جوسپارلاپ وتىر. «Icon of the Seas» – وسى سەريا بويىنشا قۇراستىرىلعان العاشقىسى. وسى ورايدا, ساراپشىلار فلوريدادان جولعا شىققان «تەڭىز قالاسى» كرۋيز تۋريزمىنە تىڭ سەرپىن بەرەتىنىن العا تارتادى. مۇنىڭ بىرنەشە سەبەبى بار.

بىرىنشىدەن, كرۋيز كەمەلەر ارقىلى ساپارعا شىعىپ, الەم ارالاۋدىڭ قورشاعان ورتاعا تيگىزەر زيانى وراسان. ماسەلەن, تازا ەكولوگيانى جاقتايتىن ۇيىمدار جۇرگىزگەن زەرتتەۋلەرگە سۇيەنسەك, ءبىر اپتا كرۋيزدە دەمالۋ كەزىندە بولى­نەتىن پارنيكتى گازدار كولەمى ۇشاقپەن با­رىپ, قوناق ۇيدە توقتاۋعا قاراعاندا سەگىز ەسە كوپ. سوندىقتان كرۋيزدىك ساياحاتقا قىرىن قاراي­تىندار جەتەرلىك.

ەكىنشىدەن, «Icon of the Seas» سۇيىتىلعان گاز تۇتىنادى. «Royal Caribbean» كومپانياسى لاينەردىڭ وسى ەرەكشەلىگىن العا تارتىپ, ونى «ەڭ تازا وتىن» دەپ سيپاتتادى. بىراق بۇعان كەلىسپەيتىندەر بار. حالىقارالىق تازا كولىك كەڭەسىنىڭ تەڭىز باعدارلاماسىنىڭ ديرەكتورى برايان كومەر مۇنداي وتىندى پايدالانۋدى كوزبوياۋشىلىققا بالايدى.

«سۇيىتىلعان گازدى تۇتىنامىز دەگەنگە ەرەكشە باسىمدىق بەرەدى. الايدا ءبىر ساپار كەزىندە جۇمسالاتىن سۇيىتىلعان گازدان بولىنەتىن شىعارىلىم قاراپايىم تەڭىز كەمەلەرى قولداناتىن وتىننان بولىنەتىن زيان­دى قالدىقتاردان 70-80 پايىزعا كوپ. «Icon of the Seas»-دە الەمدەگى ەڭ ۇلكەن سۇيى­تىلعان گاز تسيستەرنالارى ورناتىلعان. وسىلايشا, كوزبوياۋشىلىققا بارىپ وتىر», دەيدى ب.كومەر.

ساراپشى جالپى سۇيىتىلعان گازدىڭ باسقا تەڭىز كولىكتەرىندە قولدانىلاتىن وتىن­دار­عا قاراعاندا كومىرقىشقىل گازىن ءتورت ەسە از بولەتىنىنە كەلىسەدى. بىراق كرۋيزدەگى سۇيىتىلعان گاز «مەتاننىڭ ءبولىنۋى» دەپ اتالاتىن ەرەكشەلىككە بايلانىستى كوبىرەك قالدىق شىعارادى. ياعني گاز جانۋدىڭ ورنىنا سول كۇيىندە اۋاعا تارايدى. وزدەرىڭىزگە ءمالىم, مەتان كومىرقىشقىل گازىنا قاراعاندا قورشاعان ورتاعا الدەقايدا زياندى. ماسەلەن, اتموسفەراداعى مەتان CO2-گە قاراعاندا 80 ەسە كوپ جىلۋدى ۇستايدى.

«Royal Caribbean» ۆيتسە-پرەزيدەنتى نيك روۋزدىڭ ايتۋىنشا, «Icon of the Seas» جوباسى باستالعاندا سۇيىتىلعان گاز كەڭ كولەم­دە قولدانۋعا بولاتىن وتىن ءتۇرى رەتىن­دە سا­نال­عان. ء«بىز ونى كەمە ديزاينىنا يكەمدىلىك ورناتۋعا كومەكتەسەتىن وتپەلى وتىن دەپ سا­نايمىز. سونىمەن قاتار نارىق دامىپ, باسقا دا اۋقىمدى بالامالار ەنگىزىلگەن كەزدە وتىن­نىڭ ءارتۇرلى تۇرلەرىنە وڭاي بەيىمدەلۋگە مۇمكىندىك بەرەدى», دەيدى ن.روۋز.

تاعى ءبىر ايتا كەتەرلىگى, «Icon of the Seas» قولدانىلعان سۋلاردى تازارتۋعا ارنال­عان جە­تىل­دىرىلگەن تازارتۋ جۇيەسىمەن جاب­دىق­تال­عان. كەمەدەگى تۇششى سۋدىڭ 93 پايىزدان استامى سۋدان لاستاۋشى زاتتاردى كەتىرەتىن كەرى وسموس جۇيەسى ارقىلى بورتتا وندىرىلەدى.