فوتو: el.kz
وبلىستىق پوليتسيا دەپارتامەنتىنىڭ باسشىسى, پوليتسيا پولكوۆنيگى نۇرحات ورازباەۆتىڭ ايتۋىنشا, 28 كولىك «كيبەر-شەريف» قۇرىلعىسىمەن جابدىقتالعان. پوليتسەيلەرگە ارنالعان كولىككە ورناتىلعان جاڭا جۇيەنىڭ بىرنەشە ارتىقشىلىعى بار.
«بىرىنشىدەن, جول ەرەجەسىن بۇزىپ, قاۋىپ توندىرەتىن جۇرگىزۋشىلەردى انىقتاۋعا, ولاردى اۆتوماتتى تۇردە جاۋاپكەرشىلىككە تارتۋعا مۇمكىندىك بەرەدى. ەكىنشىدەن, قۇرىلعىنىڭ بەينەكامەراسى 360 گرادۋستاعى كورىنىستى باقىلاپ, ءبىر مەزگىلدە 50 اۆتوكولىكتى قاداعالاي الادى. ۇشىنشىدەن, جىلدامدىقتى شەكتەن تىس اسىرۋ, قارسى باعىتقا شىعۋ, كورىنبەيتىن مەملەكەتتىك تىركەۋ ءنومىر تاعۋ, ۇرلانعان نەمەسە بورىشكەرلەر جۇرگىزگەن كولىكتى اۆتوماتتى تۇردە انىقتايدى. ەڭ باستىسى, قۇقىق بۇزۋشىلىق دەرەكتەرى پوليتسيا قىزمەتكەرلەرىنىڭ قاتىسۋىنسىز, اۆتوماتتى تۇردە بازاعا تۇسەدى. ال ەلەكتروندى حاتتاما تۋرالى قاۋلى 1 اپتا ىشىندە كولىك يەلەرىنىڭ مەكەنجايلارىنا جولدانادى», دەيدى ن.ورازباەۆ.
ونىڭ ايتۋىنا قاراعاندا, «كيبەر-شەريف» بورتتىق اپپاراتتىق كەشەنى بار كولىكتەر اتىراۋ قالاسىنداعى, رەسپۋبليكالىق ماڭىزى بار جانە «اتىراۋ – يندەر», «ساعىز – ميالى», «قۇلسارى – تەڭىز» باعىتىنداعى جولداردى باقىلايتىن ارنايى پاترۋلدىك قىزمەتكەرلەرگە بەرىلدى. ءتارتىپ ساقشىلارى جاڭا كولىكتەگى قۇرىلعىنى 1 اقپانعا دەيىن سىناقتان وتكىزەدى.
اتىراۋ وبلىسى
