جاڭا حالىقارالىق لوگيستيكالىق ورتالىق

اتالعان جوبانى «Dostyk Storage» جشس مەملەكەتتىك كىرىستەر كوميتەتىمەن بىرلەسىپ جۇزەگە اسىرعان بولاتىن. كوزدەلگەن نەگىزگى ماقسات – ترانسشەكارالىق لوگيستيكالىق ينفراقۇرىلىمدى دامىتۋ جانە «الاكول» جول وتكەلىنىڭ وتكىزۋ قابىلەتىن ارتتىرۋ. بۇعان دەيىن پرەزيدەنت قاسىم-جومارت توقاەۆ جۇك كولىكتەرىنىڭ قازاقستان – قىتاي شەكاراسى ارقىلى ءوتۋىن جەدەلدەتۋ تۋرالى بىرنەشە رەت ايتقان بولاتىن. بيزنەس پەن ۇكىمەتتىڭ بىرلەسىپ قاتىسۋىمەن جۇكتەردى وتكىزۋ قابىلەتتىلىگىن ارتتىرۋ جانە ونى رەسىمدەۋدى جەدەلدەتۋ شارالارى وسىلايشا جۇزەگە اسىرىلدى.

«جۇكتەردى وڭدەۋ جانە ساقتاۋ ءۇشىن وسىنداي ورتالىقتار اشۋ مەملەكەت باسشىسىنىڭ تاپسىرماسى شەڭبەرىندە جۇزەگە اسىرىلىپ جاتىر. اتالعان ورتالىق ءوز كەزەگىندە شىعىس شەكارامىزداعى العاشقى ورتالىق ءارى «دوستىق» – شىعىس قازاقستان مەن ەۋروپا شەكاراسىنداعى ەڭ وزىق باستاما», دەدى كەشەننىڭ اشىلۋ سالتاناتىندا كولىك ۆيتسە-ءمينيسترى ماقسات قالياقپاروۆ.

«Dostyk Storage» قويماسىنىڭ قۇرىلىسى قىسقا مەرزىمدە جۇزەگە اسىرىلدى. جاڭا قويما كەشەنى «دوستىق» كەدەنىنىڭ «الاكول» كەدەن بەكەتىنىڭ وتكىزۋ قىزمەتىن تاۋلىگىنە 200-دەن 600 جۇك كولىگىنە دەيىن ارتتىرىپ, تاۋلىكتىك جۇك اينالىمىن 4 مىڭنان 12 مىڭ تونناعا دەيىن ۇلعايتادى دەپ كۇتىلەدى. بۇل جۇك اينالىمىن 1 ملن توننادان 3 ملن تونناعا دەيىن جەتكىزەدى. «قازىرگى تاڭدا «الاكول» كەدەن بەكەتى ارقىلى ءبىر باعىتتا نەبارى 180 كولىك وتەدى. بيىل بۇل بەكەتتى جاڭعىرتۋ جۇمىستارىن اياقتاپ, جۇك اعىنىن 500 كولىككە دەيىن ۇلعايتۋدى كوزدەپ وتىرمىز», دەدى قارجى مينيسترلىگى مەملەكەتتىك كىرىستەر كوميتەتىنىڭ توراعاسى جاندوس دۇيسەمبيەۆ.

ايتا كەتەرلىگى, «Dostyk Storage» جشس لوگيستيكالىق ورتالىعى 13,5 گەكتار اۋماقتا ورنالاسقان. ونىڭ 3,5 گەكتارىن ءۇي-جايلارى مەن قويما ينفراقۇرىلىمى الىپ جاتىر. ال 10 گەكتارى جۇك كولىكتەرىن قويۋعا بولىنگەن. جوباعا ارنالعان جەكە ينۆەستيتسيا 2,8 ملرد تەڭگەدەن استام سومانى قۇرادى. كەشەن 3 جىلدىق مەرزىمگە 100 پايىز (قۇرىلتايشىسى مەملەكەتتىك كىرىستەر كوميتەتى) «Nur Zholy customs services» مەملەكەتتىك كاسىپورنىنىڭ باسقارۋىنا بەرىلدى.