فوتو: Baq.kz
پرەزيدەنتپەن سۇحباتتاسۋشى عالىم, «قازاق گازەتتەرى» جشس باس ديرەكتورى ديحان قامزابەك ۇلى ەلىمىزدەگى ەنەرگەتيكالىق قاۋىپسىزدىك نىساندارىنىڭ جاي-كۇيى كوڭىل كونشىتپەيتىنىن, اەس سالۋ-سالماۋ ماسەلەسىندە حالىق پىكىرى ءار الۋان ەكەنىن تىلگە تيەك ەتىپ, وسى جايتقا قاتىستى مەملەكەت باسشىسىنىڭ ۇستانىمى قانداي ەكەنىن سۇرادى.
«قازاقستان ءۇشىن تازا اتوم ەنەرگياسىنىڭ ءمانى زور. بۇل – ەل ەكونوميكاسىنىڭ بولاشاعىنا تىكەلەي اسەر ەتەتىن ايرىقشا ماڭىزدى ماسەلە. ءبىز تابيعي ۋران ءوندىرۋ كولەمى جاعىنان الەمدە ءبىرىنشى ورىن الامىز. يادرولىق وتىن كومپونەنتتەرىن دە ءوزىمىز وندىرەمىز. سول سەبەپتى مەن ەلىمىزدىڭ اۋماعىندا اەس سالۋ جايىنا ايرىقشا ءمان بەرەمىن. تۇپتەپ كەلگەندە, ەنەرگەتيكا قاۋىپسىزدىگى ماسەلەسىن گەوساياسي مۇددە ەمەس, ناقتى قاجەتتىلىك پەن مۇمكىندىكتەر تۇرعىسىنان قاراستىرىپ, عىلىمي زەرتتەۋلەر نەگىزىندە شەشكەن ءجون.
ەل ىشىندە اەس قۇرىلىسىنا ءۇزىلدى-كەسىلدى قارسىلىق ءبىلدىرىپ جاتقاندار دا بار. بۇل – تۇسىنىكتى جايت. كوپشىلىك سەمەي يادرولىق پوليگونىنىڭ قاسىرەتىن ۇمىتا قويعان جوق. مۇقيات نازار اۋدارۋدى قاجەت ەتەتىن باسقا دا كۇردەلى جايتتار بار. مىسالى, جوبانىڭ قۇنى مەن ەكولوگياعا اسەرىن قاپەردەن شىعارۋعا بولمايدى», دەدى ق.توقاەۆ.
پرەزيدەنت قازاقستاندا اەس سالۋ جايى «حالىق ۇنىنە قۇلاق اساتىن مەملەكەت» تۇجىرىمداماسى مەن ادىلەتتى قازاقستان قاعيداتتارى نەگىزىندە حالىق پىكىرىمەن ساناسىپ شەشىلەتىنىن مالىمدەدى.
«اەس قۇرىلىسىنا قاتىستى ماسەلەنى جالپىحالىقتىق رەفەرەندۋمعا شىعارۋدى ۇسىندىم. حالقىمىز ءۇشىن اسا ماڭىزدى وسىنداي شەشىمدەردىڭ رەفەرەندۋم ارقىلى عانا قابىلداناتىنى 2019 جىلعى سايلاۋ الدىنداعى باعدارلامامدا ناقتى كورسەتىلدى. «حالىق ۇنىنە قۇلاق اساتىن مەملەكەت» تۇجىرىمداماسى مەن ادىلەتتى قازاقستان قاعيداتتارىنىڭ ءىس جۇزىندە ورىندالۋى دەگەنىمىز – وسى. بولاشاقتا ءالى تالاي قوعامدىق تالقىلاۋ وتكىزىلەدى. ازاماتتار رەفەرەندۋمدا داۋىس بەرگەن كەزدە اەس سالۋدى جاقتاعان نەمەسە قارسى بولعان ساراپشىلاردىڭ دايەكتى پىكىرلەرىن بارىنشا تارازىلاپ, وي ەلەگىنەن وتكىزىپ بارىپ شەشىم قابىلداۋعا ءتيىس. اەس سالامىز با, سالمايمىز با – مۇنى حالىق شەشەدى», دەدى پرەزيدەنت.
