فوتو: soltustikkaz.kz
سەناتتىڭ الەۋمەتتىك-مادەني دامۋ جانە عىلىم كوميتەتىنىڭ توراعاسى نۇرتورە ءجۇسىپ وقۋ-اعارتۋ ءمينيسترى عاني بەيسەمباەۆپەن كەزدەستى. وندا سالاداعى بىرقاتار وزەكتى ماسەلە, ونىڭ ىشىندە مەكتەپكە دەيىنگى, ورتا, تەحنيكالىق جانە كاسىپتىك ساپالى ءبىلىم بەرۋدى قامتاماسىز ەتۋ مەن بالالار قۇقىقتارىن قورعاۋدىڭ ءمان-جايى تالقىلاندى.
دەپۋتات سەنات باسشىلىعى مەن دەپۋتاتتار مەكتەپتەردە ورىن العان جاعدايلارعا الاڭداۋشىلىق ءبىلدىرىپ وتىرعانىن مينيسترلىك جەتەكشىسىنىڭ نازارىنا جەتكىزدى. اتاپ ايتقاندا, وقۋشىلار اراسىنداعى قوقان-لوققى مەن قورقىتۋ, جاسوسپىرىمدەر قىلمىسى, وقۋشىلار مەن مۇعالىمدەردىڭ سىرتقى قاتەردەن قاۋىپسىزدىگى جانە ت.ب. ماسەلەلەر تۋرالى ايتىلدى.
«پرەزيدەنت قاسىم-جومارت توقاەۆ وتكەن جىلدىڭ قازان ايىندا رەسپۋبليكالىق پەداگوگتەر سەزىنە قاتىسقانى بارشاعا بەلگىلى. مەملەكەت باسشىسى ءوز سوزىندە مەكتەپتى ەڭ قاۋىپسىز ورىنعا اينالدىرۋ قاجەتتىگىن اتاپ وتكەن بولاتىن. سەناتورلار پرەزيدەنتتىڭ تاپسىرماسى مەن حالىقتىڭ ەرىك-جىگەرىن ساپالى ورىنداۋ ءۇشىن ۇكىمەت ءسىزدىڭ مينيسترلىك اتىنان قولدانىستاعى زاڭنامالىق اكتىلەر مەن مەكتەپ مەكەمەلەرىندەگى قاۋىپسىزدىك شارالارىن تۇبەگەيلى قايتا قاراۋى ءتيىس دەپ سانايدى. قاجەت بولعان جاعدايدا مەكتەپتەردىڭ قاۋىپسىزدىگىن قامتاماسىز ەتۋ جونىندەگى كەشەندى شارالاردى, ونىڭ ىشىندە ىقتيمال قاۋىپتەردىڭ الدىن الۋ, انىقتاۋ جانە جولىن كەسۋدى كوزدەيتىن ءتيىستى قۇجاتتاردى ازىرلەۋدىڭ ماڭىزى زور», دەدى نۇرتورە ءجۇسىپ.
وقۋ-اعارتۋ ءمينيسترى عاني بيسەمباەۆ ءوز كەزەگىندە سالا بويىنشا بارلىق دەڭگەيدە ءبىلىم الۋ ءۇشىن قاجەتتى جاعدايلار جاساۋعا, ءبىلىم بەرۋ جۇيەسىن دامىتۋعا, ءبىلىم بەرۋ سالاسىنداعى ءتيىستى نورماتيۆتىك-قۇقىقتىق اكتىلەردى جەتىلدىرۋگە باعىتتالعان ۇزدىكسىز جۇمىستاردىڭ اتقارىلۋ بارىسىن بايانداپ بەردى.
