ماحامبەت اۋدانىنداعى ەڭبەكشى اۋىلىنىڭ تۇرعىنى توقتار تولەگەن ۇلى كاسىبىن كەڭەيتۋ ءۇشىن 1 ميلليون 380 مىڭ تەڭگەنىڭ گرانتىنا يە بولعان. ول بەس جىلدان بەرى بيە ۇستاپ, قىمىز ساتۋدى قولعا العان.
«قىمىزدى دايىنداۋدىڭ قيىندىعى كوپ. مۇنى وسى ءىستى كاسىپ ەتكەندەر جاقسى بىلەدى. گرانت قارجىسىنا قىمىز پىسەتىن, كۇبى ىستايتىن قۇرىلعىلار, ءبىر بيە ساتىپ الدىم. ماسەلەن, بۇرىن ساۋىلعان بيە ءسۇتىن كۇبىگە قۇيىپ, قولمەن كەمىندە 3-4 مىڭ رەت ءپىسۋ كەرەك ەدى. سول كەزدە قىمىز دايىنداۋ ۋاقىتى ءتورت ساعاتقا دەيىن سوزىلاتىن. ال اۆتوماتتى كۇبى قۇرىلعىسىن العالى بەرى قىمىزدى ءبىر ساعاتتا دايىندايتىن بولدىم. كۇبىنى ىستاماسا, قىمىزدىڭ ءدامى كەلمەيدى. ءار كۇبىنى ىستاۋعا ءبىراز ۋاقىت جۇمسالادى. ەندى كۇبى ىستايتىن پەش بار», دەيدى توقتار تولەگەن ۇلى.
قازىر ونىڭ يەلىگىندە 4 بيە بار. جىل سايىن اۋىلداستارىنا, وزگە دە تۇتىنۋشىلارعا دەرتكە داۋا بولار قىمىز ۇسىنادى. ساۋمالعا سۇرانىس كوپ تۇسەدى. بەس جىلدان بەرى اتىراۋ, قۇلسارى, اقتاۋ قالالارىنان, شالعايداعى قۇرمانعازى اۋدانىنان تۇراقتى تاپسىرىس بەرۋشىلەر بار.
توقتار تولەگەن ۇلى قىمىزدى بازارعا, نە دۇكەنگە وتكىزبەيدى. بۇل – ونىڭ اينىمايتىن ۇستانىمى. ويتكەنى دەلدالدىققا بەت بۇرعاندار قىمىزعا سۋ قوسۋى مۇمكىن. ال سۋ ۇلتتىق سۋسىننىڭ ءدامىن بۇزادى.
«مەنىڭ تاڭداۋىم ۇلتتىق تاعامداردى دايىنداۋعا ءتۇستى. بۇل كاسىپتى باستاعانىما بەس جىل بولدى. بيەلەرگە ءسۇتى قۇنارلى بولۋى ءۇشىن ارپا, قارا بيداي مەن كەبەك, جوڭىشقا بەرەمىن. جەم-ءشوپتىڭ باعاسى دا قىمبات, اينالادا مال جايىلاتىن جايىلىم تارىلىپ بارادى. وسى ماسەلە قيىنداۋ بولىپ تۇر», دەيدى ت.تولەگەن ۇلى.
وعان جارى ءمولدىر سيسەنوۆا قولداۋ كورسەتىپ وتىر. ەرلى-زايىپتىلار بيەنىڭ سانىن 10-عا جەتكىزۋدى ويلاستىرىپ ءجۇر. سيىر ساۋىپ, ايران, قۇرت پەن قايماقتى ساۋداعا شىعارادى.
«الداعى جىلدارى بالالارعا ۇلتتىق سالت-ءداستۇردى ناسيحاتتايتىن ەتنواۋىل اشقىم كەلەدى. ويتكەنى قازىر بالالار بوس ۋاقىتىن تەلەفونعا تەلمىرۋمەن وتكىزەدى. بۇل ولاردىڭ حالقىمىزدىڭ سالت-داستۇرىنەن, ادەت-عۇرپىنان الشاقتاۋىنا اسەر ەتەدى. بالالار ءبىر مەزگىل التىباقان تەۋىپ, ساداق اتىپ, اسىق ويناعانىن قالايمىن. اعا بۋىن وكىلدەرى ەتنواۋىلدا بالالارعا ۇلتتىق قۇندىلىقتىڭ قادىرى, ءجون-جورالعىسى تۋرالى ۇلاعاتتى اڭگىمە ايتىپ وتىرسا, قازاقى قالپىمىزدى جوعالتپاس ەدىك», دەپ ول ويىندا جۇرگەن جوسپارىن جەتكىزدى.
اتىراۋ وبلىسى
