كۇز جاۋىندى-شاشىندى بولعانىمەن, مايتوڭعىسىز جىلى ەدى. بيىلعى قىس شىبىنسىز جاز سياقتى جىلى بولادى دەپ جورامال ايتاتىن ساۋەگەيلەر كوبەيگەن. ايتسە دە, تىلسىم سىرىن ىشىنە بۇككەن تابيعاتتىڭ قىلت ەتپە توسىن مىنەزى كوپ. جەلتوقسان تۋىسىمەن كۇن كۇرت سۋىتتى. الدىمەن ستەپنوگور قالاسىنىڭ جىلۋ جۇيەسىندە اپات ورىن الىپ, كوڭىلدى كۇپتى ەتكەن. ىلە وبلىس ورتالىعىنداعى ر.ساباتاەۆ, ب.ءاشىموۆ, م.عابدۋللين, ە.سەركەباەۆ كوشەلەرىنىڭ قيىلىسىنداعى جىلۋ جۇيەسىندە وقىس وقيعا ورىن الىپ, وننان استام كوپقاباتتى تۇرعىن ءۇي جىلۋسىز قالدى. سول كۇندەرى اۋا تەمپەراتۋراسى -40 گرادۋسقا تاياپ قالعان. جىلۋسىز قالعان ءۇي تۇرعىندارى تون جامىلعانىمەن, توڭازىپ تاڭ اتىردى.
الدىمەن ستەپنوگور قالاسىنداعى اپات تۋرالى ايتا كەتەلىك. جاۋاپتى مەكەمەنىڭ مالىمەتىنشە, جەلتوقساننىڭ 7-ءسى كۇنى ءتۇن ورتاسى اۋا جىلۋ قۇبىرى جارىلىپ, اپات سالدارىنان جەتى مىڭعا جۋىق تۇتىنۋشىسى بار ءۇش بىردەي شاعىن اۋدان جىلۋسىز قالعان. اپاتتىڭ سالدارىن جويىپ, بار جۇمىستى قالپىنا كەلتىرۋ ءۇشىن توزىعى جەتكەن جىلۋ جۇيەلەرىنىڭ يەسى «ستەپنوگورسك تەپلوترانزيت» سەرىكتەستىگى 30 ادام مەن 6 بىرلىك تەحنيكانى جۇمىلدىرىپ, جانتالاسا جۇمىس ىستەدى. جەلتوقساننىڭ 8-ءى كۇنى اپات سالدارى بىرتىندەپ جويىلىپ, جىلۋ جۇيەسىن سۋمەن تولتىرۋ جانە وسى ۋاقىتقا دەيىن توڭىپ, جاۋراپ وتىرعان شاعىن اۋدان تۇرعىندارىنىڭ ۇيلەرىنە جىلۋ بەرۋ باستالدى. اكىمدىك بەرگەن اقپاراتقا سەنسەك, قازىرگى كۇنى جاعداي قالىپتى. ءبىر ەسەپتەن ستەپنوگور قالاسىنىڭ جىلۋ جۇيەسىنىڭ توزىعى ابدەن جەتكەندىگى, بۇل تاراپتاعى ءىستىڭ جايىن بىلەتىن مامان كادرلاردىڭ تاپشى ەكەنى تۋرالى وتكەن جىلى ەل گازەتى – «ەگەمەندە» جاريا ەتكەن بولاتىنبىز. جالعىز ءبىز عانا ەمەس, بۇقارالىق اقپارات قۇرالدارىنىڭ كوپشىلىگى ۇلارداي شۋلاعان. مەملەكەت تاراپىنان قىرۋار قارجى ءبولىندى. جاناشىرلىق جاسالمادى دەپ وكپەلەۋدىڭ ءجونى جوق. مەملەكەت باسشىسى قاسىم-جومارت توقاەۆتىڭ ءوزى تىكەلەي تاپسىرما بەرىپ, ۇكىمەت قورىنان 2 ميلليارد تەڭگە قاراجات باعىتتالدى. كەيىن جاۋاپتى جەرگىلىكتى باسشىلار تاراپىنان كوڭىلگە سەنىم ۇيالاتاتىن سەرتكە بەرگىسىز اقپارات تا ايتىلدى. قاقاعان اياز كەلگەنشە قاعازدا ءبارى قاتىپ تۇر ەدى.
«جىعىلعانعا جۇدىرىق» دەگەندەي, ستەپنوگور قالاسىنداعى شۋ باسىلا بەرگەندە, بۋراباي باۋرايىندا تاعى ءبىر بىتەۋ جارانىڭ وزەگى جارىلىپ, شۋ شىقتى. اۋدان اكىمى اراي سادىقوۆ الەۋمەتتىك پاراقشاسىندا ءمان-جايدى ءتۇسىندىرىپ, جازبا جاريالادى. بەلگىلىسى, جەلتوقساننىڭ 3-ءى كۇنى ششۋچينسك قالاسىنىڭ №12 قازاندىعىنداعى مازۋت قۇيىلعان تسيستەرنانىڭ قابىرعاسىندا 32 ميلليمەترلىك جارىق پايدا بولعان. وسى جارىقتىڭ سالدارىنان سىزدىقتاپ اققان مازۋت جىلۋ جۇيەسىنە قوسىلىپ كەتكەن. سونىڭ اسەرىنەن قويمالجىڭ تارتقان سۋ قوسپاسى جىلۋ قازاندىعىنا جاقىن ورنالاسقان نىساندارىن ىشكى جىلۋ جۇيەسىن تۇگەل بىتەپ تاستاماعانىمەن, ىستىق سۋدىڭ كىدىرىسسىز وتۋىنە مۇمكىندىك بەرمەيتىن دەڭگەيگە جەتكەن. ىستىق سۋ وتپەگەننەن كەيىن بەس كوپپاتەرلى تۇرعىن ءۇي مەن №8 مەكتەپ-گيمنازياسى جىلۋسىز قالعان.
– بۇل قازاندىق ستانتسيوننىي شاعىن اۋدانىن, بۋراباي كۋرورتتى ستانساسىن, تەمىر جول كاسىپورىندارىن جىلۋمەن قامتاماسىز ەتەدى. قازىرگى ۋاقىتتا «جاڭا تۇرمىس 2020» سەرىكتەستىگى №8 مەكتەپ-گيمنازيانىڭ جىلۋ جۇيەسىن مازۋت قوسىلعان قويمالجىڭ سۋدان تازارتىپ جاتىر. قازىرگى ۋاقىتتا جىلۋ جۇيەسىنىڭ سۋى تازارىپ كەلەدى, – دەيدى اۋدان اكىمى اراي سەرىكباي ۇلى, – بۇگىنگى تاڭدا جىلۋ قالىپتى بەرىلە باستادى.
ەندى اسا ءبىر ماڭىزدى ماسەلەگە كوڭىل اۋدارالىق. بيىلعى جىلى جىلۋ ماۋسىمىن ويداعىداي وتكىزۋ ءۇشىن بيۋدجەتتەن قىرۋار قاراجات قاراستىرىلىپ, ونىڭ ىشىندە كوممۋنالدىق كاسىپورىندارعا ەنەرگيا رەسۋرستارىن ساتىپ الۋعا 9,8 ميلليارد تەڭگە بولىنگەن بولاتىن. وبلىستىق تۇرعىن ءۇي-كوممۋنالدىق شارۋاشىلىعى باسقارماسىنىڭ مالىمەتىنە قاراعاندا, جەكەمەنشىك تۇرعىن ءۇي يەلەرى 685 مىڭ توننا كومىر دايىنداعان. ال جىلدا پايدالاناتىنى ءبىر ميلليون تونناعا جۋىق. دەمەك ءالى دە قىرۋار كومىر قاجەت. ال جىلىتۋ ماۋسىمىنا قاجەتتى مازۋت تۋرالى ايتاتىن بولساق, كوممۋنالدىق قىزمەتتەردىڭ قويماسىندا 7 496 توننا مازۋت بار. كەرەگى 62 مىڭ توننا. ايىرماشىلىعى كوزگە ۇرىپ تۇر.
الا جازداي ايتىلعان اقپاراتتاردىڭ قانشالىقتى شىندىققا جاناساتىندىعىن جەلتوقساننىڭ العاشقى كۇندەرىندەگى اياز باستان جاقتى ايىرعانداي ەتىپ كورسەتىپ بەردى. تەگى جالعان اقپارات جارعا جىعادى دەيتىن اقيقاتشىل ءسوز شىن-اۋ ءتايىرى.
اقمولا وبلىسى
