وڭىرلىك توتەنشە جاعدايلار دەپارتامەنتى ءباسپاسوز قىزمەتىنىڭ حابارلاۋىنشا, وقيعا 4 قاڭتار كۇنى ساعات 01.25 شاماسىندا «مايقايىڭالتىن» اق اۋماعىندا, التىن كەنىشى شاحتاسىنىڭ جانىنداعى تازارتۋ كەڭىستىگىندە ورىن العان. «كەنىش اۋماعىنداعى جەراستى شاحتاسىنىڭ توپىراق قاباتى وپىرىلىپ ءتۇسىپ, پايدا بولعان ويىققا ءجۇرىپ بارا جاتقان اۆتوبۋس قۇلاعان. اپات كەزىندە اۆتوبۋستا 4 ادام بولعان. ولار – كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ 3 قۇتقارۋشىسى مەن كولىك جۇرگىزۋشى. شاحتادان 33 جۇمىسشى ەۆاكۋاتسيالاندى, ولاردىڭ ءومىرى مەن دەنساۋلىعىنا قاۋىپ تونگەن جوق. شاحتا ۇستىندە پايدا بولعان ويىقتىڭ الدىن الا ۇزىندىعى 150-200 مەتر, ەنى جارتى شاقىرىم, تەرەڭدىگى 150 مەتر. وقيعا ورنىندا جەدەل شتاب ۇيىمداستىرىلدى. پاۆلودار وبلىسىنىڭ اكىمى اسايىن بايحانوۆ, تجد مەن جەرگىلىكتى اتقارۋشى ورگانداردىڭ باسشىلىعى وقيعا ورنىندا ءجۇر. پسيحولوگتەر جۇمىس جۇرگىزىلىپ جاتىر. اۆاريالىق-قۇتقارۋ جۇمىستارىنا «مايقايىڭالتىن» اق كاسىبي اسكەريلەندىرىلگەن اۆاريالىق-قۇتقارۋ قىزمەتتەرى پاۆلودار فيليالىنىڭ, جەرگىلىكتى اتقارۋشى ورگانداردىڭ كۇشتەرى مەن قۇرالدارى, سونداي-اق تج دەپارتامەنتىنىڭ قۇتقارۋشىلارى تارتىلعان. بارلىعى 73 ادام, 17 تەحنيكا مەن ءبىر ۇشقىشسىز ۇشۋ اپپاراتى (درون) جۇمىلدىرىلدى» دەلىنگەن رەسمي حابارلامادا.
كۋاگەرلەردىڭ ايتۋىنشا, 3 قاڭتار كۇنى التىن شاحتاسىندا جاپپاي كەن جىنىستارىن جارۋ جۇمىستارى جۇرگىزىلگەن. ال ءتۇن ورتاسىنا تامان التىن كەنىشىندەگى كەزەكشى شاحتا ىشىندەگى الدەبىر شۋدى قۇلاعى شالىپ, قۇتقارۋشىلارعا, ياعني كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى پاۆلودار فيليالىنىڭ وكىلدەرىنە حابارلاعان. شاقىرتۋ كەلىپ تۇسكەن بويدا قىزمەتتىك اۆتوبۋسقا 3 قۇتقارۋشى كەلىپ مىنەدى. كەنىشتىڭ جەر استىنداعى شاحتالارى «ۆورونكا» ادىسىمەن ويىلىپ, ءبىرىنىڭ ۇستىنەن ءبىرى سالىنىپ وتىرادى. الگى جاپپاي جارۋ جۇمىستارىنىڭ سالدارى بولدى ما ەكەن, سول كۇنى تۇندە شاحتا ۇستىندەگى توپىراق قاباتتارى تومەن قۇلاپ, جەر ۇستىندە ۇلكەن ويىق پايدا بولعان. الايدا كەنىش قىزمەتكەرلەرى ونى قاراڭعىدا بايقاماي قالعان ءتارىزدى. كەنىشكە اپاراتىن جول سول اۋماقتى باسىپ وتەدى. شاقىرتۋعا بەت العان اۆتوبۋس كەنەتتەن پايدا بولعان ويىققا تاپ بولىپ, تومەن قۇلاعان.
كەشە تۇستەن كەيىن كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى توپىراق استىنان 2 قۇتقارۋشىنىڭ مۇردەسى قازىپ الىنعانىن حابارلادى.
وقيعا ورنىندا جۇرگەن پاۆلودار وبلىسىنىڭ اكىمى اسايىن بايحانوۆ كەشكىسىن حابارلاعانداي, اۆتوبۋس ىشىندە بولعان قۇتقارۋشىلاردى ىزدەۋ جۇمىستارى قيىنعا سوققان. ويىق شەتىندەگى توپىراق پەن تاستار قايتا-قايتا ۇگىلىپ, قۇتقارۋشىلارعا كەدەرگى كەلتىردى.
– قۇتقارۋ جۇمىستارىمەن شۇعىلدانىپ جۇرگەن ازاماتتاردىڭ ومىرىنە قاۋىپ تونبەس ءۇشىن ويىقتىڭ اينالاسى بەكىتىلدى. قۇتقارۋشىلار قيراندى استىنان 2 ازاماتتىڭ ءمايىتىن الىپ شىقتى. ولار – سارقىت بەردىقان (1999 جىلعى) جانە تىشكەۆيچ ولەگ لەونيدوۆيچ (1970 جىلعى). وزگە ەكى قۇتقارۋشىنى ىزدەۋ جۇمىستارى جالعاسىپ جاتىر. اۆتوبۋس تابىلعان جوق, – دەپ حابارلادى ءوڭىر باسشىسى.
وقيعانىڭ سەبەپ-سالدارىن توتەنشە جاعدايلار مينيسترلىگى ونەركاسىپتىك قاۋىپسىزدىك كوميتەتىنىڭ توراعالىق ەتۋىمەن قۇرىلعان ارنايى كوميسسيا انىقتاۋ ۇستىندە.
پاۆلودار وبلىسى,
باياناۋىل اۋدانى,
مايقايىڭ كەنتى
