رەتينالدى كامەرا «سامۇرىق-قازىنا» اق كومپانيالار توبىنىڭ بىرىڭعاي قايىرىمدىلىق وپەراتورى – «Samruk-Kazyna Trust» قورىنىڭ قارجىلاندىرۋمەن ساتىپ الىنعان. ء«بىز بەرگەن رەتينالدى كامەرانىڭ كومەگىمەن ەندى جۇزدەگەن ءسابيدى مۇگەدەكتىكتەن قۇتقارىپ قالۋعا بولادى. شالا تۋعان نارەستەلەردىڭ كوزىن تەكسەرىپ, ءدال ۋاقىتىندا دياگنوز قويۋعا مۇمكىندىك بەرەدى. بالالاردىڭ دەنساۋلىعىنا قاتىستى وڭىرلىك جوبالاردى قولداۋ – ماڭىزدى باسىمدىقتاردىڭ ءبىرى», دەپ اتاپ ءوتتى «Samruk-Kazyna Trust» قورىنىڭ باس ديرەكتورى الفيا اديەۆا.
پاۆلودار وبلىسىندا جىل سايىن 10 مىڭنان اسا بالا دۇنيەگە كەلەدى. وڭىردە كەيىنگى ءبىر جىلدا 763 ءسابي مەرزىمىنەن بۇرىن تۋعان. مۇنداي بالالاردىڭ 40 پايىزىنا «رەتينوپاتيا», ياعني كورۋ قابىلەتىنىڭ تولىق جوعالۋىنا اكەپ سوقتىراتىن اۋىر دياگنوز قويىلادى. دارىگەرلەر پەرزەنتحانادا نەوناتالدىق وفتالمولوگيانىڭ قالىپتاسۋىنا كومەكتەسكەنى ءۇشىن «Samruk-Kazyna Trust» قورىنا زور ريزاشىلىعىن ءبىلدىردى.
«جاڭا تۋعان نارەستەلەردىڭ رەتينوپاتياسى» جوباسىن «Samruk-Kazyna Trust» قورى «ايالا» قايىرىمدىلىق قورىمەن بىرلەسىپ جۇزەگە اسىرىپ جاتىر. 2021 جىلدىڭ مامىر ايىنان 2023 جىلدىڭ ءساۋىر ايىنا دەيىنگى ارالىقتا اۆتوماتتى گيپوتەرميا جابدىقتارىنىڭ 6 اپپاراتى ارقىلى 70-كە جۋىق جاڭا تۋعان نارەستە قۇتقارىلعان.
ايتىپ وتەيىك, بيىل ءساۋىر ايىندا «قازاقستان حالقىنا» قورى «شالا تۋعان نارەستەلەرگە وفتالمولوگيالىق سكرينينگ جۇرگىزۋ جانە رەتينوپاتياسىن ەمدەۋگە ارنالعان جابدىقتارمەن مەديتسينالىق ۇيىمداردى قامتاماسىز ەتۋ» قايىرىمدىلىق باعدارلاماسى اياسىندا پاۆلودار وبلىستىق №1 پەريناتالدىق ورتالىعىن جالپى سوماسى 33,5 ملن تەڭگەگە دياگنوستيكالىق اسفەرالىق لينزالارمەن جانە وفتالمولوگيالىق لازەرمەن جابدىقتاعان. مەديتسينالىق ۇيىمعا جابدىقتاردى جەتكىزۋ مامانداردى وقىتۋمەن قاتار ءجۇردى. وفتالمولوگيالىق جابدىق شالا تۋعان نارەستەلەردىڭ كورۋ قابىلەتىنىڭ بۇزىلۋىن (رەتينوپاتيا) انىقتاۋعا, ۋاقتىلى ەمدەۋگە جانە الدىن الۋعا مۇمكىندىك بەرەدى.
اق جەلەڭدىلەردىڭ ايتۋىنشا, قازاقستان وڭىرلەرىندەگى مەديتسينالىق ۇيىمنىڭ كوپشىلىگىندە وفتالمولوگيالىق سكرينينگكە ارنالعان جابدىق جەتىسپەيدى. 2022 جىلى ەلىمىزدە دەنە سالماعى 2 500 گرامنان از 20 مىڭنان اسا نارەستە دۇنيەگە كەلسە, سونىڭ 5 مىڭعا جۋىعىندا رەتينوپاتيانىڭ دامۋ قاۋپى جوعارى بولعانى تىركەلىپتى.
پاۆلودار وبلىسى
