قار باسقان ءتۇنى «وبلشىعىسجول» جشس قىزمەتكەرلەرى جەتى تەحنيكا جۇمىلدىرعانىمەن, ەكى مەترگە جۋىق تۇسكەن قاردى ارشىپ الۋ قيىنعا سوققان. توننا تارتاتىن تراكتورلاردىڭ وزىنە دەس بەرمەگەن سوڭ وبلىس ورتالىعىنان تاعى دا قوسىمشا تەحنيكالار جولعا شىققان...
قار قۇرساۋى كولىك قوزعالىسىن شەكتەپ قانا قويماي, شالعاي اۋىلداعى ناۋقاسقا اسىققان مەديتسينا قىزمەتكەرلەرىنىڭ دە قولىن بايلادى. وبلىستىق دەنساۋلىق ساقتاۋ باسقارماسىنىڭ مالىمەتىنە سۇيەنسەك, توسقايىڭ اۋىلىنىڭ 71 جاستاعى تۇرعىنى يشەميالىق ينسۋلت العان. جەدەل جاردەم جەتە الماعان, تىكۇشاقتىڭ ۇشۋىنا دا تىيىم سالىنعان. سوندىقتان پاتسيەنتكە كومەك دەر كەزىندە كورسەتۋ مۇمكىن بولماعان. توسقايىڭ اۋىلىنداعى اۋىر ناۋقاستى امان الىپ قالۋ ءۇشىن امال جوق ەمەس ەدى. مەديتسينالىق كومەك كورسەتۋ ءۇشىن 16 قاڭتار كۇنى وبلىستىڭ باس رەانيماتولوگى, سانيتارلىق اۆياتسيانىڭ فەلدشەرى تىكۇشاقپەن توسقايىڭعا تارتقان. اۋەلدە دارىگەرلەر قار بەتىمەن جورعالايتىن كولىك ءمىنىپ, جولعا شىققان.
«كەشە ساناۆياتسيانىڭ باس رەانيماتولوگى, فەلدشەرى توتەنشە جاعدايلار دەپارتامەنتىنىڭ جول تالعامايتىن كولىگىنە ءمىنىپ, جولعا شىققان. ۇرانحاي اۋىلىنا جەتكەنىمەن, ءارى قاراي تاعى 65 شاقىرىم جول وڭايعا سوقپاعان. بۇگىن, ياعني 16 قاڭتار كۇنى مەديتسينا قىزمەتكەرلەرى كومەك اپارا جاتقان تىكۇشاقپەن جەتىپ, 71 جاستاعى ناۋقاستى وسكەمەنگە جەتكىزدى. دارىگەرلەر وبلىستىق اۋرۋحانادا قاجەتتى ەم-دومدى جاسايدى. ناۋقاس بىرقالىپتى اۋىر حالدە», دەپ مالىمدەدى دەنساۋلىق ساقتاۋ باسقارماسىنىڭ ماماندارى.
ءيا, قاتارداعى كولىكتەردى قويىپ, تجد-ءنىڭ جول تالعامايتىن كولىكتەرى دە قالىڭ قاردان جۇرە الماي, كىدىرىپ قالعان. سوعان قاراماستان جاۋاپتى ورىندار تابيعاتتىڭ توسىن مىنەزىمەن كۇرەسىپ, جولدى قاردان ارشۋ جۇمىستارى ۇزدىكسىز جۇرگىزىلىپ جاتىر. كەيبىر جەرلەردە قاردىڭ قالىڭدىعى 2 مەترگە جەتكەن. قاردىڭ ءتۇسۋ نورماسىنىڭ اسىپ كەتۋىن جانە ەلدى مەكەندەرگە كولىك قاتىناسىنىڭ بولماۋىن ەسكەرە وتىرىپ, كۇرشىم اۋدانىنىڭ اكىمدىگى جەرگىلىكتى اۋقىمداعى تابيعي سيپاتتاعى توتەنشە جاعداي جاريالادى. شقو كولىك جانە اۆتوموبيل جولدارى باسقارماسى ماماندارىنىڭ دەرەكتەرى بويىنشا جول ءجۇرۋدى قامتاماسىز ەتۋ ءۇشىن قوسىمشا تەحنيكا جونەلتىلدى. قازىرگى ۋاقىتتا ارنايى تەحنيكانىڭ 24 بىرلىگى جۇمىلدىرىلعان. الايدا بورانعا بايلانىستى جۇمىس ىستەۋ ءالى قيىندىق تۋدىرىپ تۇر. سونداي-اق كۇرشىم اۋدانىنا قاجەتتى كومەك كورسەتۋ ءۇشىن شقو بويىنشا تج دەپارتامەنتىنىڭ جوعارى وتپەلى تەحنيكاسى كەلدى.
– قار مولشەرى وتە كوپ. ونىڭ ۇستىنە جەل مەن قاردىڭ ىلعالى جۇمىسقا كەدەرگى كەلتىرىپ تۇر. مارقاكول ورمان شارۋاشىلىعىنىڭ تەحنيكاسى كۇرەپ وتكەن جولدى قايتا قار باسىپ قالماۋى ءۇشىن كۇن-ءتۇن دەمەي كۇرەپ جاتىر. شاناعاتىدا كۇن رايىنا بايلانىستى ەلەكتر جەلىسى ءسونىپ قالعان. ونى «التايەنەرگو» ماماندارى قالپىنا كەلتىرەدى. مارقاكول – توسقايىڭ اراسىنداعى جول بويىندا تەحنيكالار تىنىمسىز جۇمىس جۇرگىزىپ جاتىر. تۇرعىندار تۇسىنىستىك تانىتىپ, سابىر ساقتاسا ەكەن, – دەيدى كۇرشىم اۋدانى اكىمىنىڭ ورىنباسارى قايرات ازىمباەۆ.
مارقاكول جانە توسقايىڭ اۋىلدىق وكرۋگتەرى مەكتەپتەرىنىڭ وقۋشىلارى 8 قاڭتاردان باستاپ قاشىقتان وقىتۋ فورماتىنا اۋىستىرىلدى. ايتىپ وتكەندەي, وكرۋگتەردىڭ تۇرعىندارىنا قاجەتتى ازىق-ت ۇلىك پەن دارىلىك زاتتاردى جەتكىزۋ ءۇشىن تىكۇشاق جىبەرىلدى. جاعداي – جەرگىلىكتى اتقارۋشى ورگانداردىڭ باقىلاۋىندا.
شىعىس قازاقستان وبلىسى,
مارقاكول اۋدانى
