“چتو سكاجەتە؟” ارناسىنا سۇحبات بەرگەن ول قارىنداسىنىڭ قۋاندىق بيشىمباەۆپەن قالاي تانىسقانىن دا جەتكىزدى.
- سالتاناتتىڭ ايتۋىنا قاراعاندا, ولار سالتاناتتىڭ كونسۋلتاتسياسى بارىسىندا تانىسقان. نەگىزى سالتانات ەر ادامداردى قابىلدامايتىن. بىراق بيشىمباەۆ سالتاناتتىڭ سۋرەتىن كورىپ قالىپ, ينستاگرام ارقىلى جازىپ, كونسۋلتاتسيا ءوتىڭىز دەپ قويماي قويعان. بيشىمباەۆ بويبەرمەي ءجۇرىپ, باسىندا ونلاين كەيىن وفلاين كونسۋلتاتسياعا كەلىسكەن. سوسىن سالتاناتقا كوڭىلىن بىلدىرە باستاعان. ءبىز سالتانات ەكەۋىمىز جاقىن ەدىك. بىراق ونىڭ تۇرمىسقا شىعامىن دەگەنى مەنى تاڭقالدىردى. ءبىرىنشى وتباسىمەن, مەنىمەن تانىستىرۋ كەرەك قوي دەپ ءبىرتۇرلى بولىپ قالعانمىن. ويتكەنى سالتانات بۇلاي جىلدام شەشىم قابىلدامايتىن. بيشىمباەۆ ەكى ايدان كەيىن ۇيلەنۋگە ۇسىنىس جاسادى. ءبىز جاي عانا كوڭىل ءبىلدىرىپ جۇرگەن شىعار دەپ ءمان بەرمەدىك, كۇيەۋى بولادى دەپ ويلامادىق. بۇل ءوزىنىڭ شەشىمى بولدى. سالتانات وعان عاشىق ەدى, – دەيدى نۇكەنوۆانىڭ اعاسى.
نۇكەنوۆانىڭ اعاسى سالتانات تۇرمىسقا شىققاننان كەيىن بارلىعىنان الىستاپ كەتكەنىن ايتتى.
- ولار وتباسى قۇرعاننان كەيىن سالتانات ەكەۋمىز ءۇيىمىز جاقىن بولعانىنا قاراماستان, سيرەك كەزدەسە باستادىق. ونىڭ ۇنەمى ۋاقىتى بولمايتىن. بۇعان قاتتى ءمان بەرمەگەن ەدىم. سالتاناتتى وسىلايشا وتباسىنان, تۋعاندارى مەن جاقىندارىنان الشاقتاتا باستادى. مەن وتباسىمىنىڭ بارلىق مۇشەلەرى ءۇشىن گەولوكاتسيا قوسىپ قويعانمىن. بىراق سالتاناتتىڭ گەولوكاتسياسىن سوڭعى ءبىر جىلدا ۇنەمى باقىلاپ وتىراتىنمىن, – دەيدى ايتبەك امانگەلدى.
سالتانات نۇكەنوۆا مەن بيشىمباەۆ ءبىر رەت ايىرىلىسىپ, قايتا قوسىلعان كورىنەدى.
- سالتانات قۋاندىقپەن ايىرىلىسىپ, ءوزى بولەك پاتەرگە شىعىپ, ءوز ءومىرىن قايتا قۇرامىن دەدى. بارلىعى جاقسى بولاتىن. بىراق 26 قازان كۇنى سالتانات قوسىلدىق, نەكەمىزدى تاعى قيدىق دەپ سۋرەت جىبەردى. ءبىز قاتتى تاڭقالدىق. سالتانات تاعى ءبىر رەت مۇمكىندىك بەرەمىن دەپ شەشىپتى. قۋاندىقتىڭ وتباسىندا قولداۋ جوق, ءبىر-بىرىنە جاقىن ەمەس دەپ سالتانات ونى اياپ جۇرەتىن. ونى مەن عانا تۇسىنەمىن, ايايمىن, قولدايمىن دەيتىن. كەتىپ قالسام, مەنسىز نە ىستەيدى دەپ ويلايتىن, – دەيدى ول.
ايتبەك امانگەلدى بيشىمباەۆتىڭ بۇل ارەكەتىنىڭ كەزدەيسوق بولماعانىن ايتتى.
- بيشىمباەۆ سالتاناتتى جاقىندارىنان الشاقتاتىپ, ادامدارمەن ارالاسۋىنا رۇقسات بەرمەيتىن. بۇل كەزدەيسوق جاعداي دەپ ويلامايمىن. مەن بيشىمباەۆتان قاندايدا ءبىر اۋىتقۋ بايقامادىم. تەرگەۋ كەزىندە, وقيعا بارىسىندا ول ەسىن ءبىلدى. تاماق تاپسىرىس بەرىپ, جان-جاقتا بولىپ جاتقاننىڭ بارلىعىن باقىلاپ وتىرعان. مەن پسيحولوگ ەمەسپىن, بىراق ول ەسىن ءبىلىپ, بارلىعىن سانالى تۇردە جاساعان دەپ ويلايمىن, – دەيدى ايتبەك امانگەلدى.
