وتكەن جىلى اگەنتتىك مەملەكەتتىك قىزمەتكە ىرىكتەۋدى تولىق تسيفرلاندىرۋ ارقىلى «ە-Qyzmet» ينتەگراتسيالانعان اقپاراتتىق جۇيەسىن جاڭعىرتۋ بويىنشا جۇمىستار جۇرگىزدى. «مەملەكەتتىك قىزمەتكە ىرىكتەۋدىڭ جاڭا الگوريتمى 6 مەملەكەتتىك ورگاندا سىناقتان ءوتتى. جاڭا ىرىكتەۋ الگوريتمى ازىرلەنىپ, وندا كونكۋرستىق ءراسىمدى وتكىزۋ فورماتى قايتا قارالدى. بۇل قادام ۇمىتكەرلەرگە الدىن الا بەلگىلەنگەن ۋاقىتتا وتەتىن اڭگىمەلەسۋدەن باسقا بارلىق كەزەڭدە, كەز كەلگەن ۋاقىتتا جانە الەمنىڭ كەز كەلگەن نۇكتەسىنەن كونكۋرسقا قاتىسۋعا مۇمكىندىك بەردى», دەيدى د.جازىقباي.
مەملەكەتتىك ورگانداردا وتكىزىلگەن مىڭنان استام كونكۋرسقا 5 815 ۇمىتكەر قاتىسىپ, ونىڭ 652-ءسى ءوتتى. ونلاين جۇيە بويىنشا ءبىر ورىنعا قاتىسۋشىلاردىڭ ۇلەس كورسەتكىشى 4,6 ادامدى قۇراپ, قولدانىستاعى (1,7 ادام) ىرىكتەۋ تارتىبىمەن سالىستىرعاندا قاتىسۋشىلاردىڭ سانى 2,7 ەسەگە ارتتى. بۇل ازاماتتاردىڭ جاڭا جوبا اياسىندا مەملەكەتتىك قىزمەتكە دەگەن قىزىعۋشىلىعى ارتقانىن كورسەتىپ وتىر. بيىل جاڭا ىرىكتەۋ جۇيەسىن كەزەڭ-كەزەڭمەن بارلىق مەملەكەتتىك ورگانعا ەنگىزۋ جوسپارلانىپ وتىر.
«ە-Qyzmet» جۇيەسى ماڭىزدى اقپاراتتىق جۇيەلەرمەن ينتەگراتسيالانىپ, وزگە اقپاراتتىق جۇيەلەردەن ۇمىتكەر تۋرالى اقپارات الۋ, ونىڭ سوتتىلىعىن نەمەسە وزگە زاڭ بۇزۋشىلىقتارعا قاتىسى بار-جوعىن تەكسەرۋ, بىلىكتىلىك تالاپتارىنا ساي كەلۋىن قاراۋ ۇردىستەرى اۆتوماتتاندىرىلدى. بۇل مەملەكەتتىك قىزمەتكە ۇمىتكەرلەردى ارتىق قۇجات جيناۋدان بوساتتى.
مەملەكەت باسشىسى 2022 جىلعى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى قازاقستان حالقىنا جولداۋىندا مەملەكەتتىك قىزمەت ىستەرى اگەنتتىگىنە تولىققاندى ستراتەگيالىق HR ينستيتۋتىنا اينالۋ مىندەتىن قويعان بولاتىن. اگەنتتىك وسى باعىتتا ءتيىستى دايىندىق جۇمىستارىن جۇرگىزىپ, وتكەن جىلى پرەزيدەنت جانىنداعى مەملەكەتتىك باسقارۋ اكادەمياسى ىشىنەن ادامي رەسۋرستاردى باسقارۋ ينستيتۋتى قۇرىلدى. بۇل مەكەمە قۇزىرەتتىلىكتى باعالاۋ, HR-اناليتيكا, تالانت مەنەدجمەنت, تەستىلەۋ, اقپاراتتىق جۇيەنى سۇيەمەلدەۋ ءتارىزدى بەس باعىت بويىنشا جۇمىس اتقارماق.
مەملەكەت باسشىسىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعىمەن اگەنتتىككە مونيتورينگ جانە تالداۋ جۇرگىزۋ بويىنشا فۋنكتسيا جۇكتەلگەنى ءمالىم. وتكەن جىلى ساۋدا جانە ينتەگراتسيا, قارجى, حالىقارالىق قاتىناستار, اۋىل شارۋاشىلىعى, ەكولوگيا جانە تابيعي رەسۋرستار سىندى 5 سالالىق باعىت بويىنشا تالداۋ جۇرگىزىلدى. مونيتورينگ قورىتىندىسىنا سايكەس ادام قاجەتتىلىگىنە جانە سەرۆيستىك مەملەكەتتىك اپپاراتتى قالىپتاستىرۋعا, سونداي-اق بيۋروكراتيالىق كەدەرگىلەردى ازايتۋعا باعىتتالعان ۇسىنىستار ازىرلەندى.
«ونىڭ ىشىندە مەملەكەتتىڭ قاتىسۋى ءتيىمسىز, كۆازيمەملەكەتتىك سەكتوردى قوسا العاندا, 200-دەن استام ۇيىمدى تاراتۋ جانە قايتا ۇيىمداستىرۋ نەمەسە ولاردىڭ فۋنكتسيالارىن باسەكەلەستىك ورتاعا بەرۋ, جەرگىلىكتى اتقارۋشى ورگانداردىڭ 70-تەن استام فۋنكتسياسىن تومەنگى دەڭگەيگە ءتۇسىرۋ ارقىلى وڭتايلاندىرۋ, 100-گە جۋىق قىزمەت الۋ كەزىندە تولەنەتىن مەملەكەتتىك باجدى جانە مەملەكەتتىك ورگاندار سالاتىن بىرقاتار ايىپپۇل ءتۇرىن الىپ تاستاۋ, مەملەكەتتىك قىزمەتتەردىڭ 50 ءتۇرى بويىنشا اقپاراتتىق جۇيەلەردى ينتەگراتسيالاۋ مۇمكىندىگىن قاراستىرۋ سىندى ۇسىنىستار بار», دەيدى د.جازىقباي.
ونىڭ ايتۋىنشا, مەملەكەتتىك ورگاندارمەن بىرلەسكەن جۇمىستىڭ ناتيجەسىندە مەملەكەتتىك اپپاراتتى بيۋروكراتيادان ارىلتۋ بويىنشا 550-دەن استام كەيس دايىندالعان. بۇل كەيستەر ۇسىنىس رەتىندە ۇكىمەتكە ەنگىزىلدى. ولاردىڭ 152-ءسىن ىسكە اسىرۋ ءۇشىن زاڭنامالىق دەڭگەيدە شەشىمدەر قابىلداۋدى قاجەت ەتەدى.
«ماسەلەن, وسىنداي زاڭنامالىق باستامالار وبلىستىق جانە اۋداندىق ماڭىزى بار قالالارداعى جەر كوميسسياسى ينستيتۋتىن قىسقارتۋعا مۇمكىندىك بەردى. بۇل ءوز كەزەگىندە قىزمەت بەرۋشىلەردىڭ جاۋاپكەرشىلىگىن ارتتىرۋعا جانە قىزمەت كورسەتۋ ۇردىستەرى مەن مەرزىمدەرىنىڭ قىسقارۋىنا اسەر ەتەدى», دەدى اگەنتتىك توراعاسى. بيىل اگەنتتىك اكىمشىلىك كەدەرگىلەردى جانە بيۋروكراتيالىق اۋرە-سارساڭنىڭ جويىلۋىن قامتاماسىز ەتەتىن زاڭ جوباسىن ازىرلەۋدى جوسپارلاپ وتىر.
اگەنتتىك وتكەن جىلى مەملەكەتتىك قىزمەت كورسەتۋ ساپاسىن باقىلاۋ سالاسىندا 498 تەكسەرۋ جۇرگىزىپ, 66 مىڭ زاڭ بۇزۋشىلىقتى انىقتادى. ناتيجەسىندە, 898 لاۋازىمدى تۇلعا – تارتىپتىك, 365-ءسى اكىمشىلىك جاۋاپكەرشىلىككە تارتىلدى.
قىزمەت الۋشىلاردىڭ قۇقىقتارىن پرواكتيۆتى تۇردە, ولاردىڭ شاعىمدارىن كۇتپەي-اق, قاشىقتان مونيتورينگ جۇرگىزۋ تيىمدىلىگىن كورسەتىپ وتىر. بۇزۋشىلىقتار انىقتالعان جاعدايدا زاڭدىلىقتى قالپىنا كەلتىرۋ جانە قىزمەت الۋشىلاردىڭ قۇقىقتارىنىڭ بۇزىلۋىنا جول بەرمەۋ بويىنشا شارالار قابىلدانادى. مونيتورينگىلەۋ ناتيجەسىندە, وڭىرلەردە اقپاراتتىق جۇيە ارقىلى 11 مىڭنان استام زاڭ بۇزۋشىلىق انىقتالىپ, 360 ازاماتتىڭ قۇقىقتارى قالپىنا كەلتىرىلدى.
مەملەكەتتىك قىزمەت كورسەتۋ ۇردىستەرىن جەتىلدىرۋ ماقساتىندا جۇيەلى تالداۋ جۇرگىزىلىپ كەلەدى. ناتيجەسىندە, «ەلەكتروندىق ۇكىمەت» پورتالىندا جۇمىس ىستەمەي تۇرعان 40 مەملەكەتتىك قىزمەت انىقتالدى. قازىرگى ۋاقىتتا ولاردىڭ 14-ءى ىسكە قوسىلدى, قالعان 26-سىن ىسكە قوسۋ جۇمىستارى جۇرگىزىلىپ جاتىر.
وتكەن جىلى اگەنتتىك مەملەكەتتىك قىزمەتشىلەردىڭ ادەپ كودەكسىنە تۇسىندىرمەلەر ازىرلەدى. ولار كودەكستىڭ نورمالارىن تاجىريبەدە قولدانۋ بارىسىندا دۇرىس تۇسىنۋگە باعىتتالعان.
جالپى, بىلتىر ادەپ جونىندەگى كەڭەستەردىڭ 195 وتىرىسى ءوتىپ, 1 300-دەن استام ءوتىنىش قارالىپتى. اگەنتتىكتىڭ ۇيلەستىرۋىمەن وڭىرلەردە ادەپ جونىندەگى ۋاكىلدەر تاراپىنان اۋقىمدى تۇسىندىرمە جۇمىسى جۇرگىزىلىپ, 26 مىڭنان استام ازامات پەن مەملەكەتتىك قىزمەتشىگە جەكە كونسۋلتاتيۆتىك كومەك كورسەتىلدى.
ايتا كەتۋ كەرەك, 2023 جىلى اگەنتتىك تاراپىنان 396 تەكسەرۋ جۇرگىزىلىپ, 13 مىڭنان استام بۇزۋشىلىق انىقتالعان. تەكسەرىس قورىتىندىسى بويىنشا زاڭسىز اكتىلەردىڭ كۇشىن جويۋ تۋرالى 345 ۇسىنىم جانە ۇيعارىم ەنگىزىلىپ, ولاردىڭ 97,9%-ى تولىعىمەن ورىندالدى. باقىلاۋ شارالارىنىڭ ناتيجەسى بويىنشا قابىلدانعان شەشىمدەردىڭ ارقاسىندا 191 ازاماتتىڭ قۇقىعى قورعالدى.
