ەڭبەكشىقازاق اۋدانىنىڭ ەسىك قالاسىندا قاڭتاردىڭ 9-ى مەن 14-ءى كۇندەرى ارالىعىندا وتكەن ەرلەر مەن ايەلدەر اراسىنداعى توعىزقۇمالاقتىڭ كلاسسيكا, راپيد, بليتس تۇرلەرى بويىنشا باق سىناسقان سايىسقا 90-عا جۋىق سپورتشى قاتىستى. تارتىستى باسەكەدە ءوڭىردىڭ قوناەۆ قالاسى مەن قاراساي, ىلە, تالعار, ۇيعىر, جامبىل اۋداندارىنان قاتىسقان توعىزقۇمالاق شەبەرلەرى جەكەلەي سىندا شىن جۇيرىكتەر قاتارىنان كورىنىپ, جەڭىمپازدار تۇعىرىنا كوتەرىلدى.
«الماتى وبلىسىندا توعىزقۇمالاق ۇلتتىق سپورت ءتۇرى كەڭىنەن دامىپ كەلەدى. ويىنشىلار اراسىندا رەسپۋبليكالىق جارىستاردىڭ چەمپيوندارى از ەمەس, ازيا جانە الەم چەمپيوناتتارىنا قاتىسىپ, جۇلدەگەر اتانعاندار دا بار. وسى ورايدا وبلىستىڭ شالعاي اۋداندارىندا ۇلتتىق سپورتتىڭ ورتالىقتارىن, ۇيىرمەلەرى مەن مەكتەپتەرىن اشۋدىڭ ماڭىزدىلىعى ارتىپ وتىر. سونىمەن قاتار سپورتشىلاردى ىنتالاندىرۋ ماقساتىندا باعالى سىيلىقتار مەن ءتۇرلى جەڭىلدىكتى دە قاراستىرۋ قاجەت. وبلىس كولەمىندە وتەتىن كەلەسى چەمپيوناتتاردا وسى اتالعان ماسەلەلەردى قولعا الماقشىمىز», دەيدى الماتى وبلىستىق توعىزقۇمالاق سپورتى فەدەراتسياسىنىڭ پرەزيدەنتى جاراس نيازبەك.
وبلىستىق چەمپيوناتتىڭ قورىتىندىسىندا جارىس جەڭىمپازدارىمەن قاتار, وتكەن جىلدىڭ ۇزدىك سپورتشىلارى مەن جاتتىقتىرۋشىلارىنا دا ارنايى ديپلومدار مەن سىيلىقتار تابىس ەتىلدى.
الماتى وبلىسى
