توراعا ورىنباسارى ەلىمىزدىڭ ايەلدەر قۇقىقتارىن قورعاۋ جانە گەندەرلىك تەڭدىك ماسەلەلەرىن ىلگەرىلەتۋ سالاسىندا ايتارلىقتاي ناتيجەگە قول جەتكىزگەنىن اتاپ ءوتتى. گەندەرلىك ساياساتتىڭ ۇلتتىق ۇلگىسى, قۇقىقتىق بازا جانە ادام قۇقىقتارىن قورعاۋ تەتىگى جاسالدى.
«مەملەكەت باسشىسى جۇرگىزىپ وتىرعان الەۋمەتتىك جاڭعىرتۋداعى نەگىزگى باعىتتاردىڭ ءبىرى – ەلىمىزدە گەندەرلىك تەپە-تەڭدىككە قول جەتكىزۋ, ايەلدەردىڭ ساياسي, ەكونوميكالىق جانە الەۋمەتتىك ومىرگە بەلسەندى قاتىسۋىنا تەڭ مۇمكىندىكتەر جاساۋ. سايلاۋداعى پارتيا تىزىمدەرىنە, سونداي-اق دەپۋتاتتىق مانداتتاردى ءبولۋ كەزىندە ايەلدەرگە, جاستارعا جانە مۇگەدەكتىگى بار ادامدارعا زاڭنامالىق دەڭگەيدە 30% كۆوتا ەنگىزىلدى. بۇگىنگى تاڭدا ەلىمىزدىڭ جوعارى وكىلدى ورگانى – قازاقستان پارلامەنتىندە 31 ايەل بار, ول جالپى دەپۋتاتتار سانىنىڭ 21%-ىن قۇرايدى. ونىڭ ىشىندە سەناتتىڭ 24%-ى, ءماجىلىستىڭ 19%-ى ايەلدەر», دەدى ولگا پەرەپەچينا.
كەزدەسۋگە قاتىسۋشىلار ادام الەۋەتىن دامىتۋ مەن تەڭدەي قاتىسۋ, ءتيىمدى ينستيتۋتتار, ادام قۇقىقتارى مەن گەندەرلىك تەڭدىك, سونداي-اق ينكليۋزيۆتى ەكونوميكالىق ءوسۋ مەن ەكولوگيالىق تۇراقتىلىق سالاسىنداعى ىنتىماقتاستىقتى ودان ءارى دامىتۋ ماسەلەلەرىن تالقىلادى.
ولگا پەرەپەچينا تۇراقتى دامۋ سالاسىنداعى ۇلتتىق ماقساتتار مەن مىندەتتەردىڭ ىسكە اسۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ وتىرىستارى تۋرالى ايتىپ بەردى. وندا دەنساۋلىق ساقتاۋ مەن ءبىلىم بەرۋدىڭ ساپاسىن كوتەرۋ جانە ەكولوگيانى قامتاماسىز ەتۋ ماسەلەلەرى قارالدى.
نيك حارتمانن ءوز كەزەگىندە قازاقستاندا جۇرگىزىلىپ جاتقان قوعامدىق-ساياسي وزگەرىستەردى جوعارى باعالاپ, بارلىق باعىتتاعى ىنتىماقتاستىق اياسىن كەڭەيتۋگە نازار اۋداردى.
