سالتاناتتى جيىندا مەملەكەتتىك تۋدى كوتەرۋ قۇقىعىنا وقۋ پۋنكتىنىڭ ەڭ ۇزدىك ساربازى قاتارداعى جاۋىنگەر نارتاي مۇزدىباەۆ يە بولدى. ءانۇران ورىندالعاننان كەيىن جاس جاۋىنگەر كۋرسىنان وتكەن ساربازدار وتان الدىندا ادال قىزمەت ەتۋگە انت ەتتى.
وسىدان سوڭ قۇتتىقتاۋ ءسوز 6636 اسكەري ءبولىمىنىڭ كومانديرى پولكوۆنيك ەرلان بۋرانباەۆقا بەرىلدى.
- ساربازدارىمىزدىڭ انت قابىلدايتىن كۇنى ءبىز ءۇشىن مەرەكەمەن پارا-پار. سەندەر العاش رەت اسكەري انت قابىلداپ وتىرسىڭدار. بۇل ءسات سەندەردىڭ ەستەرىڭدە ماڭگى ساقتالادى. ءار ازامات ەلىمىزدىڭ كونستيتۋتسياسىن جانە ونىڭ تالاپتارىن ەستە ساقتاۋى كەرەك. قازاقستاندى قورعاۋ – سەندەردىڭ قاسيەتتى بورىشتارىڭ. سوندىقتان اسكەري قىزمەتتەرىڭدى ابىرويمەن اتقارۋلارىڭا تىلەكتەسپىن. سەندەردەي ازاماتتاردى تاربيەلەگەن اتا-انالارىڭا العىسىم زور, – دەدى پولكوۆنيك ەرلان كارىمجان ۇلى.
جالىندى جاستار الدىنا شىققان 6636 اسكەري ءبولىمى ارداگەرلەر كەڭەسىنىڭ توراعاسى فەليكس دۋلسكي اسكەري انتتىڭ قادىر-قاسيەتى جايلى ءسوز قوزعادى. سونداي-اق انتىنا ادالدىق تانىتىپ, قىزمەت بارىسىندا ەرلىكپەن قازا تاپقان جاۋىنگەرلەردىڭ باتىلدىعىن ۇلگى ەتتى. ءبىر ساپتا تۇرعان ساربازداردىڭ ۇرپاقتان-ۇرپاققا جالعاسقان ەرلىك سالتىن جالعايتىنىنا سەنىم ءبىلدىردى.
ءىس-شارادا قاتارداعى ءالي تولەۋحان مەن ماعجان مۇحيت ۇلىنىڭ اتاسى تولەۋحان قاجى ءسوز سويلەدى.
- ساربازدار! بالالارىم, وتان الدىنداعى ازاماتتىق بورىشتارىڭدى ابىرويمەن اتقارىڭدار. اتا-انالارىڭنىڭ ءجۇزىن جەرگە قاراتپاۋعا تىرىسىپ, انتتارىڭا ادالدىق تانىتىڭدار. بۇرىنعى باتىرلاردىڭ جولىن جالعاپ, بيىكتەن كورىنە بەرىڭدەر. ءبىز سەندەردى ماقتان تۇتامىز! – دەدى ءسوز سوڭىن باتامەن اياقتاعان قاريا.
ال جاۋىنگەرلەر اراسىنان قاتارداعى ءادىل قايسانوۆ لەبىز ءبىلدىردى.
- بۇگىن ەگەمەن ەلىمىزدىڭ بولاشاعى ءۇشىن, تاۋەلسىز قازاقستان ءۇشىن اسكەري انت قابىلدادىق. ءبىز رۋحتى جانە قايسار جاۋىنگەر بولۋعا ءسوز بەردىك. ۇلتتىق ۇلان ساپىندا قىزمەت ەتۋ – ءبىز ءۇشىن مارتەبە, ال اتا-انالارىمىز ءۇشىن ۇلكەن قۋانىش, - دەدى قاتارداعى ءادىل قايسانوۆ.
جاۋىنگەردىڭ ادۋىندى ءسوزىن ارى قاراي قاتارداعى جاۋىنگەر نۇرسۇلتان ومىرزاقتىڭ اكەسى ۇرىس-قيمىلدارىنىڭ ارداگەرى داۋلەتكەلدى ەلۋباەۆ جالعاپ اكەتتى. قۇرمەتتى ارداگەر اۋعان-تاجىك شەكاراسىندا اتقارعان قىزمەتى جايلى بايانداپ, جاس ساربازداردى جىگەرلى بولۋعا شاقىردى.
وسىدان كەيىن ساربازدار اتا-انالارىنىڭ الدىندا جەكپە-جەك ۇرىس تاسىلدەرىنىڭ قيمىل-قوزعالىسىن كورسەتتى. اسىرەسە, ۇلتتىق ۇلان قۇرمەت قاراۋىل روتاسىنىڭ ونەرى كوپتىڭ كوڭىلىنەن شىقتى.
سالتاناتتى شارانىڭ سوڭىندا ساربازدار مەن اتا-انالاردىڭ جولىعۋىنا رۇقسات ەتىلدى.
