فوتو: inbusiness.kz
«20 جىل بۇرىن جاتتىڭ جەتەگىنە كەتكەن جەتىم بالالار ەسەيدى, سوندىقتان بۇل تاقىرىپ تاعى كوتەرىلىپ كەلەدى. مىسالى جۋرناليست جانار بايسەمىزوۆا جۇرگىزەتىن «شەتەلدەگى قازاق بالالارى» جوباسىن تەبىرەنبەي كورۋ مۇمكىن ەمەس. اتا-اناسىن تاپقىسى كەلەتىندەر از ەمەس. سولاردىڭ ءبىرى - بەلگيالىق اسىراپ العان جانىبەك جۇماعۇلوۆ, مۇنداي تاعدىرلار قانشاما», دەدى دەپۋتات.
قازاقستان شەتەل ازاماتتارى اسىراپ العان بالالاردىڭ قۇقىقتارىن قورعاۋ ماقساتىندا 2010 جىلى «بالالاردى قورعاۋ جانە بالانى شەتەلدىك اسىراپ الۋعا قاتىستى ىنتىماقتاستىق تۋرالى كونۆەنتسيانى» راتيفيكاتسيالاعان. بالا قۇقىقتارىن قورعاۋ سالاسىنداعى ۋاكىلەتتى ورگان بولىپ سانالاتىن وقۋ-اعارتۋ مينيسترلىگىنىڭ مالىمەتىنشە, كونۆەنتسياعا قول قويعالى بەرى شەتەلدىك ازاماتتار قازاقستاننان 158 بالا اسىراپ العان. سونىڭ ىشىندە 2013-2019 جىلدارى 157 بالا شەتەل اسسا, سوڭعى 4 جىلدا 1 بالا سىرتقا شىققان. كونۆەنتسياعا قول قويعانعا دەيىن, 1999-2011 جىلدار ارالىعىندا شەتەلدىكتەر 8 مىڭ 805 بالا اسىراپ العان. ولاردىڭ 5 مىڭ 217-ءسى قازىر كامەلەتتىك جاسقا تولعاندىقتان ەسەپتەن شىعارىلعان. كامەلەتكە تولماعان 3 588 بالا تۋرالى مالىمەت-ەسەپ الىنىپ تۇرادى.
«وكىنىشكە قاراي ەسەپ بەرمەيتىندەر دە كوپ. ماسەلەن, وڭتۇستىك افريكا ەلىنە كەتكەن 30 بالادان حابار-وشار جوق. سول سياقتى اقش-تاعى 104, بەلگياداعى 113, ت.س. بالانىڭ تاعدىرىن بىلمەيمىز. ەڭ سوراقىسى, 1999 جىلعا دەيىن ەلىمىزدەن قانشا جەتىم بالانىڭ شەتەلگە كەتكەنى تۋرالى مۇلدەم مالىمەت جوق», دەدى سەنات دەپۋتاتى.
دەپۋتات 1999 جىلعا دەيىن شەتەلگە كەتكەن جەتىمدەر تۋرالى دەرەكتەر بويىنشا زەرتتەۋ جۇرگىزۋ, جالپى, بالالار تۋرالى مالىمەتتەردى جاڭالاۋ, بالالارعا بيولوگيالىق اتا-اناسىن تابۋعا كومەكتەسۋ, سونداي-اق ولاردىڭ قالاۋى بويىنشا ەلىمىزدىڭ ازاماتتىعىن الۋعا جاردەمدەسۋدى ۇسىندى.
