بىلتىر پاۆلودار قالاسىنىڭ بيلىگى «شىرشا جىرىمەن» ەستە قالعان ەدى. 52 ملن تەڭگەگە ساتىپ الىنعان شىرشانىڭ بەينەسى كوپشىلىككە ۇناماعان. ەندى, مىنە, جاڭا شىرشا ارقانىڭ دۇلەي داۋىلىنا شىداماي قۇلادى. ونىڭ ۇستىنە جۋىقتا 53 ملن تەڭگەگە سالىنعان مۇز قالاشىعىنىڭ ءبىراز بولىگى ەرىپ كەتتى. جاڭا جىل مەيرامىن مەرەكەلەۋگە جەرگىلىكتى قازىنادان جالپى سوماسى 185 ملن تەڭگە بولىنگەنى قوعام تاراپىنان سىنعا ىلىككەنى دە ءمالىم.
«شىرشا قۇلاپ تۇسكەنىمەن, نەگىزگى كونسترۋكتسياسىنا زاقىم كەلگەن جوق. ول تولىعىمەن جينالىپ, ساقتاۋعا جىبەرىلدى. كەم-كەتىگى تۇزەتىلىپ, كەلەسى جىلى قايتا قۇرىلاتىن بولادى», دەپ حابارلادى قالالىق اكىمدىكتەن.
«قازگيدرومەتتىڭ» حابارلاۋىنشا بۇل ءتۇنى پاۆلودار وبلىسى اۋماعىندا جەلدىڭ جىلدامدىعى كەي جەرلەردە سەكۋندىنا 37 مەترگە دەيىن جەتكەن. سالدارىنان پاۆلودار قالاسى مەن 10 وڭىردە جارىق ءوشىپ, 5 عيماراتتىڭ توبە جابىندىلارى ۇشىپ كەتتى. پاۆلودار وبلىسى اكىمىنىڭ ءباسپاسوز قىزمەتى تاراتقان مالىمەتكە سۇيەنسەك, ەلەكتر جارىعىنىڭ اۆاريالىق اجىراۋى پاۆلودار قالاسىنان بولەك, اققۋلى, اقتوعاي, باياناۋىل, ەرتىس, پاۆلودار, تەرەڭكول, ۋسپەن, شارباقتى اۋداندارىندا, ەكىباستۇز بەن اقسۋدىڭ اۋىلدىق ايماقتارىندا بايقالدى. جالپى سانى 117 ەلدى مەكەن جارىقسىز قالعان.
كەشە ساعات 17.00-دە جوندەۋ بريگادالارى 101 ەلدى مەكەندى جارىقپەن قامتاماسىز ەتىپ ۇلگەرگەنى بەلگىلى بولدى. وڭىردە 65 جوندەۋ بريگاداسى كۇشەيتىلگەن رەجىمدە جۇمىس ىستەپ, 8543 تۇتىنۋشىنى ەلەكتر كوزىنە قوسقان. تاعى 930 ابونەنت ءالى دە قامتىلماعان دەپ حابارلاندى.
ايتىپ وتەيىك, قاتتى بوراندا باياناۋىل اۋدانىندا مالشى اداسىپ كەتتى. ول سارسەنبى كۇنى كەشكىلىك قارا مالدى قايىرىپ كەلمەك بولىپ شىعىپ, مالمەن بىرگە ىعىپ كەتكەن. 1975 جىلعى ازامات تەك كەشە تاڭەرتەڭ ساعات 10-دار شاماسىندا تابىلدى. پوليتسيا ورگاندارى ازاماتتىڭ ءدىن امان ەكەنىن مالىمدەدى.
پاۆلودار وبلىسى
