امانگەلدى سەمبين – ماسكەۋ كونسەرۆاتورياسىنىڭ ۆوكالدىق ءبولىمىن تامامداعاننان كەيىن 1973-1975 جىلدارى يتاليانىڭ ميلان قالاسىنداعى «لا سكالا» وپەرا تەاترىندا تاجىريبەدەن ءوتتى. الەمگە تانىمال ونەر تارلاندارىنىڭ وڭ باعاسىن الدى. ءسويتىپ, ونىڭ ەسىمى «لا سكالا» ساحناسىندا ءان شىرقاعان تۇڭعىش قازاق رەتىندە تاريحتا قالدى. ەلگە ورالعان سوڭ دارىندى ونەر يەسى قازاق اكادەميالىق وپەرا جانە بالەت تەاترىنىڭ جەكە ءانشىسى بولدى. ە.برۋسيلوۆسكيدىڭ «قىز جىبەگىندە» – تولەگەندى, ا.جۇبانوۆ پەن ل.ءحاميديدىڭ «ابايىندا» – ايداردى, م.تولەباەۆتىڭ ء«بىرجان – ساراسىندا» – ءبىرجاندى, س.مۇحامەدجانوۆتىڭ «جۇمباق قىزىندا» – اداق جانە تاعى باسقا پارتيالاردى كەلىستىرىپ ورىندادى. سونىمەن بىرگە ءبىرتۋار ءانشى «اينامكوز», «اقباقاي», «بالقۋراي», «بۋرىلتاي», «قارعاش», ء«شاپيباي-اۋ» اتتى حالىق اندەرىن ناقىشىنا كەلتىرىپ شىرقادى. ا.سەمبين ءبىراز جىل الماتى تەاتر-كوركەمسۋرەت ينستيتۋتىندا ۇستازدىق قىزمەت اتقارىپ, يتاليا-قازاقشا مۋزىكالىق تەرمين سوزدىگى, «ساز سوزدىگى», ء«ان باعدارلاماسى», ء«ان الىپپەسى» سەكىلدى ادىستەمەلىك وقۋ قۇرالدارىن جازدى.
اسەم ساز اۋەلەگەن كەشتە تەنور انشىلەر ارتۋر عابديەۆ, قۋانىش مۇحاماديەۆ عاجايىپ داۋىس يەسى ورىنداعان حالىق اندەرىمەن بىرگە س.راحمانينوۆ, ن.ريمسكي-كورساكوۆ, پ.توستي, پ.موسكاني جانە تاعى باسقا ايتۋلى كومپوزيتورلاردىڭ رومانستارىن تىڭدارمانعا جەتكىزە ءبىلدى. كونتسەرتمەيستەر ءزارۋ جازىقباەۆانىڭ دا ەڭبەگىن ەرەكشە ايتا كەتەيىك. كلاسسيكالىق مۋزىكاعا سۋساعان كورەرمەن ولارعا ءدان ريزا بولىپ, قوشەمەت كورسەتتى.
