اۋىلعا سوڭعى 5 جىلدا 2,4 ملرد تەڭگە قاراجات قارالىپتى. وسى اقشانىڭ 1,3 ملرد تەڭگەسى مەملەكەتكە قول جايماي, تۋعان توپىراعىن تۇلەتكەن مەتسەنات, قازاقستاننىڭ ەڭبەك ەرى يمامزادا شاعىرتاەۆتىڭ دەمەۋشىلىگى ەسەبىنەن بولىنگەن. تۇرعىنداردى تۇراقتى جۇمىسپەن قامتىپ كەلە جاتقان كاسىپكەر ازاماتتاردى يگىلىككە جۇمىلدىرىپ, اۋىلىن اجارلاندىرىپ وتىر.
ەلدى مەكەندەگى 120 ورىندىق «تاڭ بوبەگى» بالاباقشاسى, سپورت كەشەنى, اۋىلعا كىرەتىن جول بويىنداعى جارىق شامدار, بۇگىندە ءونىم شىعارىپ جاتقان ەت وڭدەۋ تسەحى – وسى «تاڭ LTD» كومپانياسىنىڭ تارتۋى. ون ءۇش جىلدان بەرى ۇزدىك ناتيجە كورسەتكەن ديقاندار مەن مەحانيزاتورلارعا بىرنەشە اۆتوكولىك, 300 ملن تەڭگە قارجىلاي سىياقى بەرگەن شارۋاشىلىق تا وسى. اۋىلدىڭ 250-دەن استام ادامىن جۇمىسپەن قامتىعان سەرىكتەستىك اكىمدىكپەن بىرلەسىپ تۇرعىنداردىڭ باۋ-باقشا ەگۋى ءۇشىن 60 گەكتار جەر ۇلەستىرگەن.
وتكەن جىلى تاڭ اۋىلىنداعى بىرقاتار الەۋمەتتىك نىساندار مەن اۆتوموبيل جولدارىن جوندەۋگە جوبا-سمەتالىق قۇجاتتار ازىرلەنىپ, بيۋدجەت ەسەبىنەن قارجىلاندىرۋعا ۇسىنىلىپتى. بيىل 4 جوباعا وبلىستىق بيۋدجەتتەن 813,9 ملن تەڭگە بولىنگەن. مادەنيەت ءۇيىن كۇردەلى جوندەۋدىڭ جوبا-سمەتالىق قۇجاتتاماسى مەن ەسكيزدىك جوباسىن ازىرلەۋگە الماتى, تۇركىستان قالالارىنان تاجىريبەلى ساۋلەتشى ماماندار قاتىسىپ وتىر. جوبا قۇنى – 377,4 ملن تەڭگە. جاريالاعان مەملەكەتتىك ساتىپ الۋ كونكۋرسىنىڭ جەڭىمپازى جۋىردا انىقتالادى.
اۋىل تىرلىگىن تۇلەتە ءتۇسۋ ءۇشىن «تاڭ-جاڭاقونىس» اۆتوموبيل جولىن قايتا جاڭعىرتۋعا – 287,6 ملن, «تاڭ-سامۇرات» اۆتوموبيل جولىن قايتا جاڭعىرتۋعا – 118,8 ملن, قوسىمشا سۋ كوتەرۋ ۇڭعىماسىن قايتا قازۋعا 30 ملن تەڭگە بولىنگەن. بۇل جوبالاردىڭ مەملەكەتتىك ساتىپ الۋ راسىمدەرى جۇرگىزىلۋ ۇستىندە. اۋىلعا كىرەبەرىستەگى «بوزارىق» كانالى كوپىرىن قايتا جاڭعىرتۋعا جانە 4 كوشەنى جارىقتاندىرۋعا جوبا-سمەتالىق قۇجاتتاما ازىرلەنىپ, بيۋدجەتتىك ءوتىنىم جولدانىپتى. ىشكى كوشەلەردى جوندەۋ جۇمىستارى اۋداندىق بيۋدجەت ەسەبىنەن ىسكە اسىرىلاتىن بولادى. قازىرگى ەلدى مەكەندەردە بەيبەرەكەت سالىنعان قۇرىلىستار جوقتىڭ قاسى دەۋگە بولادى. اۋىلدان تۇسەتىن وندىرىستىك عيماراتتار مەن «تاڭ LTD» جشس دەمەۋشىلىگىمەن سالىناتىن جاڭا تۇرعىن ۇيلەردىڭ ورىندارى بەلگىلەنىپ, ەسكيزدىك جوباعا ەنگىزىلىپ قويدى.
وڭىردە «اۋىلدىق اۋماقتاردى دامىتۋدىڭ 2023-2027 جىلدارعا ارنالعان تۇجىرىمداماسى» اياسىندا ەلدى مەكەندەردىڭ الداعى جوسپارى, وركەندەۋ مۇمكىندىكتەرى قاراستىرىلىپ وتىر. بىلتىر اۋىل يگىلىگىنە مەملەكەتتىك بيۋدجەتتەن 18 ملرد تەڭگە جۇمسالعان. «اۋىل – ەل بەسىگى» اياسىندا 47 ەلدى مەكەندە 216 جوبانى جۇزەگە اسىرۋعا 12 ملرد 400 ملن تەڭگە بولىنگەن. بيىل وسى باعدارلاما شەڭبەرىندە 11 ملرد تەڭگەنىڭ 67 جوباسى مەجەلەنىپ وتىر.
«اۋىل اماناتى» باعدارلاماسى بويىنشا 3 ملرد تەڭگەنىڭ 404 جوباسى جۇزەگە استى. وسى جىلى 6 ملرد تەڭگەنىڭ 800-دەن استام جوباسى ىسكە اسىرىلماق. جۋىردا وتكەن اۋىلدى دامىتۋ جولدارى پىسىقتالعان ماجىلىستە وبلىس اكىمى نۇرلىبەك نالىباەۆ وتكەن جىلدان باستاپ «ۇلگىلى ەلدى مەكەن» جوباسى اياسىندا جەڭىمپاز 12 ەلدى مەكەنگە زاماناۋي ۇلگىدەگى 29 ارنايى تەحنيكا بەرىلگەنىن اتاپ ءوتتى. بىلتىر 12 اۋىلدىق ەلدى مەكەنگە گاز كىرگىزىلىپ, وسى كۇنى وڭىردە «كوگىلدىر وتىن» يگىلىگىن كورىپ وتىرعان اۋىل سانى 34-كە جەتتى. بيىل 4 ملرد تەڭگەگە تاعى 12 ەلدى مەكەنگە گاز تارتىلادى.
قىزىلوردا وبلىسى
