ايدى زەرتتەيتىن SLIM – جەڭىل اۆتوكولىككە ۇقسايتىن عارىش ءمودۋلى. ول ء«دال قونۋ» تەحنولوگياسىن پايدالانۋىمەن ەرەكشە. بۇعان دەيىنگى ايعا قونعاندارعا قاراعاندا الدەقايدا ءىرى باقىلاۋ جاساۋعا قابىلەتتى. جاپونيا اەروعارىشتىق بارلاۋ اگەنتتىگىنىڭ عارىش اپپاراتتارىن ءدال قوندىرۋ تەحنولوگياسى جيىرما جىلدىق جۇمىسىنان كەيىن وسىنداي ناتيجەگە جەتتى.
جاپوندىقتاردىڭ باستى ماقساتى – ايدىڭ كەز كەلگەن جەرىنە قونۋعا مۇمكىندىك بەرەتىن جاڭا قونۋ تەحنولوگياسىن سىناقتان وتكىزۋ. قونعاننان كەيىن عارىش كەمەسى ايدىڭ شىعۋ تەگى تۋرالى ءبىلىمدى كەڭەيتۋ ءۇشىن توپىراق ۇلگىلەرىن زەرتتەيدى ءارى ارنايى كامەرانىڭ كومەگىمەن مينەرالداردى تالدايدى. كۇنشىعىس ەلى جەردىڭ تابيعي سەرىگىنە ءمودۋلىن قوندىرعان الەمدەگى بەسىنشى مەملەكەت اتاندى. بۇعان دەيىن كەڭەس وداعى, اقش, قىتاي جانە ءۇندىستاننىڭ قولى ايعا جەتكەن ەدى. ولاردىڭ ىشىندە ءۇندىستان جەر سەرىگىنىڭ وڭتۇستىك پوليۋسىنە ءوز ءمودۋلىن قوندىرعان العاشقى مەملەكەت رەتىندە تاريحقا ەندى.
قونۋ بارىسىندا عارىش كەمەسى شيوري كراتەرى ايماعىندا بەلگىلەنگەن جەردەن 100 مەتر راديۋستا قوندى. بۇعان تۋرالى NASA-نىڭ بۇرىنعى قىزمەتكەرى جانە SpaceWatch Global باس رەداكتورى ەم «بۇرىن-سوڭدى بولماعان» دەگەن باعا بەردى. شىنىندا دا عارىش اپپاراتتارىنىڭ كوبى بەلگىلەنگەن نىسانادان بىرنەشە شاقىرىم جەرگە قوناتىن ەدى. ال SLIM ءدال قونۋ تەحنولوگياسىنىڭ ناتيجەسىندە «اي مەرگەنى» دەگەن اتقا يە بولدى.
جاپوندىقتار ايعا ءساتتى قونعانىمەن, ءبىرشاما قيىندىققا تاپ بولدى. بۇل جەتىستىكتەرى قىسقامەرزىمدى بولۋى مۇمكىن. جاپوندىق عارىش اگەنتتىگىنىڭ حابارلاۋىنشا, JAXA اپپاراتى مەن كۇن باتارەياسىنا قاتىستى ماسەلە تۋىپ, ەلەكتر قۋاتىن وندىرە المايتىن بولعان. قازىرگى جاعدايدا باتارەيا بىرنەشە ساعات جۇمىس ىستەۋگە عانا ارنالعان. باسقا سەنسورلاردىڭ قالاي جۇمىس ىستەيتىنىنە سۇيەنە وتىرىپ, JAXA كەشكى ءباسپاسوز ءماسليحاتىندا SLIM ءساتتى قونۋعا قابىلەتتى ەكەنىن ايتتى. عارىش كەمەسى جەرمەن بايلانىس ورناتا الادى, بىراق قۋاتى از. كۇن باتارەياسىنىڭ جۇمىس ىستەمەيتىندىگىنەن باسقا, ونىڭ ناقتى تۇيىتكىلى نەدە ەكەنى ءالى بەلگىسىز. پانەلدەر ءدال قازىر كۇن ساۋلەسىن الۋعا قاۋقارسىز بولۋى دا مۇمكىن. سودان كەيىن كۇن ورنىن اۋىستىرعان كەزدە عانا قۋاتتاۋ باستالادى. الايدا JAXA نە بولعانىن ءتۇسىنۋ ءۇشىن كوپ ۋاقىت قاجەت دەيدى. SLIM-مەن بىرگە شىققان ەكى كىشكەنتاي LEV-1 جانە LEV-2 روۆەرلەرى وتىرعىزۋ الدىندا ودان ءساتتى ءبولىنىپ شىقتى. ازىرگە ولار جۇمىس ىستەپ تۇر. JAXA قازىر وتىرعىزۋدان ماكسيمالدى دەرەكتەردى الۋ ءۇشىن SLIM جۇمىسىنىڭ قالعان ۋاقىتىن بارىنشا ارتتىرۋعا باسا نازار اۋداراتىنىن اتاپ ءوتتى. اگەنتتىك كەلەسى اپتادا ميسسيانىڭ قازىرگى جاعدايى تۋرالى تاعى ءبىر ءباسپاسوز ءماسليحاتىن وتكىزۋدى جوسپارلاپ وتىر. SLIM ۋاقىتى اياقتالۋعا جاقىن بولىپ كورىنگەنىمەن, قونۋدىڭ ءوزى ماڭىزدى بەلگى بولدى.
