سالا ماماندارى مەن ساراپشىلارىنان قۇرالعان كوميسسيا جوبالاردى 5 باعىت بويىنشا ىرىكتەگەن. ءار جوباعا 500 مىڭ تەڭگە بولىنگەن. مۇنداعى باستى ماقسات – بەلسەندى شىعارماشىل جاستار قاۋىمداستىعىن قالىپتاستىرۋ ءۇشىن ايماقتاعى 14-تەن 35-كە دەيىنگى ازاماتتاردىڭ جاڭا جانە قولدانىستاعى باستامالارىن مەملەكەت تاراپىنان قولداۋ. ىلكىمدى ءىستىڭ يگىلىگىن كورگەن جاستىڭ ءبىرى – قۋات جانەسەەۆ.
– مەن – يندەر اۋدانىنا قاراستى ەلتاي اۋىلىنىڭ تۇرعىنىمىن. «تاۋەلسىزدىك ۇرپاقتارى» گرانتى تۋرالى الەۋمەتتىك جەلىدەن بايقاپ, ءوزىمنىڭ باعىمدى سىناپ كورگەن ەدىم. قاتىسقان 50 ادامنىڭ ىشىنەن سۋىرىلىپ شىعىپ, گرانت يەگەرى اتاندىم. ۇسىنعان جوبام «باقىتتى بالالىق شاق» دەپ اتالادى. مۇمكىندىگى شەكتەۋلى جاندار ۇيدەن كوپ شىعا بەرمەيدى. وعان سەبەپ كوپ. ءبىرى جۇرتتىڭ كوزقاراسىنان يمەنسە, ەندى ءبىرى قوعامدىق ورىنداردىڭ ەرەكشە جاندارعا ىڭعايلانىپ جاسالماعاندىعىنان شىعا المايدى. ولارعا ەركىن سەرۋەندەيتىن ورىن جاساپ, ال قالعان بالالارعا مۇز ايدىنىن اشقىم كەلەدى. گرانتتان تۇسكەن قاراجاتقا كەرەك قۇرال-جابدىقتاردى الىپ, كاسىبىمدى دامىتسام دەيمىن. ال يندەر اۋدانىنا قاراستى مۇمكىندىگى شەكتەۋلى, ەرەكشە بالاسى بار اتا-انالارعا جانە كوپبالالى وتباسىلارعا ارنايى كونكيلەردى تەگىن بەرەمىن, – دەدى كاسىپكەر.
قۋاتتان وزگە, گرانت يەلەنىپ, جوباسى ۇزدىك دەپ تانىلعاندار قاتارىندا ايكوركەم ساتىموۆا («اقىلدى بالا»), ديلناز يسلياموۆا («تىگىن شەبەرحاناسىن اشۋ»), شۇعا جەكسەماليەۆا («بىرگە»), نۇركوركەم عابيت («NUR Cake»), اينۇر نۇرىمبەتوۆا («ۇزدىكسىز قۋات كوزى»), اقتىلەك بيسەمباي («الەمدى قازاقشا تانى»), نۇرسۇلتان نۇرعاليەۆ («قۇرىلىس جابدىقتارى مەن قۇرالدارىن جالعا بەرۋ»), باقداۋلەت ومىرتاەۆ («3D Engineering»), عيبادات مىڭباي («انتيبۋللينگ») بار.
بايقاۋعا ۇمىتكەرلەردىڭ وتىنىشتەرى 30 قاراشاعا دەيىن قابىلدانعان. ۇيىمداستىرۋشىلاردىڭ سوزىنشە, جاستاردىڭ كاسىپپەن اينالىسۋىنا مۇمكىندىك بەرەتىن مۇنداي يگى باستاما كەلەر جىلى دا جالعاسىن تابادى.
– «تاۋەلسىزدىك ۇرپاقتارى» گرانتى اتىراۋ قالاسىندا بيىل العاش رەت باستاۋ الدى. بايقاۋدا عىلىمنىڭ باسىم سەكتورلارىندا جاڭا عىلىمي جوبالاردى جانە زەرتتەۋلەردى ىسكە اسىرۋعا ارنالعان «عىلىم», ەلىمىزدىڭ مادەني مۇراسىن تانىمال ەتۋگە, حالىقتىق مادەني داستۇرلەر مەن ونەردى ىلگەرىلەتۋگە باعىتتالعان جوبالاردى ىسكە اسىرۋعا ارنالعان «مادەنيەت», جاڭا IT شەشىمدەر مەن جوبالاردى, ونىڭ ىشىندە جاڭادان باستالعان ستارتاپ جوبالاردى ىسكە اسىرۋعا جانە ازىرلەۋگە ارنالعان «اقپاراتتىق تەحنولوگيالار», ەكونوميكانىڭ باسىم سەكتورلارىندا جاڭا بيزنەس-يدەيالاردى ىسكە اسىرۋعا ارنالعان «بيزنەس», جاڭا مەديا جوبالاردى, ونىڭ ىشىندە جاستار ءۇشىن تانىمدىق, پايدالى, قىزىقتى كونتەنت قۇرۋ جونىندەگى جوبالاردى ىسكە اسىرۋعا ارنالعان «مەديا» باعىتى بولدى. الداعى ۋاقىتتا بۇل جوبالاردى ۇتىپ العان قاتىسۋشىلاردى ءوزىمىز قاداعالايمىز. وسى جوبانى جىلدىڭ اياعىنا دەيىن باستاۋلارىنا مۇمكىنشىلىكتەرى بار. بۇگىندە بىزدە «تاۋەلسىزدىك ۇرپاقتارىنان» بولەك «سەنىڭ باستاماڭ» سىندى باسقا دا جاقسى جوبالار بار. الداعى ۋاقىتتا وسىنداي ءىس-شارالار قاتارىن تولىقتىرۋ جوسپارلانىپ وتىر, – دەدى قالالىق جاستار رەسۋرستىق ورتالىعى باسشىسىنىڭ مىندەتىن اتقارۋشى ەلدار تورەمۇراتوۆ.
ايتا كەتەيىك «تاۋەلسىزدىك ۇرپاقتارى» ارنايى گرانتى 2021 جىلى تاۋەلسىزدىگىمىزدىڭ 30 جىلدىق مەرەيتويى قارساڭىندا مەملەكەت باسشىسى قاسىم-جومارت توقاەۆتىڭ باستاماسىمەن جاستاردىڭ جاسامپاز جوبالارىن جۇزەگە اسىرۋ ماقساتىندا تاعايىندالدى.
