جالپى ءبىلىم بەرەتىن مەكتەپتە 12 ءپان كابينەتى بار. سونداي-اق كەڭ دە جارىق التى باستاۋىش سىنىپ كابينەتى جۇمىس ىستەيتىن بولادى. قۇرىلىسشىلار قالاعىنان جاڭا شىققان سپورت پەن ءماجىلىس زالى, كىتاپحانا ايناداي جارقىراپ تۇر. ءسوز اراسىندا اۋىلدىڭ 168 وقۋشىسى سوناۋ 1962 جىلى سالىنعان كونەتوز مەكتەپتە وقىپ كەلگەن بولاتىن. ەندى, مىنە, جاڭا توقساننىڭ باسىندا جان جادىراتار جاقسىلىق ورىن الدى.
– مەكتەپ ۇجىمىندا 34 مۇعالىم جۇمىس ىستەيدى, – دەيدى مەكتەپ ديرەكتورى مۇباراك بايشولاقوۆ. – جاڭا ءبىلىم وشاعى سالىنا باستالعالى قۇرىلىس جۇمىسى قاشان بىتەدى ەكەن دەپ تاعاتسىزدانا كۇتتىك. بۇگىنگى كۇن جالعىز وقۋشىلار عانا ەمەس, اتا-انالاردىڭ دا مەرەيى ۇستەم بولعان ءسات.
وسىنداي جاعىمدى جاڭالىق تسەلينوگراد اۋدانىنىڭ بىرقاتار ەلدى مەكەنىندە ورىن الماق. اۋداندا 10 ءبىلىم وشاعى مەن ءبىر بالاباقشا سالىنىپ جاتىر. ايتپاقشى, وڭىردە وتكەن جىلى التى جاڭا مەكتەپ پايدالانۋعا بەرىلدى. استانا توڭىرەگىندەگى اۋىلداردا ورنالاسقان ءبىلىم وشاقتارىندا ءۇش اۋىسىمدى وقىتۋ جۇيەسى ورىن الىپ, حالىقتىڭ وكپە-نازىن تۋدىرىپ تۇر ەدى. جىبەك جولى اۋىلىندا 300 ورىندىق, قوسشى قالاسىندا 1200 ورىندىق مەكتەپتەر سالىنعاننان كەيىن بۇل ماسەلە شەشىمىن تاپتى. قوسشى قالاسىندا جەكە ينۆەستيتسيا ەسەبىنەن سالىنعان 1500 ورىندىق مەكتەپ مەملەكەت مەنشىگىنە بەرىلدى. اقكول قالاسىنىڭ №4 مەكتەبىنە قوسىمشا عيمارات قوسىلدى.
«جايلى مەكتەپ» ۇلتتىق جوباسى اياسىندا وڭىردە 22 600 وقۋشىعا ارنالعان 18 مەكتەپ سالۋ جوسپارلانىپ وتىر. بۇگىنگى تاڭدا 7 مەكتەپتىڭ قۇرىلىسى باستالدى.
اقمولا وبلىسى
