قاڭتار وقيعاسى بولعالى تۋرا 2 جىل ۋاقىت ءوتتى. وسى تۇستا مەمەلەكەت باسشىسى عالىم, «قازاق گازەتتەرى» جشس باس ديرەكتورى ديحان قامزابەك ۇلىنا بەرگەن ء«بىز وزىق ويلى ۇلت رەتىندە تەك قانا العا قاراۋىمىز كەرەك» اتتى سۇحباتىندا سول ءبىر الماعايىپ شاقتا ۇقشۇ-دان كومەك سۇراۋ قانشالىقتى دۇرىس بولعانىن, وسى ارەكەتتىڭ كورشى رەسەي ەلىندە قازاقستاندى ورىس حالقى قۇتقارىپ قالدى دەپ ايتىلىپ جۇرگەن پىكىرگە جاۋاپ بەردى.
«ايماقتاردا جاپپاي تارتىپسىزدىك بەلەڭ الىپ, جەرگىلىكتى بيلىك دارمەنسىزدىك تانىتقاندا, قاۋىپسىزدىك كەڭەسى ۇجىمدىق قاۋىپسىزدىك تۋرالى شارت ۇيىمىنا جۇگىنۋ تۋرالى شەشىم قابىلدادى. قازاقستان ونىڭ بىتىمگەرلىك كۇشتەرىن تۇراقتىلىق پەن قاۋىپسىزدىكتى قامتاماسىز ەتۋ ءۇشىن عانا قىسقا مەرزىمگە ەنگىزۋدى سۇرادى. بۇل جەردە مىنا جايتقا باسا ءمان بەرۋ كەرەك. ءبىز بۇل قۇرىلىمنىڭ مۇشەسى رەتىندە رەسەيگە ەمەس, ۇجىمدىق قاۋىپسىزدىك تۋرالى شارت ۇيىمىنا جۇگىندىك.
سول كەزدە وسى ۇيىمنىڭ توراعاسى ارمەنيا ەدى. بيىل ۇقشۇ-عا قازاقستان توراعالىق ەتەدى. قۇرىلىم جاساعى, شىن مانىندە, بىتىمگەرلىك ءرول اتقارىپ, قاسىرەتتى كۇندەردە ەلدى جايلاعان جۇگەنسىزدىكتى توقتاتۋعا سەپتىگىن تيگىزدى. ۇيىمعا مۇشە-مەملەكەتتەرمەن كەلىسىلگەندەي, بۇل بىتىمگەرلىك كۇشتەر الدىن الا ەشقانداي تالاپ قويماستان, ونىڭ ۇستىنە مەرزىمىنەن بۇرىن قازاقستاننان سىرتقا شىعارىلدى», دەدى قاسىم-جومارت توقاەۆ.
مەملەكەت باسشىسى وسى ساۋالعا جاۋاپ بەرە كەلە ۇقشۇ ۇيىمى لاڭكەستەرگە قارسى وپەراتسيا قاتىسپاعانىن, قاقتىعىس كەزىندە بىردە-ءبىر وق اتپاعانىن باسا ايتتى.
«ۇقشۇ بىتىمگەرلىك كۇشتەرى لاڭكەستىككە قارسى وپەراتسيالارعا قاتىسقان جوق, بىردە-ءبىر وق اتقان جوق. ارمەنيا جاساعى «اقساي» نان زاۋىتىن جانە «الماتى سۋ» مەكەمەسىن, بەلارۋس جاساعى جەتىگەندەگى اەرودرومدى, تاجىكستان مەن قىرعىز رەسپۋبليكاسىنىڭ اسكەري قىزمەتشىلەرى الماتى قالاسىنىڭ ءبىرىنشى جانە ەكىنشى جىلۋ ەلەكتر ورتالىقتارىن, رەسەي جاساعى ءۇشىنشى جىلۋ ەلەكتر ورتالىعى مەن تەلەكوممۋنيكاتسيا نىساندارىن كۇزەتتى. وسى ماڭىزدى نىساندارعا لاڭكەستىك شابۋىلدار جاسالۋى مۇمكىن دەگەن قاۋىپ بولدى. سوندىقتان بىتىمگەرلىك كۇشتەر سولاردى كۇزەتۋگە جىبەرىلدى. ەڭ باستىسى, سول ارقىلى ءوز كۇشتەرىمىزدى لاڭكەستىككە قارسى وپەراتسياعا جۇمىلدىرۋعا مۇمكىندىك تۋدى», دەدى پرەزيدەنت.
