سۋرەتتى تۇسىرگەن – يۋري بەككەر
اتالعان جارىسقا قازاقستان مەن رەسەيدىڭ ءتورت كلۋبى قاتىسسا, فرانتسيا, يسپانيا, وزبەكستان, گرۋزيا, موڭعوليا, قىرعىزستان, ازەربايجان, بەلارۋس جانە تاجىكستان ءبىر-ءبىر كوماندادان قوستى. بۇل مەملەكەتتەردىڭ بارلىعىندا كۇرەستىڭ وسى تۇرىنەن جەڭىسپەن ورىلگەن باي ءداستۇرى بارىن جانكۇيەرلەر جاقسى بىلەدى. سونىمەن قاتار ءار كوماندا ءوز قاتارىن لەگيونەرلەرمەن تولىقتىرۋعا قۇقىلى ەدى. العاشىندا قاتىسۋشىلار بىرنەشە توپقا ءبولىنىپ, ءبىر-بىرىمەن شەبەرلىك بايقاستى. سولاردىڭ اراسىنان سۋىرىلىپ شىققاندارى جۇلدەلى ورىندار ءۇشىن تالاستى.
قازاقستاندا جاساقتالعان ۇجىمدار اراسىندا ەڭ جاقسى كورسەتكىشكە «جەڭىس» كلۋبى قول جەتكىزدى. بۇل كوماندانىڭ ساپىندا ەلىمىزدىڭ تانىمال بالۋاندارىمەن قاتار, الەم مەن ەۋروپانىڭ ەكى دۇركىن چەمپيونى, سول جارىستاردىڭ كۇمىس جۇلدەگەرى تاتو گريگالاشۆيلي (گرۋزيا), ازيا ويىندارىنىڭ جەڭىمپازى ەرلان شەروۆ (قىرعىزستان), جاستاردىڭ الەم بىرىنشىلىگىنىڭ جەڭىمپازى سابو ينانەيشۆيلي (گرۋزيا), تاعى باسقا ءبىر توپ لەگيونەر ونەر كورسەتتى. تۋرنير بارىسىندا يسپانيانىڭ «Spanish Judo Car-Madrid», بەلارۋستىڭ «Stayki» جانە موڭعوليانىڭ «Genco» كلۋبتارىن قاپى قالدىرعان جەرلەستەرىمىز قولا مەدال ءۇشىن تارتىستا رەسەيدىڭ «لوكوموتيۆىن» 3:0 ەسەبىمەن ويسىراتا ۇتتى.
چەمپيوندىق اتاق ءۇشىن ايقاس گرۋزيانىڭ «Shevardeni» مەن تاجىكستاننىڭ «Hoji Sharif» ۇجىمدارى اراسىندا ءوتتى. بۇل باسەكەدە قاپ تاۋى بوكتەرىنەن كەلگەن بالۋاندار باسىمدىق تانىتىپ, باس جۇلدەنى ولجالادى. جەڭىمپاز كوماندانىڭ نامىسىن گەورگي تۋتاشۆيلي, كوتە كاپانادزە, زاۋر دۆالاشۆيلي, گەورگي جابنياشۆيلي, شالۆا گۋرەشيزە سىندى ساڭلاقتار قورعادى. تاعى ءبىر قولا مەدال رەسەيدىڭ «Edelweiss» كلۋبىنا بۇيىردى.
جارىس اياقتالعاننان سوڭ, جەڭىس تۇعىرىنا كوتەرىلگەن كوماندالار مىناداي مولشەردە سىياقى الدى: 1-ورىن – 30 مىڭ, 2-ورىن – 20 مىڭ جانە 3-ورىندى ەنشىلەگەندەردىڭ ارقايسىسىنا 10 مىڭ دوللاردان بۇيىردى. سونىمەن قاتار تۋرنير بارىسىندا ايرىقشا كوزگە تۇسكەن بالۋاندارعا ۇيىمداستىرۋشىلار تاراپىنان ارنايى جۇلدەلەر تابىس ەتىلدى. اتاپ ايتساق, تاتو گريگالاشۆيلي «ەڭ ۇزدىك دزيۋدوشى» دەپ تانىلدى. گرۋزيانىڭ ماقتانىشى قازاقتىڭ اتىمتاي جومارتى بەكەت ماحمۇدوۆ اتىنداعى جۇلدەمەن قاتار, 10 مىڭ دوللار يەلەندى. اتاقتى بالۋان, كسرو حالىقتارى سپارتاكياداسىنىڭ جەڭىمپازى قايرات مۇقانوۆتىڭ قۇرمەتىنە تاعايىندالعان جۇلدە («ۇزدىك ءادىس») كوتە كاپانادزەگە, قانات بايشولاقوۆ جۇلدەسى («جەڭىسكە دەگەن جىگەرى ءۇشىن») جانساي سماعۇلوۆقا, وليمپيا ويىندارىنىڭ ەكى دۇركىن جۇلدەگەرى, الەم چەمپيونى ەلدوس سمەتوۆتىڭ جۇلدەسى قۇبانىچبەك ايبەك ۇلىنا, الەم چەمپيونى ماكسيم راكوۆ جۇلدەسى داستان جۇماجانوۆقا بۇيىردى. ولاردىڭ ارقايسىسى 5 مىڭ دوللاردى قالتاسىنا باستى.
ەلىمىزدە تۇڭعىش رەت وتكىزىلىپ وتىرعان جارىستىڭ اشىلۋ جانە جابىلۋ راسىمىندە ءسوز العان قازاقستان دزيۋدو فەدەراتسياسىنىڭ پرەزيدەنتى قۋانىشبەك ەسەكەەۆ, حالىقارالىق دزيۋدو فەدەراتسياسى پرەزيدەنتىنىڭ كەڭەسشىسى الماز السەنوۆ الداعى ءدۇبىرلى دودالاردا قازاق بالۋاندارىنا ساتتىلىك تىلەدى.
