سۋرەتتى تۇسىرگەن – ەرلان ومار, «EQ»
«قازاق گازەتتەرى» سەرىكتەستىگى مەن ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى مەموراندۋم جاساسىپ, بىرنەشە جىلدان بەرى ماڭىزدى قۇجات اياسىندا تىزە قوسىپ, بىرلەسكەن يگى ءىستى جۇزەگە اسىرىپ كەلەدى. يگىلىكتى ىنتىماقتاستىقتىڭ كورىنىسى رەتىندە ۋنيۆەرسيتەت ستۋدەنتتەرى تاجىريبەلىك ساباقتى باستاپ كەتتى. العاشقى ساباقتىڭ باسقوسۋىندا «قازاق گازەتتەرى» جشس-نىڭ باس ديرەكتورى ديحان قامزابەك ۇلى بۇقارالىق اقپارات قۇرالدارىنىڭ جاڭعىرىپ, جاڭا كەزەڭگە ءوتۋ ۇدەرىسى ءجۇرىپ جاتقانىن ايتتى.
ستۋدەنتتەر قارا شاڭىراقتا ۇلكەن سىننان ءوتىپ, مول تاجىريبە جينايتىنىن, جۋرناليست قوعام اعىمىنا وراي, تالابىنا ساي تۇشىمدى دۇنيە ۇسىنا الۋعا ءتيىس ەكەنىن جەتكىزدى. بولاشاق جۋرناليستەر گازەت رەداكتسياسىنداعى بىلىكتى, بىلگىر تاجىريبەلى مامانداردىڭ قايراۋى مەن شىڭداۋىنان ءوتىپ, ىسىلۋى قاجەتتىگىن ەسكەرتتى.
جۋرناليستيكا جانە ساياساتتانۋ فاكۋلتەتىنىڭ دەكانى قايرات ساق گازەت رەداكتسياسىمەن ۋنيۆەرسيتەتتە فاكۋلتەت قۇرىلعان كەزدەن باستاپ ارىپتەستىك بايلانىس ورناتىلعاندىقتان ەكىجاقتى مەموراندۋم اياسىندا بىرلەسكەن يگى ءىس الداعى ۋاقىتتا دا جالعاسىن تاباتىنىن جەتكىزدى. قايرات ساق كەيىنگى جىلدارى ەۋرازيا ۋنيۆەرسيتەتىنىڭ جۋرناليستيكا جانە ساياساتتانۋ فاكۋلتەتىندە وقۋعا ىنتالى ستۋدەنتتەردىڭ قاتارى ارتىپ كەلە جاتقانىن ايتتى. 105 جىلدىق تاريحى بار باسىلىم, قازاق جۋرناليستيكاسىنىڭ ۇستاحاناسىنا اينالعان رەداكتسيادا ستۋدەنتتەردىڭ تاجىريبەسىن شىڭداۋىنا ءورىس اشقان ۇجىم باسشىلىعىنا العىسىن ءبىلدىردى.
«قازاق گازەتتەرى» سەرىكتەستىگى باس ديرەكتورىنىڭ ورىنباسارى قامبار احمەت تەوريانى پراكتيكامەن ۇشتاستىرۋدىڭ تيىمدىلىگىن ايتا كەلە, بۇگىنگى باستاما تالاپكەر جاستاردىڭ شىڭدالۋىنا جان-جاقتى مۇمكىندىك بەرەتىنىنە توقتالدى. بۇعان دەيىن وسىنداي دارىستەرگە قاتىسقان ەۇۋ-دىڭ بىرنەشە تۇلەگى بۇگىندە ەل گازەتىندە ەڭبەك ەتىپ جۇرگەنىن اتاپ ءوتتى.
جۋرناليستيكا جانە ساياساتتانۋ فاكۋلتەتى, ءباسپاسوز جانە باسپا ءىسى كافەدراسىنىڭ مەڭگەرۋشىسى امانگەلدى شۇرەنتاەۆ ستۋدەنتتەردىڭ رەداكتسيادا تاجىريبەدەن ءوتۋى, ەڭ الدىمەن, وزدەرىنىڭ الەۋەتىن تانىتۋىنا زور مۇمكىندىك ەكەنىن ايتتى.
«قازىرگى مەديانىڭ مەنەدجمەنتى جانە ماركەتينگى» اتتى پراكتيكالىق ساباقتىڭ العاشقى ءدارىسىن «Egemen Qazaqstan» گازەتىنىڭ ينتەرنەت رەداكتسيا جەتەكشىسى قۋات اۋەسباي وتكىزدى.
