بيىل حالىقارالىق الماتى اۋەجايى ءۇشىن جولاۋشىلار اعىنىنىڭ رەكوردتىق كورسەتكىشى تىركەلىپ وتىر. بۇگىنگى ەسەپ بويىنشا بيىلدىققا 9 ميلليون ازامات اۋەجاي قىزمەتىن پايدالانعان. ماراتتىڭ ەنشىسىنە ءداپ سول 9 ميلليونىنشى ءساتتى بيلەت بۇيىرىپتى. مۇلدە ويلاماعان جەردەن ولجاعا كەنەلگەن جولاۋشىنى اۋەجاي باسشىلىعى قۋانىشپەن قارسى الىپ, ەكى كىسىگە ارنالعان دەمالىس سەرتيفيكاتىن تابىستادى. وسىلايشا, ءساتتى بيلەت يەسى جاقىن جاندارىنىڭ بىرىمەن بودرۋمعا ساياحاتقا اتتانباق.
«بۇل – اۋەجاي ءۇشىن دە, الماتى قالاسى ءۇشىن دە تاريحي وقيعا. نەگە دەسەڭىز, الماتى اۋەجايىنىڭ بۇكىل تاريحىندا العاش رەت جولاۋشىلار اعىنى 9 ملن ادامعا جەتىپ وتىر. ءساتتى بيلەت يەسىنە سىيلاعان جولدامادا بارلىعى قامتىلعان. وسى رەتتە بىزبەن جۇمىس ىستەيتىن بارلىق اۋە كومپانياسىنا العىس بىلدىرەمىن. ءبىز ول كىسىلەر بولماسا, وسىنداي ناتيجەگە قول جەتكىزبەس ەدىك. بولاشاقتا جاڭا جولاۋشىلار تەرمينالى اشىلسا, 10 ميلليونىنشى جولاۋشىنى قابىلدارىمىز ءسوزسىز. وسى ورايدا كولىك جانە كوممۋنيكاتسيا مينيسترلىگىنە العىس بىلدىرەمىن», دەيدى حالىقارالىق الماتى اۋەجايىنىڭ پرەزيدەنتى الىپ ەر تۋنگا ەرسوي.
كۇتپەگەن قۋانىشقا كەنەلگەن مارات نۇرالين اۋەجايدا وزىنە مۇنداي سىي-قۇرمەت كورسەتىلگەنىنە ءدان ريزا. قۋانىشىن جاسىرا الماعان جولاۋشى ءوز اسەرىمەن ءبولىستى.
«مەن ءوزىم استانا قالاسىنىڭ تۇرعىنىمىن, الماتىعا قۇدامىزدىڭ مەرەيتويىنا كەلدىك. بىزگە ۇشاقتا كىشكەنە كۇتە تۇرىڭىزدار دەگەندە ۋايىمداپ قالدىق. كىرەبەرىستە قۇتتىقتاپ جاتقاندا نە بولدى ەكەن دەگەن قورقىنىش بولدى. وسىنداي سىيعا يە بولعانىما قۋانىشتىمىن. ءوزىم ۇشاقپەن ءجيى ۇشامىن. الدىڭعى اپتادا عانا الماتىعا كەلگەن ەدىم. تۇرىك ەلىنە مۇلدە جولىمىز تۇسپەگەن ەكەن, توسىن جولداما سونىڭ ءساتىن تۋدىرار. اسىرەسە زايىبىمنىڭ قۋانىشىندا شەك جوق», دەيدى م. نۇرالين.
ايتپاقشى, ەلىمىزدىڭ اۋە قاقپاسى سانالاتىن الماتى ايلاعىنىڭ وتكىزۋ قابىلەتىن ارتتىرۋ ماقساتىندا جاڭا حالىقارالىق جولاۋشىلار تەرمينالىنىڭ قۇرىلىسى ءجۇرىپ جاتىر. كەشەن كەلەر جىلدىڭ جاز ايىندا اياقتالماق. سۋ جاڭا عيمارات بورت كولەمىنە بايلانىستى ءبىر ۋاقىتتا جەتى ۇشاققا دەيىن قابىلداۋعا قاۋقارلى. ال اۋەجايدىڭ جالپى وتكىزۋ قابىلەتى جىلىنا 14 ملن جولاۋشىعا دەيىن ارتپاق. جوباعا سايكەس قۇرىلىم قولدانىستاعى تەرمينال عيماراتىنا جەرۇستى وتكەلى ارقىلى قوسىلادى. جاڭا ۇلگى جولاۋشىلارعا عيماراتتىڭ سىرتىنا شىقپاي-اق ىشكى جانە حالىقارالىق رەيستەردەن اۋىسۋعا وڭاي قول جەتكىزۋدى قامتاماسىز ەتپەك. وسىلايشا, جاڭا تەرمينال تەك حالىقارالىق رەيستەرگە, ال قولدانىستاعى تەرمينال ىشكى رەيستەرگە قىزمەت كورسەتەدى.
الماتى
