بۇعان قوسا قاي كەزدە دە جۇمىسباستى, جالاقىسىنىڭ جايى بەلگىلى اكە-شەشە ءۇشىن كوپ ماسەلە قاراجات پەن قاۋىپسىزدىككە بارىپ تىرەلەتىندىكتەن, وسى تۇيتكىلدى ءوز بەتىنشە تارقاتا المايدى. ەگەر بالالار دەمالىسىن ءتيىمدى ەتۋدىڭ كاسىبي تۇرعىدا رەتتەلگەن تەتىكتەرى قاجەت دەسەك, ەلىمىزدىڭ كىشكەنتاي تۇرعىندارى تەگىن ساياحاتتاي الاتىن تاماشا جوبا جۇمىس ىستەپ جاتقانىن بارلىق اتا-انا بىلە بەرمەيتىنى ءسوزسىز.
جازعى, قىسقى كانيكۋل كەزىندە تالاي وتباسىنىڭ بالا-شاعاسىن قىدىرتىپ, ەل كورىپ, جەر ارالاۋعا شاماسى جەتە بەرمەيدى. شەتەلدىك, مەيلى ەل ىشىندەگى ساپارلاردا ءار بالاعا جۇمسالاتىن شىعىن ەرەسەكتەردەن اسىپ تۇسپەسە, كەم ەمەس. سونداي-اق قازىرگى بالالاردىڭ تالعامى باسقا, تالابى بولەك. ايلىعى شايلىعىنان اسپايتىن قاراپايىم كوپبالالى وتباسىلاردىڭ جاعدايى ايتپاسا دا تۇسىنىكتى.
ەندەشە ەلىمىزدىڭ كورىكتى مەكەندەرىن بەتكە العاندا بالالارىڭىزدىڭ جولاقىسىن تولەمەي-اق ساياحاتتاۋعا بولاتىنىن بىلگەنىڭىز ءجون. سونىمەن, ەل ىشىندەگى ءتۋريزمدى دامىتۋ ماقساتىندا «Kazakh Tourism» ۇلتتىق كومپانياسى كەيىنگى جىلدارى جۇزەگە اسىرىپ وتىرعان Kids Go Free باعدارلاماسى قازىردىڭ وزىندە تالاي اكە-شەشەنىڭ ساۋابىنا بولەنىپ وتىر. ماسەلەن, 2022 جىلى وسى جوبا ارقىلى 1 500 بالا تەگىن ساپار شەكسە, بۇل – مەملەكەت تاراپىنان تولەنگەن 76,2 ملن تەڭگە سۋبسيديانىڭ ارقاسى. ال 2023 جىلدىڭ 1 جەلتوقسانعا دەيىن 920 ۇسىنىس قاناعاتتاندىرىلىپ, 1 975 بالا 90 ملن تەڭگەگە ۇشقان.
تۋريستىك ايماقتارعا تەگىن ۇشقان بالالار سانىنا كوز جۇگىرتسەك, الاكولگە – 637, الماتىعا – 561, اقتاۋعا – 352, تۇركىستانعا – 154, استانا قالاسىنا 120 بالا تەگىن ساياحاتتاعان. ماماندار اۋە بيلەتتەرىن تەگىن العان بالا سانىن زەرتتەگەندە, الاكول باعىتى ماۋسىمدىق بولعانىنا قاراماستان, ۇلكەن سۇرانىسقا يە ەكەنىن انىقتاعان. بۇرناعى جىلعا قاراعاندا, وتكەن جىلى تەگىن ساياحاتتاعان بالالار سانى شامامەن 500-گە ارتسا, دەمەك بالالارىمەن بىرگە ساياحاتتاعان ءبىراز وتباسى قارجىسىن دا ۇنەمدەگەن.
مىنا قىزىقتى قاراڭىز, ەلىمىزدىڭ ءار شالعايىنداعى كىشكەنتاي تۋريستەر الدىمەن استانا قالاسىنا قىدىرعاندى جاقسى كورەدى ەكەن. وڭىردەگى بالالاردىڭ كوپشىلىگى ەلوردانى كورۋگە قۇشتار بولسا, تالاي بالا تەگىن ساياحاتتىڭ يگىلىگىن كورىپ ۇلگەرگەن. مىسالى, كامەلەت جاسىنا تولماعان ءتورت بالاسى بار احمەتوۆتەر وتباسى الماتى وبلىسىنا ساياحاتتاعاندا ايتارلىقتاي قارجى ۇنەمدەگەنىن العا تارتىپ, العىس بىلدىرەدى. ماڭعىستاۋ وبلىسىنىڭ تۇرعىندارى بۇل جوبانى العاش ەستىگەندە سەنىمسىزدىك تانىتقان.
تەگىن ساياحات تۋرالى الەۋمەتتىك جەلىدەن بىلگەن كوپبالالى تىلەكتەس احمەتوۆا تۋرفيرما ارقىلى ساياحاتىن راسىمدەگەن كەزدە تەك ءوز بيلەتىنىڭ قۇنىن تولەگەندە عانا جوبانىڭ تيىمدىلىگىنە كوز جەتكىزگەن. بۇل وتباسى قازىر سانگە اينالعان باعىتتاردىڭ ءبىرى – الماتى وبلىسىنداعى كولسايعا بالالارىن اپارۋدى بۇرىننان ارمانداپ جۇرگەن ەكەن. ءتورت بالاسىنا دا ۇشاق بيلەتىن تەگىن راسىمدەگەن تىلەكتەس: «بالالارىمنىڭ بويىنا پاتريوتتىق سەزىم ۇيالاتۋ – مەنىڭ انالىق پارىزىم. شەتەلدە وتباسىمەن قىدىرىپ جۇرەتىن وتباسىلارعا ۇنەمى قىزىعاتىنمىن. Kids go free جوباسى ارقىلى مەن دە بالالارىما باقىتتى ساتتەر سىيلاپ, ەلىمىزدىڭ كورىكتى جەرلەرىن ارالاۋدى باستادىم. بۇل جوبا الداعى جىلداردا دا جۇزەگە اسسا ەكەن دەگەن تىلەگىم بار», دەيدى.
ەندەشە بىلە ءجۇرىڭىز. ەل ىشىندە كەز كەلگەن قالاعا 2-17 جاس ارالىعىنداعى كەز كەلگەن بالا تەگىن ۇشادى. ال ۇشاق بيلەتى تۋريستىك كومپانيالار ارقىلى الىنادى. تەگىن بيلەت بالا سانىنا قارامايدى, ياعني اتا-اناcى قانشا بالامەن ۇشسا دا تەگىن. بۇل اسىرەسە كوپبالالى وتباسىلارعا وتە ءتيىمدى.
ەڭ باستىسى, Kids Go Free باعدارلاماسى ەنگىزىلگەن تۋريستىك كومپانيالار سانى كۇننەن-كۇنگە ارتىپ كەلەدى. دەمەك اتالعان جوبانىڭ يگىلىگىن كورەتىندەر سانى كوبەيسە, وندا تەگىن اۋە بيلەتتەرىن راسىمدەپ بەرەتىن تۋريستىك فيرمالار سانى دا وسە تۇسەدى.
تەگىن اۋە بيلەتتەرىن الۋدا ەش كەدەرگى جوق, سەبەبى اتا-اناسىمەن بىرگە ساياحاتتايتىن بالا سانى مەن ساياحاتتاۋ كولەمىنە شەكتەۋ جوق. ەلىمىزدىڭ قاي قيىرىنا كوز سالساڭىز دا, تۇمسا تابيعاتىمەن كوز اربايتىن عاجاپ جەرلەر مەن تاريحي ەسكەرتكىشتەرگە باي ولكەلەر بار. ەندەشە اقشا ۇنەمدەۋ ءۇشىن بۇرىنعىداي بالالاردى كەزەگىمەن قىدىرتاتىن كەزەڭدەر ارتتا قالدى. ويتكەنى ساياحاتقا شىققان ءاربىر بالانىڭ جولاقىسىن مەملەكەت ءوز موينىنا الىپ وتىر. مىسالى, اقتاۋ قالاسىنىڭ تۇرعىندارى دا الماتى, تۇركىستان وڭىرلەرىن ارالاپ, بالالارىنا ەلىمىزدىڭ كورىكتى جەرلەرىن كورسەتە العانىنا قۋانادى.
«مەنىڭ اتا-انالارعا ايتارىم, بۇل – مەملەكەت تاراپىنان بەرىلىپ جاتقان وتە ءتيىمدى كومەك. سەبەبى Kids Go Free سياقتى جوبا بارىن بىلمەگەن جاعدايدا ءبىز سياقتى ءتورت بالالى وتباسى ءۇشىن اقتاۋ – الماتى, الماتى – اقتاۋ باعىتىنا 500-600 مىڭداي قاراجات كەتەتىن ەدى. بىراق وسى باعدارلاما ارقىلى 350-360 مىڭ تەڭگە اقشا جۇمسادىق. بيلەتكە جولداسىم ەكەۋمىزگە عانا تولەدىك. ال ءتورت بالامىز تەگىن ساياحاتتادى», دەيدى اقتاۋلىقتار ريزاشىلىقپەن.
بۇل ارادا اتا-انالاردىڭ تاعى ءبىر ۇتاتىنى, ۇشاتىن كۇن جاقىنداعاندا اۋە بيلەتتەرىنىڭ قۇنى اسپانداپ كەتەتىنى ايان. ال بيلەت الىنعان كۇنى ونىڭ باعاسى قانداي بولسا دا, مەملەكەت سول اقشانى وتەپ بەرەدى. جوبانىڭ باستى شارتى ساياحاتتى تۋرفيرما ارقىلى راسىمدەۋ عانا. بۇل ءوز كەزەگىندە وتاندىق تۋريستىك كومپانيالاردىڭ دا جۇمىسىن جانداندىرۋعا ءتيىس.
ال ءبىزدىڭ قالاۋىمىز كوزىقاراقتى وقىرمان وسىنداي جوبالاردان حاباردار بولىپ, يگىلىگىن كورسە دەگەن تىلەك.
الماتى
