كوشەدە راديو سويلەپ تۇر
وتكەن عاسىردىڭ 50-60-جىلدارى اۋدان ورتالىعىندا عانا ەمەس, كەڭشار, ۇجىمشار, ءتىپتى فەرما ورتالىقتارىنداعى كوشەدە ساڭقىلداپ راديو سويلەپ تۇراتىن شاقتاردى مەنىڭ زامانداستارىم ۇمىتا قويماعان شىعار. راديونىڭ كوشەدە سويلەگەنى تۇرعىندارعا كوڭىلدى اسەر قالدىراتىن. سول ۋاقىتتا قازىرگى كەزدەگىدەي ءار ادامنىڭ قولىندا ءموبيلدى تەلەفون جوق ەدى. بىراق ەرتەڭگى كۇنى اۋا رايىنىڭ قانداي بولاتىنىن كوشە راديوسىنان ەستىپ, ءبىلىپ وتىراتىن. مالشى قاۋىمى قىستا قاتتى بوران نەمەسە اياز, جازدا كۇشتى جەل نەمەسە نوسەر جاڭبىر بولاتىن جاعدايلاردى دا راديودان ەستىپ, ەرتە قامداناتىن.
جاقىندا تاسقالا اۋىلىنىڭ كوشەسىندە سويلەپ تۇرعان جەرگىلىكتى راديو حابارىن ەستىگەندە, وتكەن عاسىردىڭ ورتا شەنىندەگى كوشە راديولارى ەرىكسىز ەسكە ءتۇستى. بالا كەزىمىز. تايپاق اۋدانىنداعى ورال قاراكول قوي كەڭشارىنىڭ №2 «قىرىق-قۇدىق» دەگەن فەرماسىندا تۇردىق. ول كەزدە ورتالىقتاندىرىلعان ەلەكتر جەلىسى جوق. ءار فەرما ورتالىقتارىندا دت-54 تراكتورىنىڭ موتورى ارقىلى ەلەكتر قۋاتى بەرىلەدى. ال اۋىلدا شاعىن ەلەكتر ستانساسى بولدى. قالەكەش دەگەن كىسى سول شاعىن ەلەكتر ستانساسىن كەشكە قوسىپ, تاڭەرتەڭ اعىتىپ تاستايتىن. كۇندىز ۇيلەردە جارىق بولمايتىن.
قاتتى ايازدى نەمەسە بوراندى كۇندەرى مەكتەپتە ساباق بولمايتىنى, اۋىلعا ارتىستەر كەلىپ, كونتسەرت قوياتىنى, كەڭشار ديرەكتورى, پارتكوم قاي كۇنى كەلىپ اۋىل تۇرعىندارىمەن جينالىس, كەزدەسۋلەر وتكىزەتىنى راديو ارقىلى حابارلانىپ تۇراتىن.
تاسقالا اۋىلىندا كوشەدە راديو سويلەپ تۇرعانىن ەستىگەندە, كوڭىلىڭ ءوز-وزىنەن كوتەرىلىپ-اق قالادى ەكەن. ساعىمدانعان بالالىق شاعىڭا قايتا ورالعانداي بولاسىڭ. تەك قاي ۋاقىتتا سويلەپ, قاي ۋاقىتتا سوندىرەتىن جۇمىس كەستەسىن انىقتاسا ەكەن دەگەن تىلەك ايتار ەدىم. راديودان ەل جاڭالىقتارىن, ءتۇرلى حابارلاردى كوشەدە كەلە جاتىپ-اق ەستيسىڭ. اۋىلدا كوشە راديوسى ساڭقىلداپ سويلەي بەرگەي. تۇرعىندار مۇنى جاڭا ءىستىڭ جاقسى باستاماسى دەپ قابىلداپ وتىر.
بيسەنباي وتەگەنوۆ,
زەينەتكەر
باتىس قازاقستان وبلىسى,
تاسقالا اۋدانى
كوڭىلدەن شىققان ىزگى ءىس-شارا
ۇلكەن ىزگى ءىس-شارا «جۇرەك جىلۋى» دەگەن اتپەن جامبىل وبلىسىنىڭ تالاس اۋدانىنداعى اقكول اۋىلىندا وتكىزىلدى. №6 تالاس اۋداندىق ارناۋلى الەۋمەتتىك قىزمەتتەر ۇسىنۋ ورتالىعىنىڭ ۇيىمداستىرۋىمەن وتكەن ءىس-شاراعا مەنىڭ مارات كوكىشەۆ اتتى ۇلىم دا قاتىستى. ول دەنساۋلىعىنا بايلانىستى سول مەكەمەدە ارنايى الەۋمەتتىك قىزمەت الادى. اتالعان باسقوسۋعا شاقىرتۋ العان سوڭ, ءبىز دە بارىپ تاماشالاعان ەدىك.
ءىس-شاراعا كەلگەن اتا-انالاردى قۋانا قۇشاق جايا قارسى الىپ, جىلى سوزدەرىن اياماعان مەكەمە قىزمەتكەرلەرىن كورىپ, كوڭىلىمىز ورنىنا ءتۇستى. وسى زامانعا لايىقتى مەديتسينالىق اپپاراتتاردىڭ كوپتىگىن كورىپ تە ريزا بولدىق. جالپى, ورتالىققا كەلگەن اتا-انالارعا وسىنداعى بولمەلەردىڭ جارىقتىعى, تازالىعى, جىلىلىعى, مەكەمە قىزمەتكەرلەرى مەن الەۋمەتتىك جۇمىس جونىندەگى مامانداردىڭ ەلگەزەكتىگى, قىزمەت الۋشىلاردى قابىلەت-قارىمىنا قاراي ەڭبەككە ۇيرەتۋلەرى دە جاعىمدى اسەر قالدىردى. ءسوز رەتىندە مەكەمە ديرەكتورى جالىن راحىمجان ۇلى ەكەنىن دە ايتا كەتكەندى ءجون كوردىك.
ماعان قىزمەت الۋشىلاردىڭ ءتۇرلى اۋتوترەنينگتەرگە جۇرەكسىنبەي قاتىساتىندارى دا ۇنادى. ال كەش بارىسىندا قىزمەت الۋشىلارمەن قاتار, اتا-انالار دا قاتىسقان ويىندارعا مەكەمە ديرەكتورىنىڭ ءوزى دە اتسالىستى. سونىمەن بىرگە ەڭبەككە باۋليتىن ويىندار دا وتە اسەرلى ءارى مازمۇندى بولدى. جاسى ۇلكەن, كىشىسىنە قاراماي, قىزمەت الۋشىلار مەن قىزمەتكەرلەردىڭ قوناقتارعا ارناپ قويعان كونتسەرتى دە كوڭىل تولقىتتى. قىزمەت الۋشىلاردىڭ ىشىندە دە ونەرلى جاستار بار ەكەن.
قىسقاسى, اۋقىمدى ءىس-شارادان العان اسەرىمىز مول بولدى. ونىڭ ۇستىنە, بالالارىمىزدىڭ سەنىمدى قولدا ەكەندىكتەرىنە كوڭىلدەرىمىز توعايىپ قايتتى, ياعني №6 تالاس اۋداندىق ارناۋلى الەۋمەتتىك قىزمەتتەر ۇسىنۋ ورتالىعىنىڭ قىزمەت الۋشىلارعا جاساپ جاتقان ىزگى ىستەرىنە تەك ريزاشىلىعىمىزدى بىلدىرگىمىز كەلەدى.
ءاليما جۇماباەۆا,
اتا-انالار ۇيىمىنىڭ مۇشەسى
جامبىل وبلىسى,
قاراتاۋ قالاسى
بولاشاق ۇرپاقتىڭ ساۋلەتشىسى
كىتاپحانا جۇمىسى – كوزگە كورىنە بەرمەيتىن اعىسى باياۋ تەرەڭ وزەن سەكىلدى, تۇسىنگەن ادامعا جاۋاپتى جۇمىس. كىتاپحاناشى – جاي عانا ماماندىق ەمەس. ول – ادام بالاسىنا باعدار بەرۋشى. ەگەر دە قوعامعا بەيىم, ءبىلىم نارىمەن تەرەڭ سۋسىنداعان, تاربيەلى دە ىزگى جۇرەكتى جاستار الدارىنا ۇلكەن ماقساتتار قويىپ جاتسا, مۇندا كىتاپحاناشىلاردىڭ دا ەڭبەگى بار. ويتكەنى ولار – بولاشاق ۇرپاقتىڭ ساۋلەتشىسى.
بۇگىن ەلىمىزدە كىتاپحانا ءىسى بويىنشا بىرنەشە وقۋ ورنىندا ماماندار دايارلانادى. سولاردىڭ بىرەگەيى – ءال-فارابي اتىنداعى قازاق ۇلتتىق ۋنيۆەرسيتەتى. ءبىلىم مەن تاربيەنى قاتار ۇشتاستىرا بىلگەن, بولاشاققا نىق قادام باساتىن دارىندى, ىزدەنىمپاز جاستاردىڭ قارا شاڭىراعىندا «كىتاپحانالىق اقپاراتتىق جۇيەلەر» سالاسى بويىنشا 2023-2024 وقۋ جىلىندا 22 باكالاۆر, 8 ماگيسترانت, 6 عىلىم جولىن كوزدەگەن PhD دوكتورانت دايىنداپ شىعارىلادى. وقىتۋ قازاق, ورىس جانە اعىلشىن تىلدەرىندە جۇرگىزىلەدى. وقۋ تۇرلەرى مەن مەرزىمى: ورتا بىلىمنەن كەيىن كۇندىزگى بولىمدە باكالاۆريات – 4 جىل, ماگيسترانت – 2 جىل, دوكتورانت 3 جىل ءبىلىمىن جەتىلدىرەدى. مۇندا تەك وتاندىق وقىتۋشىلار عانا ەمەس, شەتەل ۋنيۆەرسيتەتتەرى عالىمدارى دا ءدارىس بەرەدى.
ۋنيۆەرسيتەتتىڭ باستى ماقساتى – ەلىمىزدىڭ عىلىمىنا, ەكونوميكاسى مەن باسقا دا ماڭىزدى سالالارىنا قاجەتتى زاماناۋي, جوعارى ءبىلىمدى, تاربيەلى, باسەكەگە قابىلەتتى مىقتى ماماندار بۋىنىن قالىپتاستىرۋ. «ەل بولامىن دەسەڭ, بەسىگىڭدى تۇزە» دەگەن قاعيدا – ۋنيۆەرسيتەتتىڭ نەگىزگى ۇستانىمى.
بولاشاقتا ەلىمىزدەگى كىتاپحانا سالاسىنىڭ دامۋىنا ءوز ۇلەسىن قوسىپ, وسى ماماندىقتىڭ قىر-سىرىن تەرەڭنەن مەڭگەرەتىن, قازاقستاننىڭ باسەكەگە قابىلەتتى ەلدەردىڭ قاتارىنا قوسىلۋىنا ءوز ۇلەستەرىن قوسۋعا ۇمتىلاتىن جاستاردى ۋنيۆەرسيتەتتىڭ تۇلەگى بولۋعا شاقىرامىز.
بايان اسانوۆا,
تاريح عىلىمدارىنىڭ كانديداتى, اعا وقىتۋشى,
ۇلپان جاپسارباي,
«كىتاپحانالىق اقپاراتتىق جۇيەلەر»
ماماندىعىنىڭ 2-كۋرس ماگيسترانتى
الماتى
