اجالدىڭ اۋزىنان امان قالعان اندرەي سەرگەەۆيچتىڭ ءومىرىن ەرلىك پەن ءپاتريوتيزمنىڭ ۇلگىسى دەسە دە بولادى. قاۋىپتى قىلمىسكەرلەردى ۇستاۋ كەزىندە اۋىر جارالانعان, سول كەزدەن بەرى ون جىلدان اسا ۋاقىت ءوتىپتى. سىن ساعاتتا ءومىر مەن ءولىم اراسىندا قالعان اندرەي ۆولكوۆ پەن ونىڭ ەكى ارىپتەسى اۋرۋحاناعا جەتكىزىلگەن بولاتىن. ازاپتى كۇندەردى بىرگە باستان كەشىرگەن ارىپتەسىنىڭ بىرەۋى جاراقات سالدارىنان بىرنەشە جىلدان سوڭ قايتىس بولدى. ءيا, قىلمىستىق توپ مۇشەلەرىن ۇستاۋ كەزىندە العان جاراقات ءىز-ءتۇزسىز جازىلىپ كەتكەن جوق. تالاي تاعدىرعا اۋىر سىناق بەردى, جازىقسىز جانداردىڭ ءومىرىن ءۇزدى.
ساۋىردەگى سول وقىس وقيعانى پوليتسيا پودپولكوۆنيگى اندرەي ۆولكوۆ پەن ونىڭ ارىپتەستەرىنىڭ دەنەسىندەگى وتادان كەيىنگى تىرتىقتار ءار ۋاقىت ەسكە سالىپ تۇرادى. ارينە, ارنايى ءبولىم جىگىتتەرىنىڭ قىلمىسكەرلەردى ۇستاۋعا اتتانعان ءاربىر ساپارى قاۋىپ پەن قاتەرگە تولى. الايدا اندرەي سول كۇنگى شابۋىلداۋ وپەراتسياسىن ەسىنە تۇسىرگىسى دە كەلمەيدى.
«ادام ءومىرىنىڭ ءار ءساتى قاۋىپتى. جولدى كەسىپ ءوتىپ بارا جاتقان ادامنىڭ ءومىرى دە قىل ۇستىندە تۇرماي ما؟ ال قانقۇيلى قىلمىسكەرلەردەن كەلەتىن قاۋىپتى ايتپاسا دا تۇسىنىكتى», دەيدى ول. سول كۇنى كوپقاباتتى ۇيدەگى ءبىر پاتەرگە جاسىرىنعان قىلمىسكەرلەردىڭ ءۇيدىڭ كىرەبەرىسىندە اتىسىپ جاتقانى تۋرالى حابار تۇسەدى. ۋاقىت كەشكى 8-دەر شاماسى بولاتىن. پوليتسەيلەر وقيعا ورنىنا بىرنەشە مينۋتتا جەتىپ ۇلگەردى. ءۇي اۋلاسىندا قىلمىسكەرلەردى قارۋسىزداندىرۋ جانە قولعا ءتۇسىرۋ جۇمىستارى باستالىپ تا كەتىپتى. پوليتسەيلەر وتكىزگەن ارنايى وپەراتسيا بارىسىندا قىلمىسكەرلەر قۇرىققا ءتۇستى. بۇل قىلمىستىق توپ مۇشەلەرى ادام ءولتىرۋ جانە باسقا دا اسا اۋىر قىلمىستار جاسادى دەگەن كۇدىكپەن ۇستالدى.
ارنايى وپەراتسيانى قيىنداتقان جاعداي – اتىس-شابىستىڭ بەيبىت تۇرعىندار تۇراتىن ۇيدە بولعانى ەدى. اندرەي ۆولكوۆ شابۋىلداۋ توبىنىڭ قۇرامىندا قىلمىستىق توپتىڭ مۇشەلەرى بەكىنگەن پاتەرگە باسىپ كىرەدى. قارۋلى قىلمىسكەرلەردىڭ ءتارتىپ ساقشىلارىنا وڭايلىقپەن بەرىلمەيتىنى بەلگىلى. ەكى جاقتىڭ قايسىسىنا وق ءتيىپ, تاعدىر تالقانى تاۋسىلاتىنى دا بەلگىسىز. قىلمىستىق توپتىڭ جەتەكشىسىن ۇستاۋ كەزىندە گراناتا جارىلىپ, قىلمىسكەرلەردىڭ بىرەۋى قازا تاپتى, ال پوليتسيا قىزمەتكەرلەرى امان قالعانمەن, ءبىرازى اۋىر جاراقات الدى.
ولار ءتيىستى ەم قابىلداپ, ساۋىقتىرۋ شارالارىنان كەيىن ارادا التى اي وتكەندە قايتادان ساپقا تۇردى. اندرەي دە ارىپتەستەرىمەن بىرگە قىزمەتكە ورالعانمەن, پروتەز تابان ونىڭ قالىپتى ومىرىنە قيىندىق تۋدىرماي قويعان جوق. ارنايى بولىمدە قىزمەت وتكەرۋ ساۋ ادامنىڭ وزىنە وڭاي ەمەس, ال جاساندى تابانمەن ساقشىلىق قىزمەتتەگى سىنعا توتەپ بەرۋ, نورماتيۆتەر تاپسىرۋ قانشا قيىن بولعانمەن, ول ساۋ ادامداردان قالىسقان جوق. تۇلا بويىنداعى بۇكىل جىگەرىن جۇمسادى. جاراقاتتانعان قىزمەتكەرلەرگە قويىلاتىن تالاپ تا وزگەرگەن جوق. ويتكەنى ارنايى ءبولىمنىڭ ەڭ ەرەكشەلىگى دە وسىندا ەدى.
ا.ۆولكوۆ زەينەتكەرلىككە شىققاننان كەيىن ءىىم م.ەسبولاتوۆ اتىنداعى الماتى اكادەمياسىنا جۇمىسقا شاقىرىلدى. بۇگىندە ول ارنايى جەدەل ارەكەت ەتۋ جاساعىنىڭ بولاشاق قىزمەتكەرلەرىنە اتىس دايىندىعىنان ءدارىس بەرەدى. وفيتسەر-ۇستازدىڭ باستى مىندەتتەرىنىڭ ءبىرى – بولاشاق پوليتسيا قىزمەتكەرلەرىنە قارۋ قولدانۋدى ۇيرەتۋ, قاجەت بولعان جاعدايدا قارۋ اتۋعا پسيحولوگيالىق تۇرعىدان دايىن بولۋ. «قارۋعا قۇرمەتپەن قاراۋ كەرەك. ونىڭ ادام ءومىرىن ساقتاپ قالاتىن دا كەزدەرى كوپ. مەن ءۇشىن بولاشاق وفيتسەرلەرمەن قويان-قولتىق ارالاسۋ وتە قىزىق. ساباقتار تيردە جانە وقۋ پوليگونىندا وتەدى. پوليتسيادا جۇمىس ىستەۋ وتە جاۋاپتى شەشىم, سوندىقتان دا ۇنەمى ولارعا «پوليتسياعا كەلمەس بۇرىن جاقسىلاپ ويلانىڭىز. ەڭ الدىمەن, ء«سىز پوليتسياعا جۇكتەلگەن جاۋاپكەرشىلىكتى كوتەرە الاسىز با؟» دەگەن سۇراقتى ءجيى قويامىن. ەڭ باستىسى, قيىن ساتتە ءبىرىن-ءبىرى ساتپاۋ كەرەك», دەيدى اندرەي سەرگەەۆيچ.
ء«بىز تىڭداۋشىلاردى باتىلدىق پەن پاتريوتيزمگە تاربيەلەگەندە ولارعا ءوزىمىز ۇلگى بولۋىمىز كەرەك. ماڭىزدى مىندەتتەردىڭ ءبىرى – پوليتسيا قىزمەتكەرلەرىن تاربيەلەۋ جانە كاسىبي بىلىكتىلىگىن ارتتىرۋ جۇمىستارىنا ارداگەرلەردى كەڭىنەن تارتۋ. ءبىز ارداگەرلەردىڭ الەۋەتىن پايدالانا وتىرىپ, تالىمگەرلىك ينستيتۋتىن دامىتۋمەن قاتار ولاردى ۇستازدىق قىزمەتكە دە شاقىرامىز. قۇقىقتىق ءتارتىپ ماسەلەسىنە كەلگەندە ءوز ىسىنە بەرىلگەن ازاماتتاردىڭ بەيجاي قالماي, باي تاجىريبەلەرىمەن بولىسەتىنى قۋانتادى. سولاردىڭ ءبىرى – پوليتسيا پودپولكوۆنيگى ا.ۆولكوۆ», دەيدى الماتى اكادەمياسىنىڭ بۇرىنعى باسشىسى, تاياۋدا عانا ىشكى ىستەر ءمينيسترىنىڭ ورىنباسارى لاۋازىمىنا تاعايىندالعان پوليتسيا گەنەرال-مايورى ايدار سايتبەكوۆ.
ا.ۆولكوۆ ىشكى ىستەر ورگاندارىنا 2005 جىلى كەلدى. ونى ءتارتىپ ساقتاۋ سالاسىنا جەتەلەگەن بالا كەزىندەگى ارمانى ەدى. ول ارمانى توسىننان پايدا بولعان جوق. اندرەي بالا كەزىنەن ارنايى جەدەل ارەكەت ەتۋ جاساعىندا ىستەيتىن اكەسى سەرگەي ارحيپوۆتىڭ سىمداي تارتىلعان جۇرىسىنە, قىلاۋ جۇقتىرماي قۇرمەتتەيتىن پوگوندى كيىمىنە قىزىعىپ ءوستى. سول قىزىعۋشىلىق كەيىن ارمانىنا اينالىپ, فورما كيگەن ادامدارعا دەگەن قۇرمەتكە اۋىستى.
سەرگەي يۆانوۆيچ اندرەيدىڭ بويىنا بالا كەزىنەن-اق جاۋاپكەرشىلىك, باتىلدىق سياقتى قاسيەتتەردى ءسىڭىرىپ ءوسىردى. سوندىقتان بولار اندرەي اسكەردەن كەيىن ماماندىق تاڭداۋ تۋرالى ماسەلە تۋىنداعان كەزدە ويلانباستان پوليتسيانى تاڭدادى. ىشكى ىستەر ورگاندارىندا ۇزاق جىل قىزمەت ەتكەن وفيتسەر كوپ قيىندىق كورگەنىمەن, وسى ماماندىقتى تاڭداعانىنا ەشقاشان وكىنگەن ەمەس. ارينە, ا.ۆولكوۆتىڭ پوليتسياداعى ءومىرى وڭاي بولعان جوق. سوندا دا ول ءوزىنىڭ ءجاسوسپىرىم ۇلىنا ادام ومىردەگى ءوز جولىن جۇرەگىنىڭ قالاۋىمەن تاڭداۋى كەرەك ەكەنىن ءجيى ايتادى. «ەشتەڭەگە وكىنبەيمىن. ءيا, ءبىر كۇنىڭ ءساتسىز بولسا دا, بۇكىل ءومىر ساتسىزدىكتەن تۇرمايدى. ادامنىڭ ءوز ءومىرى ءوز قولىندا, اركىم ءوز تاعدىرىنىڭ ساۋلەتشىسى». ونىڭ ومىرلىك فيلوسوفياسى وسىنداي.
