قار قۇرساۋىنان قۇتقارىلدى

وبلىستىق توتەنشە جاعدايلار دەپار­تامەنتى قوعاممەن بايلانىس توبى­نىڭ مالىمەتىنە سۇيەنسەك, العاشقى شا­قىرۋ يندەر اۋدانىنان تۇسكەن. اۋدان ورتالىعى – يندەربور كەنتىنەن ءۇش ادام مال ىزدەۋگە شىققان. الايدا ولار كەرى ورالماعان.

«مال ىزدەۋگە شىققان ءۇش ادامنىڭ حابار-وشارسىز كەتكەنى تۋرالى 9 قاڭتاردا ساعات 23:05-تە حابار كەلىپ ءتۇستى. وسىعان بايلانىستى يندەر اۋداندىق توتەنشە جاعدايلار ءبولىمىنىڭ قىزمەتكەركەرلەرى جەدەل ىزدەستىرۋ-قۇتقارۋ جۇمىستارىنا تارتىلدى. جوعالعان 1977, 1984 جانە 1990 جىلعى ءۇش جىگىت سول كۇنى ساعات 08:00-دە «Toyota Land Cruiser-100» ماركالى اۆتوكولىكپەن باتىس قازاقستان وبلى­­سىنىڭ اقجايىق اۋدانى, جانا­ما اۋى­لىنا قاراي مال ىزدەۋگە شىق­قان. الايدا ولار كەرى ورالماعان, باي­لا­­نىس­قا شىقپاعان», دەپ حابارلادى دە­پارتامەنتتىڭ قوعاممەن بايلانىس توبى.

دالادا قالعان ءۇش ادامدى ىزدەۋ 10 قاڭتاردا ءساتتى اياقتالدى. تاڭعى ساعات 05:20 شاماسىندا جوعالعان ادامدار «ايۋ» قىستاعىنىڭ ماڭىنان تابىلىپ, قاۋىپسىز جەرگە جەتكىزىلدى. «ايۋ»  قىستاعى يندەربور كەنتىنەن 35 شاقىرىم قاشىق­تىقتا ورنالاسقان.

ال ماقات اۋدانىنان ءۇش جىگىت 9 قاڭ­تاردا ماقات اۋدانىنداعى دوسسور كەنتىنەن جولعا شىققان. بىراق ولار قىزىلقوعا اۋدانىنداعى قاراباۋ اۋىلىنا جەتە الماعان.

«تۋىستارىنان جىگىتتەردىڭ جوعالعانى تۋرالى حابار 10 قاڭتاردا ساعات 00:00-دە ءتۇستى. سودان بەرى ولاردى  ىزدەۋ توق­تا­تىلعان جوق. توتەنشە جاعدايلار د­ەپار­تامەنتىنىڭ قۇتقارۋشىلارى 11 قاڭتاردا ساعات 03:20-دا حابار-وشارسىز كەتكەن جىگىتتەردى قىزىلقوعا اۋدانىنداعى «ارازمولا» ۋچەسكەسىنەن تاپتى. ولار دوسسور كەنتىنەن اتالعان ۋچاسكەگە دەيىن 120 شاقىرىم جول جۇرگەن. بىراق جولدا كولىك باتىپ, بايلانىسقا شىعا الماعان», دەپ حابارلادى دەپارتامەنتتىڭ قوعاممەن بايلانىس توبى.

قار قۇرساۋىندا قالسا دا كومەك كەلەرىنەن ءۇمىت ۇزبەگەن جىگىتتەردىڭ ۇلكەنى – 39-دا, ەكىنشىسى 37 جاس­تا بولسا, كىشىسى 1996 جىلى تۋعان. جولاۋشىلاردىڭ كولىگى باتقان قىزىلقوعا اۋدانىندا قىس قاھارىنا ءمىنىپ تۇر. اۋا تەمپەراتۋراسى -20 گرادۋسقا دەيىن تومەندەگەن, دالادا جاياۋ بۇرقاسىن بار. جەلدىڭ ەكپىنى – سەكۋندۋىنا 15-20 مەتر. 

«اۋا رايىنىڭ وسىنداي قولايسىز­دىعىنا قاراماستان توتەنشەلىكتەر ىزدەۋ جۇمىسىن توقتاتقان جوق. «قازاۆياقۇتقارۋ» اق-نىڭ مي-8 تىك­ۇشاعىمەن اۋەدەن بارلاۋ جۇرگىزىلدى. قۇت­قارۋشىلارمەن بىرگە پوليتسيا قىز­مەت­كەرلەرى مەن ەرىكتىلەردەن جانە تۋىستارىنان قۇرالعان ءۇش توپ ەلدى مە­كەندەردى, قىستاقتاردى, دالالىق جولدىڭ قالتارسى تۇسىن ءجىتى شولىپ, كۇنى-ءتۇنى ىزدەۋدى جال­عاستىردى», دەپ ءمالىم ەتتى دەپار­تامەنتتىڭ قوعاممەن بايلانىس توبىنان.

ال 11 قاڭتاردا ساعات 12:07-دە ماقات اۋدانىنىڭ تۇرعىنى №8 ءورت ءسوندىرۋ ءبولىمىنىڭ بايلانىس بەكەتىنە حابارلاسىپ, جولدا قالعانىن ايتقان. ەكى ەر ادام بەلقۇدىق ەلدى مەكەنىنە باعىت العانىمەن, كولىك قارعا باتىپ قالعان.

«ماقات كەنتىنەن 25 شاقىرىم قا­شىقتاعى بەلقۇدىق ەلدى مەكەنىنىڭ تۇ­سىندا «Toyota» كولىگىنىڭ باتىپ قال­عانى انىقتالدى. كولىكتەگى 1956 جانە 1969 جىلعى ەكى ازامات قاۋىپسىز جەرگە ەۆاكۋا­تسيالاندى» دەپ اقپارات تاراتتى دەپار­تامەنتتىڭ قوعاممەن بايلانىس توبى.

اتىراۋ وبلىسى