باۋىرجان جاقىپتىڭ ەسىمى ولەڭ ولكەسىندە وزىنە ءتان ورنەگى بار اقىن, عىلىم جولىندا ىرگەلى ىزدەنىستەرگە بارعان عالىم, جۋرناليستەردىڭ بىرنەشە بۋىنىن تاربيەلەگەن ۇلاعاتتى ۇستاز رەتىندە كوپشىلىككە جاقسى تانىس. اسقارالى الپىس جاسقا ۇلكەن شىعارماشىلىق تابىسپەن جەتكەن ونىڭ وتتى جىرى وقىرماننىڭ سىرلاسىنا اينالعانىن مازمۇندى ءىس-شاراعا جينالعان زيالى قاۋىم تەبىرەنە جەتكىزدى.
كەش شىمىلدىعى مەملەكەت باسشىسى قاسىم-جومارت توقاەۆتىڭ قۇتتىقتاۋ حاتىمەن اشىلىپ, پرەزيدەنتتىڭ ىزگى لەبىزىن رۋحاني ءىس-شارانى تىزگىندەگەن ماماي احەتوۆ وقىپ بەردى. وندا «وقىرمان قاۋىم ءوزىڭىزدى قازاق پوەزياسىن دامىتۋعا ەلەۋلى ۇلەس قوسقان كورنەكتى اقىن, قارىمدى قالامگەر رەتىندە قۇرمەتتەيدى. ءسىز ۇزاق جىل بويى ءال-فارابي اتىنداعى قازاق ۇلتتىق ۋنيۆەرسيتەتىندە ەڭبەك ەتىپ, كوپتەگەن شاكىرت تاربيەلەدىڭىز. «قازاق ەنتسيكلوپەدياسىن» باسقارىپ, ءتول شەجىرەمىزدى تاڭبالاۋ ىسىنە زور ەڭبەك ءسىڭىردىڭىز. ءسىزدىڭ كوركەمدىك قۋاتى مول شىعارمالارىڭىز جۇرتشىلىقتىڭ جۇرەگىنە جول تاۋىپ, لايىقتى باعاسىن الدى. تۋىندىلارىڭىز وزگە تىلدەرگە اۋدارىلىپ, قازاق ادەبيەتىن دارىپتەۋگە ۇلەس قوسىپ كەلەسىز. ءتول مادەنيەتىمىزدى وركەندەتۋ جولىنداعى ەسەلى ەڭبەگىڭىز ءۇشىن شىنايى ريزاشىلىعىمدى بىلدىرەمىن. الداعى ۋاقىتتا دا وقىرماندارىڭىزدى جاۋھار جىرلارىڭىزبەن قۋانتا بەرەسىز دەپ سەنەمىن», دەلىنگەن حاتتا.
كەش قوناقتارى شىعارماشىلىق گالەرەياسى نازىك سەزىمدەرمەن ءيىرىم تاپقان باۋىرجان اقىننىڭ ليريكالىق ورامدارىنا تەبىرەنە تولقىپ, شايىردىڭ سوزىنە جازىلعان سۇلۋ سازدارمەن بىرگە تەربەلدى. تۋعان ولكە مۇڭىن سۋرەتتەگەن «جان داۋاسى» پوەماسى نەگىزىندە ازىرلەنگەن قويىلىم سەمەي پوليگونىنىڭ قازاق بالاسى مەن قازاق دالاسىنا تيگىزگەن قاسىرەتىن شەرلەنە جەتكىزدى. ال اقىننىڭ «دومبىرا» جانە «ۇرشىق» ولەڭدەرىنە قۇرىلعان ليريكالىق كومپوزيتسيا ۇلتتىق قۇندىلىقتارىمىزدىڭ كيە-قۇتىن كوڭىلگە قۇيىپ بەردى.
قالامداس ىنىلەرىنىڭ ادەبيەت پەن پۋبليتسيستيكاداعى ايبىندى ادىمى تۋرالى اقتارىلا ايتقان مەملەكەتتىك سىيلىقتىڭ يەگەرلەرى تەمىرحان مەدەتبەك پەن يرانبەك ورازباەۆ جىردان شاشۋ شاشسا, ۇلىقبەك ەسداۋلەت تۇركسوي حالىقارالىق ۇيىمىنىڭ باس حاتشىسى سۇلتان راەۆتىڭ كەش يەسىنە جولداعان قۇتتىقتاۋ حاتىن جەتكىزدى. ءحانبيبى ەسەنقارا, قاتيرا جالەنوۆا, ابزال بوكەن, بولات شاراقىمباي, ناعاشىبەك قاپالبەك ۇلى قاتارلى اقىن-جازۋشىلار كەش يەسىنىڭ شىعارماشىلىعى حاقىندا جاقسى ءسوز ايتىپ, ازاماتتىق كەلبەتىن جىرمەن كەستەلەدى.
– باۋىرجان قازاق ادەبيەتىنە ەرتە باستان ەتەنە ارالاسقان, تالانتىمەن جاستاي تانىلعان دارىندى اقىنداردىڭ ساناتىندا. سوناۋ 80-جىلداردا جارىق كورىپ, جۇرتتى ەلەڭ ەتكىزگەن «ۇرشىق» دەگەن تىرناقالدى ولەڭىنەن باستاپ, ۇلتتىق رۋحقا سۋارىلعان كەسەك-كەسەك جىرلارى اباي, شاكارىم, مۇحتار, تولەۋجانداي ۇلىلار مەن كلاسسيكتەر تۋعان توپىراقتان پوەزياعا ماڭدايى جارقىراعان ۇرپاق كەلگەنىن ايعاقتادى. باۋىرجان اقىن ۇنەمى جىردان-جىرعا, كىتاپتان-كىتاپقا وسۋمەن بولعانىن باعامدايمىز, – دەيدى ۇلىقبەك ەسداۋلەت.
رۋحاني كەشتە ءشامىل ءابىلتاي, بايان ساعىمباەۆا, ساۋلە جانپەيىسوۆا, قادىرعالي كوبەنتاي, ادىلەت مۇسا, «سەرىلەر» توبى, گۇلميرا سارينا سىندى ونەر ساڭلاقتارى اقىن شىعارماشىلىعىنان سىر شەرتتى. الماتى قالاسى اكىمدىگىنىڭ ۇيىتقى بولۋىمەن وتكەن كەشتە باۋىرجان جاقىپقا حالىقارالىق «جامبىل قورىنىڭ» التىن مەدالى تابىستالدى.
الماتى
