ءىس-شارانى ءال-فارابي اتىنداعى قازۇۋ باسقارما مۇشەسى, اكادەميالىق ماسەلەلەر جونىندەگى پرورەكتورى ءلاززات ەركىنباەۆا قۇتتىقتاۋ سوزبەن اشىپ, قارا شاڭىراقتىڭ 90 جىلدىق مەرەيتويى اياسىندا ءوتىپ جاتقان شارا قاتىسۋشىلارىنا ريزاشىلىعىن ءبىلدىردى.
مادەنيەت جانە اقپارات مينيسترلىگىنىڭ باق سالاسىنداعى مەملەكەتتىك ساياسات دەپارتامەنتىنىڭ ديرەكتورى قاينار احەتوۆ ۋنيۆەرسيتەت پەن گازەتتىڭ مەرەيتويىمەن قۇتتىقتاپ, گازەتتىڭ ۇجىمىنا شىعارماشىلىق تابىستار تىلەدى. «جوعارى ءبىلىم سالاسىندا جەتەكشى وقۋ ورنىنىڭ گازەتى ۋنيۆەرسيتەت ءومىرىنىڭ ايناسى. اقپارات جانە مادەنيەت مينيسترلىگى جانە قازۇۋ اراسىندا مەديا سالاسىندا ماماندار دايارلاۋ مەن سالالىق جۋرناليستيكانى ارتتىرۋ بويىنشا تۇراقتى شارالار وتەدى. اراداعى ىنتىماقتاستىق جاساندى ينتەللەكت جانە جۋرناليستيكا, فەشن جۋرناليستيكا, مەدياەكولوگيا سياقتى باسىم باعىتتاردا جالعاسادى», دەدى ول ءوز سوزىندە.
جۋرناليستيكا فاكۋلتەتىنىڭ دەكانى تەمىرعالي كوپباەۆ ءىس-شاراعا جينالعانداردى ءباسپاسوز مەرەيتويىمەن قۇتتىقتاپ, گازەتتىڭ ۋنيۆەرسيتەت ومىرىندەگى ماڭىزىنا توقتالدى.
بۇۇ جاھاندىق كوممۋنيكاتسيالار دەپارتامەنتىنىڭ وكىلى – الماتىداعى بۇۇ اقپاراتتىق بيۋروسىنىڭ باسشىسى ۆلاستيميل سامەك «جارىق كورگەنىنە 75 جىل بولعان گازەت قوعام ومىرىندەگى ماڭىزدى جاڭالىقتاردى جاريالاي وتىرىپ, ۋنيۆەرسيتەتتىڭ الەۋمەتتىك تارازىسى بولا ءبىلدى. گازەت جۋرناليستيكانىڭ حابارلاۋ, اقپاراتتاندىرۋ ميسسياسىن اتقارىپ كەلەدى. ءبىر ايتارلىعى, بيىل بۇۇ ادام قۇقىنىڭ بۇكىلالەمدىك دەكلاراتسياسى قابىلداعانىنا 75 جىل تولىپ وتىر. ءباسپاسوز ادامنىڭ اقپارات الۋ قۇقىنا ۇلەسىن قوستى دەپ ايتا الامىن», دەدى.
«قازاق گازەتتەرى» جشس باس ديرەكتوردىڭ ورىنباسارى – الماتى قالاسى باسىلىمدارىنىڭ باسشىسى دۋمان اناش قاتىسىپ, گازەتتىڭ جارىق كورگەن مەرەيلى تويىمەن قۇتتىقتاپ, ستۋدەنت شاعىندا العاشقى جۋرناليستىك قادامىن وسى گازەتتەن باستاعانىن ەسكە الدى.
«Qazaq universiteti» گازەتىن ءار جىلدارى باسقارعان باس رەداكتورلارعا جەتكەندە, ءباسپاسوز جانە ەلەكتروندى باق كافەدراسىنىڭ پروفەسسورلارى ساعىمباي قوزىباەۆ, دانداي ىسقاق, ساعاتبەك مەدەۋبەك ۇلى, يۋنەسكو-نىڭ جۋرناليستيكا جانە كوممۋنيكاتسيا كافەدراسىنان الەكساندر روجكوۆ, بەكجان اشىرباەۆ جانە باسپاگەرلىك-رەداكتورلىق جانە ديزاينەرلىك ونەر كافەدراسىنىڭ اعا وقىتۋشىسى دارمەن سمايىل وزدەرىنىڭ ەستەلىكتەرىمەن بولىسسە, «Qazaq universiteti» گازەتىنىڭ ءتىلشىسى قايىرجان تورەجانوۆ گازەت شىعارۋدىڭ ءتۇپ-توركىنى جۋرناليستيكا فاكۋلتەتىنەن باستاۋ الاتىنىن اتاپ ءوتتى.
ءباسپاسوز جانە ەلەكتروندى باق كافەدراسى ۇيىمداستىرعان شارادا ستۋدەنتتىك ۇزدىك جوبالار تانىستىرىلدى. گازەتتىڭ تاريحىنان سىر شەرتەتىن دەرەكتى فيلم, جارنامالىق روليكتەر, زياتكەرلىك ويىندار دايىنداعان ارۋجان اعىباەۆا, ادنان ءال-حاتتاب, ەلدار كوحان, نازەركە ابىلقاسىموۆا, رولان ءبىرجان, قوسقانات باۋىرجان, سايات تىلەمىس, باعلان تۇرعانبەك سياقتى ستۋدەنتتەر ءباسپاسوزدىڭ بولاشاعى مەن دامۋىنا ارنالعان زەرتتەۋلەرى مەن ۇسىنىستارىمەن تانىستىردى.
ءىس-شارا بارىسىندا «Qazaq universiteti» گازەتىنىڭ 75 جىلدىعىنا ارنالعان ۋنيۆەرسيتەت ءومىرى مەن گازەت تىنىسىنا ارنالعان كىتاپ, ءباسپاسوز جانە فوتوكورمەسى ۇيىمداستىرىلدى. مادەني جانە اكادەميالىق مەرەكەگە اينالعان شارا الداعى جىلى جالعاسىن تاباتىن بولادى.
