باتىس ءوڭىرىنىڭ الەۋمەتتىك جانە ونەركاسىپتىك دامۋى ءۇشىن ستراتەگيالىق ماڭىزى زور جوبا مەملەكەت باسشىسى قاسىم-جومارت توقاەۆتىڭ تاپسىرماسى بويىنشا جۇزەگە اسىرىلدى.
پرەمەر-مينيستر اتاپ وتكەندەي, قايتا جاڭعىرتىلعان «استراحان –ماڭعىشلاق» ماگيسترالدى سۋ قۇبىرى اتىراۋ جانە ماڭعىستاۋ وبلىستارىنىڭ حالقى مەن كاسىپورىندارى جانە اۋىل شارۋاشىلىعى ءۇشىن قوسىمشا 60 مىڭ تەكشە مەتر سۋ بەرۋ كوزىنە اينالادى.
جوبا شەڭبەرىندە توزىعى جەتكەن جابدىقتاردى جاڭارتۋ جۇمىستارى جۇرگىزىلىپ, ۇزىندىعى شامامەن 177 شاقىرىم ماگيسترالدى سۋ قۇبىرىنىڭ ەكى ۋچاسكەسى اۋىستىرىلدى. قۇرىلىس جۇمىستارىنا 500-دەن استام ادام جۇمىلدىرىلدى. ناتيجەسىندە, «استراحان – ماڭعىشلاق» سۋ قۇبىرىنىڭ وتكىزۋ قابىلەتى تاۋلىگىنە 110-نان 170 مىڭ تەكشە مەترگە دەيىن ارتتى.
«سۋ قۇبىرىن كۇردەلى جوندەۋ بەلگىلەنگەن مەرزىمنەن بۇرىن اياقتالدى. وعان ءتيىمدى جوبالىق شەشىمدەر مەن جوعارى قۇرىلىس قارقىنى ناتيجەسىندە قول جەتكىزىلدى. بۇل جوبا سوڭعىسى ەمەس, وڭىردە سۋمەن قامتاماسىز ەتۋگە بايلانىستى باسقا دا اۋقىمدى جوبالار بار», دەدى ءاليحان سمايىلوۆ.
ماسەلەن, كەندىرلى كەنتىندە جالپى قۋاتى تاۋلىگىنە 50 مىڭ تەكشە مەتر بولاتىن سۋ تۇششىلاندىرۋ زاۋىتى سالىنىپ جاتىر. ودان جاڭاوزەن قالاسىنا دەيىن ۇزىندىعى 105 كم ماگيسترالدى سۋ قۇبىرى تارتىلادى.
بۇدان باسقا «كاسپي» سۋمەن جابدىقتاۋ زاۋىتىن رەكونسترۋكتسيالاۋ جۇرگىزىلىپ جاتىر. ناتيجەسىندە, ونىڭ قۋاتى 2 ەسە, ياعني 40 مىڭ تەكشە مەترگە دەيىن ارتادى.
«ماقساتىمىز – 2026 جىلعا قاراي ەلدى مەكەندەردى 100% اۋىز سۋمەن قامتاماسىز ەتىپ, حالىق پەن ءوندىرىس ورىندارىن ودان ءارى تۇراقتى سۋ كوزدەرىمەن قامتاماسىز ەتۋ. ول ءۇشىن جاڭا گيدروتەحنيكالىق قۇرىلىستار مەن سۋ قۇبىرلارىن سالۋ جانە قازىرگى قۇبىرلاردى جاڭعىرتۋ بويىنشا جوبالار ىسكە اسىرىلىپ وتىر. ەلدى مەكەندەرگە سۋ تاراتۋ جەلىلەرى سالىنۋ ۇستىندە, ال شالعاي اۋىلداردا جەر استى كوزدەرىنەن سورعى مودۋلدەرى ورناتىلىپ جاتىر. الدىمىزدا ءالى دە كوپ جۇمىس بار», دەپ اتاپ ءوتتى ۇكىمەت باسشىسى.
«قازمۇنايگاز» ۇك» اق باسقارما توراعاسى ماعزۇم مىرزاعاليەۆ ءمالىم ەتكەندەي, جوبانى ىسكە اسىرۋ كەزىندە تەلەكوممۋنيكاتسيالىق جانە باقىلاۋ جابدىقتارى, كاتودتى قورعاۋ ستانسالارى مەن اۆتونومدى گيبريدتى قوندىرعىلار, سونداي-اق قۇبىر ونىمدەرىنىڭ ءبىر بولىگى وتاندىق وندىرۋشىلەردەن ساتىپ الىندى.
رەسمي سالتاناتتى ءىس-شاراعا اتىراۋ وبلىسىنىڭ اكىمى سەرىك شاپكەنوۆ, ەنەرگەتيكا ءمينيسترى الماسادام ساتقاليەۆ, «سامۇرىق-قازىنا» اق باسقارما توراعاسى نۇرلان جاقىپوۆ, «قازترانسويل» اق باس ديرەكتورى تالعات قۇرمانباەۆ, «ماگيسترالدى سۋاعىزعى» جشس باس ديرەكتورى بەرىك سالپەك جانە مەردىگەر ۇيىمداردىڭ وكىلدەرى قاتىستى.
انىقتاما: «استراحان – ماڭعىشلاق» ماگيسترالدى سۋ قۇبىرى 1988 جىلى پايدالانۋعا بەرىلگەن. اتالعان سۋ قۇبىرى اتىراۋ وبلىسىنىڭ قۇرمانعازى, يساتاي جانە جىلىوي اۋداندارى, سونداي-اق ماڭعىستاۋ وبلىسىنىڭ جاڭاوزەن قالاسى, بەينەۋ, ماڭعىستاۋ, قاراقيا جانە تۇپقاراعان اۋداندارىنىڭ تۇتىنۋشىلارىن سۋمەن قامتاماسىز ەتەتىن جالعىز ورتالىقتاندىرىلعان سۋ كوزى. جالپى, اتالعان قۇبىردان سۋدى ماڭعىستاۋ وبلىسى تۇرعىندارىنىڭ 35%-دان استامى جانە اتىراۋ وبلىسى تۇرعىندارىنىڭ 28%-دان استامى تۇتىنادى.
