فوتو: ەرلان ومار
«وزىق ويلى ۇلت: ءمانى مەن مىندەتى» دەگەن تاقىرىپتا وربىگەن باسقوسۋعا فيلوسوفيا عىلىمدارىنىڭ دوكتورى, پروفەسسور تولەۋعالي بورىباەۆ, تاريحشى, ءماجىلىس دەپۋتاتى ەركىن ءابىل, كۇيشى, كومپوزيتور جانعالي ءجۇزباي, جۋرناليست وڭايگۇل تۇرجان, قاتىسىپ, ەلدىك مۇرات-مۇددە جولىنداعى شەشىلۋى ءتيىس ماسەلە تۋرالى سوقتالى پىكىر ايتتى.
«بۇگىنگى كۇندە وزىق ويلى ۇلتتى قالىپتاستىرامىز دەسەك, مادەنيەتتىڭ دامۋىن تەرەڭدەتىپ, ءتىل ماسەلەسىن وڭتايلى شەشىپ, ءدىلىمىزدى, سالت-ءداستۇرىمىزدى دامىتۋىمىز قاجەت», دەدى تولەۋعالي بورىباەۆ.
ءماجىلىس دەپۋتاتى ەركىن ءابىل وزىق ويلى ۇلت ۇعىمىن باعامداۋ ماقساتىندا العا جىلجۋعا باسىمدىق بەرۋ كەرەكتىگىن ايتتى.
ء«بىز ۇلت رەتىندە ۇيىستىرا الاتىنىمىز تەك قوعامدىق سانا. تاريحي سانامەن ەكشەگەندە ءبىز وتكەنىمىزگە قارايمىز, ساباق الامىز. العا باعىت تۇزەپ, كەلەشەكتىڭ بەينەسىن باعدارلاۋدا كەنجە قالىپ كەلەمىز. تاريحىڭدى بەزبەندەۋ ارينە كەرەك, بىراق وتكەنىڭە ءجيى ورالىپ شىرلاي بەرگەننەن گورى بولاشاقتا قانداي ەلگە اينالامىز دەگەن ماسەلەگە كوبىرەك باس قاتىرۋ كەرەك», دەدى ە.ءابىل.
بيىل ەلىمىزدە دۇنيەجۇزىلىك كوشپەندىلەر ويىندارى وتەدى. جۋرناليست وڭايگۇل تۇرجان مەملەكەت باسشىسى سۇحباتىندا ارنايى قايىرىلعان كوشپەندىلەر ويىندارى ۇلتتىق يدەولوگيانى ناسيحاتتاۋدىڭ بىردەن ءبىر مۇمكىندىگى ەكەنىن تىلگە تيەك ەتتى.
«سپورتتىق ويىنداردى وتكىزۋ تەك بايگە تاراتىپ بەرۋ دەپ ءتۇسىنۋ قاتە. بۇل ويىن پرەزيدەنت ايتقانداي ايتۋلى وقيعا بولعاندىقتان دا ۇلتتىق بىرەگەيلىگىمىزدى پاش ەتەتىن مۇمكىندىك تە. رۋحىمىزدى جىگەرلەندىرەتىن, ەلدىگىمىزدى ايقىندايتىن شارا ەكەنىن باسا ايتقىم كەلەدى», دەدى جۋرناليست.
وڭايگۇل تۇرجاننىڭ پىكىرىن قۇپتاعان جانعالي جۇزباەۆ تا دۇنيەجۇزىلىك كوشپەندىلەر ويىندارىندا ۇلتتىق قۇندىلىعىمىزدى دارىپتەۋگە كۇش سالۋ قاجەتتىگىن جەتكىزدى. ۇلتتىق مۋزىكامىزدى دا كوشپەندىلەر ويىندارىندا ناسيحاتتاۋ كەرەك ەكەنىن ايتتى. استانا قالاسىنداعى «ازىرەت سۇلتان مەشىتىنىڭ» نايب-يمامى جۇمانازار وسەرحان ۇلى ءداستۇر مەن ءدىن بولشەكتەنبەيتىن بىرەگەي ۇعىم بولعاندىقتان دا وزىق ويلى ۇلتتى قالىپتاستىرۋدا ءدىننىڭ دە ورنى زور ەكەنىن اتاپ ءوتتى. قارجى مينيسترلىگى بيۋدجەتتىك كرەديتتەۋ, ۇلتتىق قور, قارجى سەكتورلارى ماسەلەلەرى جونىندەگى ءوزارا ءىس-قيمىل دەپارتامەنتىنىڭ ديرەكتورى ايبول ارىنعازيەۆ ق.توقاەۆ سۇحباتىندا قوعامعا ايتىلۋى ءتيىس اقيقاتتى بۇكپەسىز جەتكىزگەنىن ايتتى. ۇلتتىڭ ساپاسى كوتەرىلگەنىمەن دە ءالى دە باعدارىمىزدى ايقىنداۋ ماڭىزدى ەكەنىن ۇسىندى.
دوڭگەلەك ۇستەلدى تاريحشى, الاشتانۋشى اكادەميك ديحان قامزابەك ۇلى جۇرگىزدى.
