مايكومگەن اۋىلدىق وكرۋگىندە 1 165 ادام تۇرادى. مۇندا ورتا ءبىلىم بەرەتىن مەكتەپ, بالالار جانە جاسوسپىرىمدەر سپورت مەكتەبى, دارىگەرلىك امبۋلاتوريا سەكىلدى الەۋمەتتىك نىساندار بار. ەندى ونىڭ قاتارىنا جاڭا مادەنيەت وشاعى قوسىلدى. بىلتىرعى شىلدەدە قۇرىلىسى باستالعان مادەنيەت ءۇيى 200 ورىنعا ەسەپتەلگەن. جاڭا نىساندا كونتسەرتتىك زال, ۇيىرمەلەر جانە وقىتۋشىلار بولمەسى بار. سونداي-اق 12 ورىندىق وقۋ زالى بار كىتاپحانا, 4 ورىندىق مەدياتەكا, كىتاپ ساقتاۋ بولمەلەرى ورنالاسقان.
«مەملەكەت مەرەيىن ەڭسەلەندىرەتىن مادەنيەت سالاسىنىڭ ۇلتتىق رۋحانياتىمىزدى قالىپتاستىرۋدا وزىندىك ورنى بار. پرەزيدەنت ۇلتتىڭ جاڭا ساپاسىن قالىپتاستىرۋ ءۇشىن ءبىلىم, مادەنيەت جانە عىلىم سالاسىن دامىتۋعا ەرەكشە كوڭىل ءبولىپ وتىر. مەملەكەت باسشىسىنىڭ تاپسىرماسىنا وراي اۋىلدا سوڭعى ۇلگىدەگى مادەنيەت وشاعى اشىلدى. جاستارعا ۇدايى ۇلتتىق ونەرىمىزدى, قۇندىلىقتارىمىزدى دارىپتەيتىندەي, ەلگە ادال قىزمەت ەتەتىندەي تاربيە بەرۋىمىز كەرەك. مادەنيەت ءۇيى اۋىل تۇرعىندارىنىڭ باس قوساتىن ورداسىنا اينالادى», دەدى وبلىس اكىمى سەرىك شاپكەنوۆ.
اتىراۋ وبلىسى
