يندۋستريا جانە قۇرىلىس ءمينيسترىنىڭ 2023 جىلعى 29 جەلتوقسانداعى بۇيرىعىمەن قازاقستانعا 6 اي مەرزىمگە وڭ ءرۋلدى كولىكتەردى اكەلۋگە تىيىم سالىندى.
ۆەدومستۆونىڭ مالىمەتىنشە, بۇيرىق «ساۋدا قىزمەتىن رەتتەۋ تۋرالى» زاڭنىڭ 17 جانە 18-باپتارىنا, سونداي-اق ەۋرازيالىق ەكونوميكالىق وداق تۋرالى شارتتىڭ 29 جانە 47-باپتارىنا سايكەس قابىلدانعان.
«قازاقستان رەسپۋبليكاسىنىڭ اۋماعىنا وڭ جاق ءرۋلدى بولشەكتەلگەن جەڭىل اۆتوكولىكتەردى التى اي مەرزىمگە دەيىن اكەلۋگە تىيىم سالىنسىن», دەلىنگەن قۇجاتتا.
بۇيرىق العاشقى رەسمي جاريالانعان كۇنىنەن كەيىن كۇنتىزبەلىك ون كۇن وتكەن سوڭ, ياعني 2024 جىلعى 16 قاڭتاردان باستاپ قولدانىسقا ەنگىزىلەدى.
ەستەرىڭىزگە سالا كەتەيىك, وتكەن جىلدىڭ تامىز ايىنان باستاپ قازاقستانعا وڭ ءرۋلدى كولىكتەردى اكەلۋگە تىيىم سالۋدى ەنگىزۋ ماسەلەسى قاراستىرىلعان.
ايتا كەتەيىك, 2007 جىلدان بەرى قازاقستاندا وڭ ءرۋلدى كولىكتەردى تىركەۋگە تىيىم سالىنعانىمەن, ولاردى پايدالانۋعا تىيىم سالىنباعان.
2022 جىلدىڭ جەلتوقسانىندا 2022 جىلدىڭ 1 قىركۇيەگىنە دەيىن شەكارادان وتكەن وڭ ءرۋلدى شەتەلدىك كولىكتەر قازاقستاندا تىركەلۋى مۇمكىن ەكەنى بەلگىلى بولدى. شەتەلدىك كولىكتەردى زاڭداستىرۋ ءراسىمى بيىلعى جىلدىڭ 1 شىلدەسىنە دەيىن سوزىلدى.
