كوللاجدى جاساعان – زاۋرەش سماعۇل, «EQ»
ۇلىتاۋ وبلىسى 2022 جىلى قۇرىلعانمەن, وبلىستاعى پوشتا قىزمەتى وتكەن جىلدىڭ سوڭىنا دەيىن «قازپوشتا» اق قاراعاندى وبلىستىق فيليالىنىڭ قۇرامىندا بولىپ كەلدى. 2023 جىلدىڭ قازان, قاراشا ايلارىندا ۇلىتاۋ وبلىستىق فيليالىن قۇرۋ تۋرالى شەشىم قابىلدانعاننان كەيىن عانا ەكى ارادا ءبولۋ جۇمىستارى باستالدى. بۇل شارا باسپاسوزگە جازىلۋ ناۋقانىنا كادىمگىدەي كەرى اسەرىن تيگىزدى. ويتكەنى باعدارلامانىڭ دۇرىس ورناتىلماۋى سالدارىنان گازەت-جۋرنالداردىڭ باعاسى قاتە كورسەتىلىپ, ءبىراز تۇسىنبەۋشىلىك تۋدىردى. سول كۇندەرى وسى جاعدايعا دابىل قاعىپ, بىزبەن حابارلاسقان ازاماتتار دا از بولعان جوق. سولاردىڭ ءبىرى كاسىپكەر قياسبەك ادىلباەۆ پوشتا قىزمەتىنە دەگەن رەنىشىن: «جەكە شارۋاشىلىعىما بايلانىستى نەگىزىنەن قالادان سىرتتا جۇرەمىن. گازەت-جۋرنالدارعا جازىلۋ ءۇشىن ادەيى كەلسەم, پوشتانىڭ باعدارلاماسى جۇمىس ىستەمەيدى ەكەن. «ەرتەڭ كەلىڭىز» دەيدى. ال ەرتەڭ ىستەپ كەتەتىنىنە كەپىلدىك بار ما؟», دەپ باستاپ, ودان ءارى پوشتا قىزمەتىن «ەلىمىزدەگى تسيفرلاندىرۋ باعدارلاماسىنان شەت قالعان سالا» رەتىندە باعالايتىنىن جەتكىزگەن ەدى.
«پوشتاعا بارساڭ تەك قولما-قول اقشا تالاپ ەتەدى. قازىر ەلدىڭ كوبى قالتاسىنا اقشا سالىپ جۇرمەيدى. پوشتانىڭ موبيلدىك اۋدارىمداردى قابىلداۋعا دايىن ەمەستىگى, قابىلەتسىزدىگى تاڭعالدىرادى», دەپ تۇرعىن ءسوزىن ناقتىلاي ءتۇستى. شىنىندا سولاي. بۇعان ءوزىمىز دە سان مارتە كۋا بولعانبىز. بۇل – قازىرگى ۋاقىتتا پوشتا قىزمەتىندەگى تەز ارادا جوندەۋدى قاجەت ەتەتىن ەڭ باستى كەمشىلىكتەردىڭ ءبىرى.
«باعدارلاما دۇرىستالدى-اۋ» دەگەن كەزدە مالىمەتتەر بازاسىن انىقتاۋدىڭ قيىندىعى تۋىندادى. تۇرعىندارعا گازەتكە قانشا دانا جازىلعانىن ءبىلۋ مۇمكىن بولمادى. وبلىس ورتالىعىنداعى ماماندار «بۇرىن مۇنداي ىسپەن قاراعاندى اينالىسقانىن, وزدەرىنىڭ تاجىريبەسىزدىگىن» ايتىپ اقتالىپ باقتى.
مۇنىڭ ءبارىن نەگە ايتىپ وتىرمىز؟ ويتكەنى 2024 جىلدىڭ باسىنان ءوز الدىنا بولەك فيليال بولىپ قۇرىلعان ۇلىتاۋ پوشتاسى سول ءبىر بايقالعان كەمشىلىكتەردى ەڭسەرىپ, تەز ارادا بويىن تىكتەپ الا قويار ما ەكەن؟ «قازپوشتا» اق ۇلىتاۋ وبلىستىق فيليالى ديرەكتورىنىڭ مىندەتىن اتقارۋشى ا.بولاتبەكوۆ جاعدايدىڭ كۇردەلى ەكەنىن ايتادى. ەڭ باستى ماسەلە – مامانداردىڭ جەتىسپەيتىندىگى. قازىر فيليالدا, باسقاسىن ايتپاعاندا, باس ەسەپشىنىڭ ورنى بوس تۇر. ارينە, جاڭادان قۇرىلىپ جاتقان فيليالدىڭ ۇيىمداستىرۋ شارۋالارى شاشەتەكتەن بولاتىنى تۇسىنىكتى. بۇرىن بۇل سالادا ىستەمەگەن مامانداردىڭ جۇمىستى يگەرىپ كەتۋى وڭاي ەمەستىگى دە بەلگىلى. قاراپايىم عانا باسپاسوزگە جازىلۋ مالىمەتتەرىن الىپ بەرە الماۋ – وسى ءسوزىمىزدىڭ ءبىر دالەلى. دەمەك, مامانداردى قايتا وقىتۋ, ۇيرەتۋ كەرەك.
اياعىنان نىق تۇرىپ كەتكەنشە ۇلىتاۋ فيليالىنا «قازپوشتانىڭ» رەسپۋبليكالىق باسشىلىعى تاراپىنان قارجىلاي كومەك قاجەتتىگى انىق سەزىلىپ وتىر. ويتكەنى فيليال ورنالاسقان عيماراتقا كۇردەلى جوندەۋ جاساۋ قاجەت. عيماراتتىڭ ءىشى-سىرتى كوز جاۋىن الىپ, ەلدى وزىنە انادايدان تارتىپ تۇرۋى دا, ىشىندەگى كابينەتتەرى دە قىزمەتكەرلەردىڭ جۇمىس ىستەۋىنە بارىنشا قولايلى بولۋ كەرەكتىگىن ايتىپ جاتۋدىڭ ءوزى ارتىق. ال قازىرگى عيمارات تالاپقا مۇلدەم ساي كەلمەيدى. ءبىر جاقسىسى, فيليالدىڭ ماتەريالدىق-تەحنيكالىق بازاسىن جاڭالاۋعا قازىردىڭ وزىندە قاجەتتى كومەك كورسەتىلە باستاعان. بىراق سوعان قوسا جاڭا فيليالدى بىلىكتى ماماندارمەن قامتاماسىز ەتۋ جاعىن دا رەسپۋبليكا ءوز باقىلاۋىندا ۇستاپ, ءجىتى نازارعا العاندارى ءجون. بالكىم, باسقا وڭىرلەردەن بىلىكتى مامانداردى تارتۋ كەرەك شىعار؟ بىراق ولاردىڭ الەۋمەتتىك-تۇرمىستىق جاعدايى قالاي شەشىلەدى؟ مۇنى وبلىستىق فيليال وزدىگىنەن شەشە المايتىنى تاعى تۇسىنىكتى.
پوشتا قىزمەتىن كوپشىلىك وزدەرىنە حات-حاباردى قالاي جەتكىزۋىنە قاراپ باعالايدى. ارينە, قازىر بۇرىنعىداي حات تاسقىنى جوق. قازىرگى پوشتاشىلاردىڭ مىندەتى – گازەت-جۋرنالداردى ۋاقتىلى جەتكىزۋ. كۇن سايىن شىعاتىن, اپتالىق باسىلىمدار بار. بىراق كۇن سايىن گازەت تاسيتىن پوشتاشى جوق. ولار گازەت-جۋرنالداردى اپتاسىنا ءبىر رەت قانا جەتكىزەدى. قالالىق جەردىڭ وزىندە جاعداي وسىنداي بولعاندا, الىس اۋىلدارعا كۇن سايىن گازەت-جۋرنال جەتكىزىلمەيتىنى ايتپاسا دا ءمالىم.
وبلىستىڭ بارلىق اۋىلىندا پوشتاشى بار. ولار ونسىز دا جارىتىمسىز جالاقىنىڭ جارتىسىنا جۇمىس ىستەيدى. رەسپۋبليكالىق پوشتانىڭ جاڭا باسشىلىعى كەيىنگى كەزدە ولاردى دا سىياقىدان قالدىرمايتىن بولىپتى. قارجىلاي قولداۋ قىزمەتكەردىڭ جۇمىسقا دەگەن ىنتاسىن ارتتىرارى انىق.
«ەگەر ەلدى مەكەندەگى حالىق سانى 2 مىڭنان اسسا, مۇنداي جەرلەردە پوشتا بولىمشەسى اشىلسىن». رەسپۋبليكالىق «قازپوشتا» قازىر وسىنداي تالاپ قويا باستادى. قۇپتارلىق قادام. جەزقازعان مەن ساتباەۆ قالالارىنىڭ ورتاسىندا ورنالاسقان كەڭگىر اۋىلى بۇل تالاپقا ساي كەلگەنمەن, عيمارات تابۋ, ونى ۇستاپ تۇرۋ شىعىندارىنا بارعىسى جوق وبلىستىق فيليال بولىمشە اشقىسى كەلمەيتىن سىڭايلى. ماسەلەنىڭ قالاي شەشىمىن تاباتىنىن العى كۇندەر كورسەتە جاتار.
«قازپوشتا» اق ۇلىتاۋ وبلىستىق فيليالى ديرەكتورىنىڭ مىندەتىن اتقارۋشى ا.بولاتبەكوۆ جەزقازعان, ساتباەۆ قالالارىندا بۇرىن جابىلىپ قالعان ەكى ءبولىمنىڭ قايتادان اشىلاتىنىن جەتكىزدى. بۇل دا ارينە, قۋانىشتى حابار. ايتپەسە, 70 مىڭنان اسا حالقى بار ساتباەۆ قالاسىندا جالعىز عانا پوشتانىڭ قىزمەت كورسەتۋىن قالاي باعالاۋعا بولادى؟ حات-حابار ازايعانمەن, قازىرگى كەزدە پوشتاداعى زاتتاي سالەمدەمە تاسىمالىنىڭ اۋقىمى مولايعانى بايقالادى. ويتكەنى پوشتاعا قاشان بارساڭ دا ۇزىن-سونار كەزەكتى كورەسىڭ. مۇندايدا ساپالى قىزمەت كورسەتۋ تۋرالى ءسوز قوزعاپ تا كەرەگى شامالى. بۇرىنعى پوشتا بولىمدەرىن قايتادان اشۋ جۇمىستى جاقسارتۋ, تۇرعىندارعا قولايلىلىق تۋدىرۋ ماقساتىنان تۋىنداعانى كۇمانسىز.
ارينە, كىنا ارتۋ وڭاي. كەمشىلىكسىز قىزمەت بولمايتىنى تاعى راس. بىراق تۇزەتۋگە ءتيىستى نارسەنى قولعا الماي بولمايدى. جانە دەر كەزىندە تۇزەتۋگە ۇمتىلعان ءجون. «قازپوشتادان» كۇتەرىمىز سول عانا.
ۇلىتاۋ وبلىسى
