فوتو: Baq.kz
بيىلعى جىلدىڭ باستى سپورتتىق شاراسى – پاريجدەگى جازعى وليمپيادا ويىندارى. بۇل دودا 26 شىلدە مەن 11 تامىز ارالىعىندا الەمنىڭ 205 ەلىنەن كەلگەن 10 مىڭنان استام سپورتشىنىڭ قاتىسۋىمەن وتەدى. ءتورت جىلدىقتىڭ جارىسىندا سپورتتىڭ 32 تۇرىنەن 329 مەدال جيىنتىعى ساراپقا سالىنادى. قازاقستان ۇلتتىق قۇراماسى سپورتتىڭ 20 تۇرىنەن قاتىسۋدى جوسپارلاپ وتىر. بۇگىنگى تاڭدا جەرلەستەرىمىزدە سپورتتىڭ 8 ءتۇرى بويىنشا (ساداق اتۋ, ۆەلوشوسسە, وق اتۋ, قازىرگى بەسسايىس, گرەك-ريم كۇرەسى, ەركىن كۇرەس, سپورتتىق گيمناستيكا جانە بوكس) 17 ليتسەنزيا بار. الدا 90-عا جۋىق ليتسەنزيالىق جارىس كۇتىپ تۇر. سوندىقتان جولدامالار سانىن ءالى دە كوبەيتۋ كوزدەلگەن.
ەلىمىز ءۇشىن جىلدىڭ ماڭىزدى تاريحي وقيعاسى – ەلوردادا V دۇنيەجۇزىلىك كوشپەندىلەر ويىندارىن ۇيىمداستىرۋ جانە وتكىزۋ. وسى جىلدىڭ 8-14 قىركۇيەك ارالىعىندا قازاقستانعا الەمنىڭ 100-دەن استام ەلىنەن دەلەگاتسيالار كەلەدى دەپ جوسپارلانىپ وتىر. ويىنداردىڭ بىرەگەيلىگى – سپورتتىق, مادەني جانە عىلىمي باعدارلامالاردىڭ ۇشتاسۋىندا. باعدارلاماعا 20 جارىستىق جانە 10 كورنەكى سپورت ءتۇرى كىرىپ, 110 مەدال جيىنتىعى جۇلدەگەرلەر ەنشىسىنە بۇيىرادى. جارىس ات سپورتى, ۇلتتىق كۇرەس, ساداق اتۋ, قۇستارمەن اڭ اۋلاۋدىڭ تۇرلەرى, ءداستۇرلى زياتكەرلىك ويىندار بويىنشا وتەدى. قازىرگى ۋاقىتتا ۇلتتىق قۇراما دايارلىقتى باستادى, كوماندالار قۇرامى جاساقتالىپ, وقۋ-جاتتىعۋ شارالارى وتكىزىلىپ جاتىر.
بيىل استانادا ايەلدەر اراسىنداعى بوكستان الەم چەمپيوناتى وتەدى. بۇل تۋرالى تاشكەنتتە (وزبەكستان) وتكەن حالىقارالىق بوكس قاۋىمداستىعىنىڭ (IBA) رەسمي وتىرىسىندا حابارلاندى. IBA فەدەراتسياسى پرەزيدەنتىنىڭ ايتۋىنشا, ءتۋرنيردىڭ جالپى جۇلدە قورى 4,8 ميلليون اقش دوللارىن قۇرايدى. الەم چەمپيونى اتانعان بوكسشى 200 000 اقش دوللارىن الادى.
سونداي-اق 2024 جىلدىڭ قاراشا ايىندا استانا قالاسىندا سامبودان الەم چەمپيوناتىن وتكىزۋ جوسپارلانعان. وتكەن جىلى كۇزدە ەرەۆاندا وتكەن سامبودان 48-ءشى الەم چەمپيوناتىنا 65 ەل قاتىسىپ, جالپى ەسەپتە قازاقستان قۇراماسى 1 التىن, 2 كۇمىس جانە 5 قولا يەلەنىپ ءۇشىنشى ورىنعا تابان تىرەدى.
