ەرنۇردىڭ يدەياسىن جۇزەگە اسىرۋعا, ەكسپەريمەنتتىك مودەل جاساۋعا روبوتوتەحنيكا ۇيىرمەسىنىڭ جەتەكشىسى, ۇستازى داۋلەتيار باقىتالى قولعابىس ەتكەن.
جامبىل اۋدانى, قارعالى اۋىلىنىڭ ونىنشى سىنىپ وقۋشىسى كوزىلدىرىك ينفراقىزىل سەنسورمەن جابدىقتالعانىن, جوبا جولدا قاۋىپسىزدىكتى ساقتاۋعا باعىتتالعانىن ايتتى.
«كوزىلدىرىكتىڭ جاقتاۋىنا ينفراقىزىل سەنسور ورناتىلعان. ارنايى ۇساق قۇرىلعى جۇرگىزۋشىنىڭ جاعدايىن ۇنەمى قاداعالاپ وتىرادى. كوزىلدىرىك شارشاۋ مەن ۇيقىعا كەتۋ بەلگىلەرىن انىقتاي الادى. ەگەر جۇرگىزۋشىدە وسىنداي بەلگىلەر بايقالسا, كوزىلدىرىكتىڭ ءوزى دابىلدى ەسكەرتۋ جاسايدى», دەدى جاس ونەرتاپقىش.
ەرنۇر قۇراستىرعان بىرەگەي كوزىلدىرىگىنە باسقا دا فۋنكتسيالار ورناتىپ, تولىقتىرىپ جاتىر. ول كوزىلدىرىك نارىققا تۇسسە جۇرگىزۋشىلەردىڭ كولىك ايداۋىن جەڭىلدەتىپ, جول اپاتىنىڭ الدىن الاتىنىنا سەنىمدى ەكەنىن جەتكىزدى.
