اتادان بالاعا مۇرا – اتاكاسىپ, سالت-ءداستۇرىمىزدى جاڭعىرتۋدىڭ حاس شەبەرى اتانىپ جۇرگەن اق سامايلى قاريالار مەن اق جاۋلىقتى انالاردىڭ قاتىسۋىمەن كەگەن اۋداندىق مادەنيەت ۇيىندە «اتام, اجەم جانە مەن» اتتى تاعلىمى مول بايقاۋ ءوتتى. اۋداندىق ىشكى ساياسات ءبولىمى, اۋداندىق انالار كەڭەسى جانە «شولپان» رەسۋرستىق ورتالىعى قوعامدىق قورى» ۇيىتقى بولعان ءىس-شارانى وتكىزۋدەگى باستى ماقسات – وتباسىنىڭ ىنتىماق-بىرلىگىن, ۇرپاقتار ساباقتاستىعىن, ونەگەلى تاجىريبەسىن ۇلگى ەتىپ, ناسيحاتتاۋ.
ماعىناسى زور بۇل بايقاۋعا 12 اۋىلدىق وكرۋگتەن ومىردەن كورگەن-تۇيگەنى مول ونەگەلى اتالار مەن اجەلەر نەمەرە-شوبەرەلەرىمەن قاتىسۋعا نيەت ءبىلدىرىپ, بەلسەنە اتسالىسقاندىعىن ايرىقشا اتاۋ ابزال. شەبەر اجەلەردىڭ قيىندىدان قيۋلاستىرعان قۇراق كورپە, زەرلى كەستەلەرى مەن اتالاردىڭ ات ابزەلدەرىنەن باستاپ, بالالارىنىڭ قولىنان شىققان زاماناۋي تۇرمىستىق بۇيىمدارى كورمەگە قويىلىپ, كوپتىڭ قىزىعۋشىلىعىن تۋدىردى.
«زامانىنا قاراي – ادامى» دەگەن. وسى كۇنى قولىنا ينە ۇستاپ, ءىس تىگەتىن كەلىندەر قاتارى كەمىپ بارادى. ەسكىنى جاڭارتۋ, جوقتان بار جاساي ءبىلۋ – ۇلكەن ونەر. ۇيدەگى بالا-شاعا, نەمەرەلەرىمە وتكەن كۇندى وسيەت ەتىپ ايتىپ, ىسمەرلىكپەن قوسا, ماي شايقاپ, قۇرت جاساۋعا باۋلىپ وتىرامىن. بۇگىنگى بايقاۋدان جاستار تۇگىلى ءوزىمنىڭ ۇيرەنەرىم كوپ ەكەن. ءبىراز دۇنيەنى جادىما ءتۇيىپ بارامىن. وسىنى ۇيىمداستىرعان شولپان ىلىكقىزىنا العىسىمىز شەكسىز», – دەيدى بولەكساز اۋىلىنان كەلگەن ىسمەر اجە نۇرجامال ءماتىلوۆا.
شەبەرلىكتى پاش ەتكەن بايقاۋ بارىسىندا قولونەر بۇيىمدارى ساراپقا سالىنىپ, كورمەگە قاتىسۋشىلاردىڭ ەڭبەكتەرى باعالاندى. ادىلقازىلار قورىتىندىسى بويىنشا 1-ورىندى بولەكساز اۋىلدىق وكرۋگىنەن كەلگەن قوزىباەۆتار وتباسى يەلەنسە, 2-ورىن تاساشى اۋىلدىق وكرۋگىنىڭ تۇرعىنى مەيىرمانوۆتار وتباسىنا بۇيىردى. ال جۇلدەلى 3-ورىندى قارابۇلاق اۋىلدىق وكرۋگىنەن قاتىسقان ۇزاقوۆتار ەنشىلەدى.
سونداي-اق جىل بويى قوعامدىق ىستەردە بەلسەندىلىك تانىتقان انالارعا ارنايى سىيلىقتار تابىس ەتىلدى. بايقاۋ سوڭى اسەم ءان, كۇمبىرلەگەن كۇيمەن قورىتىندىلاندى.
الماتى وبلىسى
