قالانىڭ باتىس جاق بەتكەيىندەگى انشەيىندە مۇلگىگەن تىنىشتىققا بوگىپ تۇراتىن جاتاعان ءۇيدىڭ اۋلاسى قاربالاس قيمىلدان تۋىنداعان دىبىسقا تولى. تاڭعى تىمىق اۋادا الىستان ەستىلىپ تۇرعان قۋانىشتىڭ داۋسى. جەلتوقساننىڭ جۋان ورتاسىنداعى اپتالاپ تۇرىپ العان ۇسكىرىك اياز بەتىڭدى شىمشىپ وينايدى. ەكى ءجاسوسپىرىم ءالى قابارىپ قاتا قويماعان, توبارسىعان قاردى جالپاق كۇرەكپەن ويىپ الىپ, قاڭىلتىر سۇيرەتپەگە تيەپ جاتىر. تولتىرىپ بولعان سوڭ بۇقپا تاۋىنىڭ باۋرايىنان بەرى سوزىلىپ جاتقان تابيعي جىرانىڭ تابانىنا تاستاماق. ءۇي يەسى سەكسەندى القىمداپ قالعان قاريا – قازبەك سماعۇلوۆ. قولعابىس جاساپ جاتقان كورشى-قولاڭنىڭ بالالارىن مەيىرىم تۇنعان, ءسال جاساۋراعان جانارىمەن ايمالاپ قويادى.
– جاس جەر ورتاسىنان اۋعان سوڭ كۇرەك ۇستاپ قايرات قىلۋدان دا قالدىق, – دەيدى وتاعاسى. – ونىڭ ۇستىنە ءسال سۋىق تيسە بەل شويىرىلىپ, باستىرماي قالادى. الگى كەمپىرىمە مەن شىعىپ تازالا دەسەم, ءوزىڭ تازالا دەيدى. ەكەۋمىز ەجىكتەسىپ وتىرعانىمىزدا مىنا بالالاردىڭ كەلە قالعانىن كورمەيسىڭ بە. اينالىپ كەتەيىندەر بىلتىر دا وسىنداي قولعابىس كورسەتكەن. نەسىن ايتاسىڭ, قولىمىزدى ۇزارتىپ تۇر.
وبلىستاعى ەرىكتىلەر قىس تۇسكەلى جالعىزىلىكتى جانداردىڭ اۋلالارىن تازالاپ, وتىن-كومىرلەرىن ءۇيىپ بەرۋگە قولعابىس ەتىپ ءجۇر. الدىمەن كەلىپ قانداي كومەك قاجەت ەكەندىكتەرىن ءبىلىپ الادى. قاريالاردىڭ وزدەرىنىڭ كۇش-قۋاتى جەتپەي جاتقان سان قيلى شارۋاسى بار. بىرەۋلەرگە اۋلاسىن تازارتۋ كەرەك بولسا, ەندى ءبىرىنىڭ وتىنى جارىلماي جاتىر. ءتىپتى قارعا ادىم جەر مۇڭ بولعان ەگدە ادامدارعا اق قار, كوك مۇزدا ورتالىقتاعى بازارعا بارىپ كەلۋدىڭ ءوزى كادىمگىدەي شارۋا. مىنە, وسىندايدا ۇكىدەي ۇشىپ, ءۇيىرىلىپ تۇرعان جاستاردىڭ كومەگى كەرەك-اق.
– ءبىز وسىنداي جۇرەك جىلۋىمەن بولىسەتىن اكتسيالاردى دۇركىن-دۇركىن ۇيىمداستىرىپ وتىرامىز, – دەيدى «ۆولونتەرلەردى قولداۋ ورتالىعى» فرونت-كەڭسەسىنىڭ باسشىسى ديدار حامزين. – وتكەن جىلى 800-گە جۋىق وتباسىن قامقورلىققا الساق, بيىل مەيىرىم شەڭبەرىن كەڭەيتىپ, ءبىر مىڭنان اسا وتباسىن قامتۋدى كوزدەپ وتىرمىز. مەيىرىم شۋاعى كىلكىپ تۇراتىن مۇنداي ءىس-شارالارعا 150-دەن اسا ەرىكتى قاتىسىپ ءجۇر.
ءسوز سوڭىندا وبلىستا توقسانعا جۋىق ەرىكتىلەر ۇيىمى باستارىن قوسىپ وتىرعان ءتورت مىڭنان اسا ىزگى نيەتتى جاستار جالعىزىلىكتى جانداردى قامقورلىقتارىنا الىپ, كومەك قولىن سوزىپ جۇرگەندىگىن ايتا كەتەلىك. جەلتوقساننىڭ ايازىنا توڭعان جانداردى جۇرەك جىلۋىمەن جىلىتىپ جۇرگەن جاستارعا العىستان باسقا ايتارىمىز جوق.
اقمولا وبلىسى
