بۇعان دەيىن اۆتوبۋس جۇرگىزۋشىسىن سوققىعا العان ەر ادامعا قاتىستى قىلمىستىق كودەكستىڭ 293-بابى (بۇزاقىلىق) جانە قىلمىستىق كودەكستىڭ 351-بابى (ەكى نەمەسە ودان دا كوپ ادامنىڭ ولىمىنە اكەپ سوقتىرعان كولىكتى قاۋىپسىز پايدالانۋدى قامتاماسىز ەتۋ قاعيدالارىن بۇزۋ) بويىنشا قىلمىستىق ءىس قوزعالعان ەدى.
الماتى قالاسىنىڭ مامانداندىرىلعان اۋدانارالىق تەرگەۋ سوتىنىڭ حابارلاۋىنشا, 24 جەلتوقساندا سوت شەشىمىمەن سوتقا دەيىنگى تەرگەپ-تەكسەرۋ ورگانىنىڭ ءوتىنىشى قاناعاتتاندىرىلىپ, كۇدىكتى 2 اي مەرزىمگە قاماۋعا الىندى.
ايتا كەتەيىك, 22 جەلتوقسان كۇنى الماتىدا قوعامدىق كولىكتە جانجال تۋىنداپ, جۇرگىزۋشى ايەل ادامدى ۇرعان. باقىلاۋدان شىعىپ كەتكەن قوعامدىق كولىك ايالدامادا تۇرعان ادامداردى قاعىپ, ءتورت كولىكپەن سوقتىعىستى. سالدارىنان ءۇش ادام قايتىس بولىپ, تورتەۋى جاراقات الىپ, اۋرۋحاناعا جەتكىزىلدى.
ء«ۇش ەرەسەك ادامعا جابىق باسسۇيەك-مي جاراقاتى, مي شايقالۋى, بىرەۋىنە سول جاق جامباس سۇيەگىنىڭ سىنىعى دياگنوزى قويىلىپ №7 قالالىق كلينيكالىق اۋرۋحاناعا جاتقىزىلدى. ءتورتىنشى زارداپ شەككەن 15 جاستاعى بالا سول تابان سۇيەكتەرىنىڭ سىنۋى دياگنوزىمەن №2 قالالىق بالالار كلينيكالىق اۋرۋحاناسىنا جاتقىزىلدى. زارداپ شەككەندەرگە پسيحولوگيالىق كومەكتى قوسپ, بارلىق قاجەتتى مەديتسينالىق كومەك تولىق كولەمدە كورسەتىلىپ جاتىر», دەپ حابارلادى قالالىق دەنساۋلىق ساقتاۋ باسقارماسىنىڭ ءباسپاسوز قىزمەتى.
