الماتىداعى مەملەكەتتىك ورتالىق مۋزەيدە ەسىك اشقان «حالىق جۇرەگىندەگى قاھارمان» دەپ اتالعان كورمەنى تاماشالاپ, ساعادات الەمىنە ساياحاتتاپ قايتتىق. جاستاردىڭ جىگەرىن جانىپ, رۋحىن كوتەرەتىن مازمۇندى ءىس-شارانى تاعىلىم ورداسى قارۋلى كۇشتەردىڭ اسكەري-تاريحي مۋزەيىمەن بىرلەسە ۇيىمداستىرعان.
كوشپەلى كورمەگە حالىق قاھارمانىنىڭ تىرشىلىگىندە تۇتىنعان جەكە زاتتارى, ەش جەردە جاريالانباعان فوتوسۋرەتتەرى مەن قۇجاتتارى, باتىردىڭ ومىرىنە قاتىستى بىرەگەي جادىگەرلەر قويىلعان. مۇنداعى 100-دەن اسا ەكسپوناتتىڭ ءاربىرى گەنەرالدىڭ ءومىر بەلەستەرىنەن حابار بەرەدى. اسىرەسە ونىڭ 1943 جىلى اسكەر ساپىنداعى سارباز ساتىندە تاسپالانعان سۋرەتى, مايدانداعى ەرلىگى ءۇشىن 1945 جىلى كەڭەس وداعىنىڭ باتىرى مەدالىن الىپ تۇرعان كەزىن بەينەلەيتىن ەستەلىك سۋرەت بىردەن نازار اۋدارتادى. باتىردىڭ تۋعان جەرى, وسكەن ورتاسى تۋرالى كەڭ اۋقىمدى مالىمەتتەردى, ول تۋرالى جازىلعان كىتاپتار مەن ماقالالار تىزبەگىن دە كورمە تورىنەن تاباسىز.
كورمەنىڭ اشىلۋ سالتاناتىنا ساعادات قوجاحمەت ۇلىمەن قىزمەتتەس بولعان ارداگەرلەر, «جاس سارباز» اسكەري-پاتريوتتىق سىنىبىنىڭ تاربيەلەنۋشىلەرى جانە اسكەري قىزمەتكەرلەر قاتىستى. باتىر رۋحىنا ارنالعان پاتريوتتىق اندەر شىرقالىپ, جاس ساربازدار جىردان شاشۋ شاشتى. ارميا گەنەرالىنان تاعىلىم العان اسكەري سالا ارداگەرلەرى ونىڭ ادامي بولمىسى مەن قايراتكەرلىك قىرى حاقىندا ەستەلىكتەرىمەن ءبولىستى.
«ونەگەسى ەلگە مۇرا, ۇرپاققا ۇران بولعان حالىق قاھارمانى ساعادات نۇرماعامبەتوۆتىڭ ەسىمى اسكەري سالا ماماندارىنىڭ اۋزىندا اڭىزداي ايتىلۋى تەگىن ەمەس. ول كىسىنىڭ باتىلدىعى, قايسارلىعى, ەلىنە دەگەن سۇيىسپەنشىلىگى – جاستارىمىزعا جارقىن ۇلگى. اتالعان كورمەدەن وسكەلەڭ ۇرپاق شابىت الىپ, وتان قورعاۋدىڭ ءمان-ماڭىزى, ەلگە قىزمەت ەتۋدىڭ ونەگەسى تۋرالى وي قالىپتاستىرسا دەيمىز. كورمەگە قاتىسقان جاس ساربازداردىڭ كوزىنەن وسىنداي ۇشقىن كوردىك», دەيدى مەملەكەتتىك ورتالىق مۋزەي ديرەكتورى راشيدا حاريپوۆا.
كوشپەلى كورمە ورتالىق مۋزەيدە ون كۇنگە جالعاسىپ, ارتىنشا ەل ايماقتارىن ارالاماق. مەملەكەتتىك اسكەري-تاريحي مۋزەيدىڭ قىزمەتكەرى داۋلەت قادىروۆ تۇلعانىڭ عاسىرلىق تويىنا وراي ەلىمىزدىڭ ءار وڭىرىندە وسىنداي ايشىقتى جوبالار سالتانات قۇراتىنىن, ۇلكەن قالالاردا وتەتىن نەگىزگى ءىس-شارالاردىڭ بارىنە مۇنداعى ماڭىزدى جادىگەرلەر اپارىلاتىنىن جەتكىزدى.
«بۇگىنگى ءىس-شارا ساعادات قوجاحمەت ۇلىنىڭ ەرەن ەڭبەگىن ۇلگى ەتە وتىرىپ, ۇرپاققا اسكەري-پاتريوتتىق تاربيە بەرۋگە, سونداي-اق, ەل قارۋلى كۇشتەرىنىڭ ءيميدجىن ارتتىرۋعا, مۋزەي ءىسىن ناسيحاتتاۋعا جانە ودان ءارى دامىتۋعا باعىتتالىپ وتىر», دەيدى ول.
الماتى
