سۋرەتتە: قاراساز اۋىلىنداعى «مۇزتاۋ», مىنە, وسىنداي!
«بيىلعى جىلى قاراساز اۋىلىنان بيىكتىگى 16 مەترگە جەتەرلىك «مۇزتاۋ» پايدا بولدى. بۇعان وسى وڭىردەگى اۋىل تۇرعىندارى تۇگەل قۋانىپ, قىس قىزىعىنا كەنەلدى. قاراساز اۋىلىنا ءۇش ارتەزياننان اۋىز سۋ تارتىلعان. قىسىم جوعارى بولىپ, قىستى كۇنى جارىلىپ كەتپەس ءۇشىن ارتىق سۋدى سىرتقا ءبولۋ ارقىلى وسىنداي «مۇزتاۋ» جاساۋدىڭ ورايى كەلدى. وعان اۋىلدىڭ بەلسەندى ازاماتتارى اتسالىستى», دەيدى قاراساز اۋىلدىق وكرۋگىنىڭ اكىمى ديدار نۇربول ۇلى.
قاراساز اۋىلىندا 3 مىڭعا جۋىق ادام تۇرادى. تۇزكول اۋىلى دا وسى وكرۋگتىڭ اۋماعىندا ورنالاسقان. كوپتىڭ كوزايىمىنا اينالعان «مۇزتاۋعا» رايىمبەك اۋدانىنىڭ عانا ەمەس, ەندىگى كەزەكتە كەگەندىكتەر دە كەلە باستاعان. ەكى اۋداننىڭ بىرلەسكەن ءىس-شارالارىن وتكىزۋ جوسپارلانعان. سونىمەن قاتار مەكەمەلەر مەن ەڭبەك ۇجىمدارى دا باس قوسىپ, قىس مەزگىلىنىڭ قىزىقتارىن ءماندى وتكىزۋدە جۇدىرىقتاي جۇمىلا باستاعان. وسىنداي يگى ءىستىڭ باستاۋىنا اينالعان «مۇزتاۋ» ماڭىنان سىرعاناققا قارىق بولعان بالالاردىڭ كۇمىس كۇلكىسىن ەستىپ, قۋانىشتى ساتتەرىن كورۋگە بولادى.
جۋىردا وسى وڭىردە كومىر تاسىمالداۋشى ازاماتتاردىڭ ۇيىتقى بولۋىمەن شالكودە, تۇزكول, قوشقار, قاراساز اۋىلدارىنىڭ تۇرعىندارى باس قوسىپ, بىرلەسكەن ءىس-شارا وتكىزگەن. «مۇزتاۋ» ماڭىنداعى قىس قىزىقتارى مۇنىمەن بىتپەك ەمەس.
ء«ساتتى باستالعان «مۇزتاۋ» الاڭىندا شاڭعىشىلار, كونكيمەن, شانامەن سىرعاناۋشىلار جارىستارىن ۇيىمداستىرۋدى جوسپارلاپ وتىرمىز. كەلەشەكتە ىرگەسى كەڭەيىپ, كەلۋشىلەرگە جاعداي جاساۋدى ويلاستىرۋدامىز. اۋىل – ءبارىمىزدىڭ ورتاق ءۇيىمىز بولعاندىقتان, بۇل ىستە ازاماتتار ايانىپ قالمايدى», – دەيدى اۋىل اكىمى ديدار نۇربول ۇلى.
الماتى وبلىسى
