فيفا جىلدىڭ ۇزدىك فۋتبولشىسىن انىقتادى

The Best FIFA Football Awards ماراپاتتاۋ كەشىندە 36 جاستاعى ارگەنتينا قۇراماسىنىڭ كاپيتانى, «ينتەر مايامي» فۋتبول كلۋبىنىڭ ويىنشىسى ليونەل مەسسي جىلدىڭ ەڭ ۇزدىك ەر فۋتبولشىسى اتاندى.

ول ۇيىم ۇيىتقى بولاتىن وسى كەشتىڭ باستى اتالىمىندا قاتارىنان ەكىنشى جىل, كاسىبي مانسابىندا ءۇشىنشى رەت ۇزدىك دەپ تانىلدى. 

ماراپاتتى تابىستاۋشىلار ۇزدىكتى انىقتاۋ بارىسىندا مەسسيدىڭ 2023 جىلى فرانتسيانىڭ «پسج» قۇراماسى مەن  «ينتەر مايامي» ساپىندا Leagues Cup ءتۋرنيرىنىڭ جەڭىمپازى بولعانىن مەڭزەگەن. ول وسىلايشا فۋتبول تاريحىنداعى ەڭ تيتۋلدى ويىنشى بولدى. بۇرىن بۇل اتاق «بارسەلوناداعى» بۇرىنعى ارىپتەسى داني الۆەسكە تيەسىلى ەدى.

الايدا مەسسي ماراپاتتاۋ راسىمىنە قاتىسپادى. وعان تيەسىلى جۇلدەنى ۇزدىككە جەتكىزۋ ءۇشىن سالتاناتتى جيىننىڭ جۇرگىزۋشىسى, بۇرىنعى ارىپتەسى تەرري انري الدى.

وسى اتالىمدا ۇمىتكەرلەر قاتارىندا «مانچەستەر ءسيتيدىڭ» نورۆەگيالىق شابۋىلشىسى ەرلينگ حولاند پەن فرانتسۋزدىق «پسج» جۇلدىزى كيلليان مباپپە بولعان ەدى.

ال فيفا نۇسقاسىندا الەمنىڭ ۇزدىك ايەل فۋتبولشىسى نوميناتسياسىن 25 جاستاعى يسپانيالىق ويىنشى ايتانا بونماتي جەڭىپ الدى.