تاعدىر باسقا سالعان سوڭ, تالاي وتباسى شەتەلدە قىمبات وپەراتسيا جاساتۋ ءۇشىن كەيدە قاراجات جيناۋعا كومەك سۇراپ, شاراسىزدىقتان قايىرىمدىلىق ۇيىمدارىنا جۇگىنىپ جاتاتىنىن كورىپ ءجۇرمىز. وسى ماسەلەدە قولى ۇزىن قايىرىمدىلىق قورلارىنىڭ سەپتىگىمەن ەلىمىزدە حالىقارالىق شەبەرلىك دارىستەرىن وتكىزىپ, گيپوسپاديا (نەسەپ-جىنىس جۇيەسى كەسەلى) دياگنوزى قويىلعان بالالارعا ءبىر مەزەتتە وپەراتسيالار جاساۋعا شەشىم قابىلداندى.
وسىناۋ وپەراتسيالاردى اتقارۋ ءۇشىن لوندوندىق پروفەسسور يمران مۋشتاك الماتىعا ارنايى شاقىرتىلىپ, وعان استانا, الماتى, قاراعاندى مەن كورشىلەس موڭعوليا, وزبەكستان, تاجىكستان ەلدەرىنەن شەبەرلىكتەرىن شىڭداۋعا كەلگەن بالالار حيرۋرگتەرى كومەكتەستى. بالالار شۇعىل مەديتسينالىق كومەك كورسەتۋ ورتالىعىندا بالالار ۋرولوگتەرىنە ارنالعان شەبەرلىك ساباعى ءوتىپ, بالالارعا نەسەپ-جىنىس جولدارىنا دەمونستراتسيالىق رەكونسترۋكتيۆتىك پلاستيكالىق وپەراتسيالار جاسالدى. ارىپتەستەرىمەن بىرگە كىشكەنتاي پاتسيەنتتەرگە بىرەگەي وپەراتسيالاردى جۇرگىزگەن ۋرولوگيالىق حيرۋرگتەردىڭ ءبىرى دوكتور يمران مۋشتاك – لوندونداعى شاعىن ءينۆازيۆتى ۋرولوگيالىق حيرۋرگيانىڭ باستاۋىندا تۇرعان ءارى بۇگىنگى تاڭدا ۇلىبريتانياداعى جەتەكشى لاپاروسكوپيالىق حيرۋرگتەرىنىڭ قاتارىندا.
«گيپوسپاديا سيندرومى ءجيى كەزدەسەدى, ونى تەك حيرۋرگيالىق جولمەن عانا ەمدەۋگە بولادى. ەگەر وپەراتسيا ەرتە باستان جاسالماسا, بالانىڭ ەسەيۋى قيىنعا سوعادى, كىشى دارەتكە باراتىن كەزدە قينالادى. وسىنداي دياگنوزى بار جاسوسپىرىمدەردىڭ ەرەسەك ومىرگە ءوتۋى وڭاي ەمەس. مۇنداي وپەراتسيا بىردەن ناتيجە بەرمەگەنىمەن, بالانىڭ ورتاعا بەيىمدەلۋىنە جاقسى جاعداي تۋدىرىپ, بولاشاعىنا دا اسەر ەتەدى», دەيدى پروفەسسور يمران مۋشتاك.
ال ساۋابى مول الەۋمەتتىك جوبانى ساتىمەن جۇزەگە اسىرۋعا «مەيىرىم» قوعامدىق قورى ۇيىتقى بولدى.
«الماتى قالاسى بالالار جەدەل مەديتسينالىق جاردەم ورتالىعىندا تاماشا ۋرولوگيا ءبولىمى, جوعارى كاسىبي دارىگەرلەر بار. ءبىزدىڭ مىندەتىمىز قازاقستانعا مەديتسينالىق تەحنولوگيالار اكەلۋ بولدى. «بالالارعا ءومىر سىيلا» جوباسى دياگنوزى قازاقستاندا قازىرگە شيپاسى تابىلماعان بالالارعا كومەك كورسەتەدى. كەيىنگى جىلدارى شەتەلدىك ماماندار مەن ءبىزدىڭ اۋرۋحانالارداعى قازاقستاندىق دارىگەرلەردىڭ قاتىسۋىمەن وسىنداي وپەراتسيالاردى جاساۋعا كۇش سالىپ جاتىرمىز. بۇل بىزگە مەديتسينالىق تەحنولوگيالاردى اكەلۋگە عانا ەمەس, ەڭ باستىسى وسىنداي وتباسىلارعا كومەكتەسۋگە مۇمكىندىك بەرەدى. ويتكەنى بالا شەتەلدىك كلينيكالارعا بارعاندا ونىڭ وپەراتسيا بولمەسى, جانساقتاۋ بولىمىندەگى ەمىن, ءدارى-دارمەك پەن باسقا دا مەديتسينالىق قىزمەتتەردىڭ ءبارىن ءوزىمىز تولەيمىز. ال وپەراتسيانى وسىندا جاساعاندا, تەگىن مەديتسينالىق كومەكتىڭ كەپىلدەندىرىلگەن كولەمى اياسىندا بالالار ءبىزدىڭ اۋرۋحانالارعا جاتقىزىلادى, بۇل ەمدەلۋ قۇنىن ايتارلىقتاي تومەندەتەدى», دەدى «مەيىرىم» ەرىكتى قوعامى» قق ديرەكتورى ارۋجان ساين.
ايتقانداي, وپەراتسيا جاسالعان ەڭ كىشىسى 2,7 جاسار, ۇلكەنى 16 جاستاعى ناۋقاستاردى «مەيىرىم» ەرىكتى قوعامىمەن بىرگە الماتى قالاسى بالالار جەدەل مەديتسينالىق كومەك كورسەتۋ ورتالىعىنىڭ دارىگەرلەرى تاڭدادى. قازىر وپەراتسيا جاسالعان بالانىڭ ءبارى پالاتاعا اۋىستىرىلعان ءارى جاعدايلارى دا بىرقالىپتى.
«وپەراتسيا كەزىندە پلاستيكالىق تۇزەتۋ ءادىسىن قولدانا وتىرىپ, تەرى اۋىستىردىق. تەرى جامىلعىلارى قۇلاقتىڭ ارتىنان الىنىپ, ۇل بالالارعا ءزار جولىنىڭ اناتوميالىق دۇرىس قالىبى جاسالادى. ءبىز ەلىمىزدىڭ ەشبىر وتاندىق اۋرۋحاناسىندا جاسالماعان وپەراتسيالاردى تاڭدادىق, قازاقستاننىڭ ءار وڭىرىنەن بالالار الدىرىلدى. قازىرگە پاتسيەنتتەر ورتالىقتا, مامانداردىڭ باقىلاۋىندا بولادى. مۇنداي كەزدە ناۋقاس ءۇشىن وپەراتسيادان كەيىنگى كۇتىم, العاشقى وڭالتۋ مەن ديناميكالىق باقىلاۋ جۇرگىزۋ وتە ماڭىزدى. الداعى كۇندەرى ءبىز وسىمەن اينالىسامىز», دەيدى الماتى بالالار جەدەل مەديتسينالىق كومەك كورسەتۋ ورتالىعى ۋرولوگيا ءبولىمىنىڭ مەڭگەرۋشىسى ازامات راەۆ.
الماتى
